Ovapolifi ta va shingi vehe na eembapila dokushinga, vo ta va kandoma unene

0
214

KuHelvy Shaanika 

ONGWEDIVA – Omanga veli neekelelwa okukwatela po oveta nelandulafano, nokuamena eemwenyo dovanhu, oikoya omo ovanambelewa vopolifi tava shingi oihauto vehe na eembapila dokushinga vo tava kandoma oya ninga ihapu, unene tuu konooli. 

Imwe yomoikoya oyo oya ningwa omwedi wadjako nopexulilo laMai omo ovapolifi vatatu va mona oiponga noituwa oyo vali tava shingi vehe na eembapila dokushinga. Mu imwe yomoiponga oyo omwa ehamekelwa yoo ovatwaalelwa. 

Odula yadjako, omupolifi umwe kOmusati okwa shinga otuwa yovanhu nokuhena epitikilo lamwene wayo, ye ehe na ombapila yokushinga. Ohauto ei oya ka kandoma ndele ta mu fi omunhu. 

Omupedu Komanda wOpolifi mOshitukulwa shaShana Deputy Commissioner Rauha Amwele okwa ti ovapolifi vomoshitukulwa shaye, aveshe ova ya moiponga omo omanga vali vehe li moilonga.

Umwe womwaavo vakandoma muMai, omupolifi wombadi youConstable wedina Eseki Striker Shishango, weedula 29, oo ha longele kopolifi yaKatope. Shishango okwa ya moshiponga shekandomo lotuwa omanga a li ta shingi otuwa ehena ombapila moshitukulwa shaNyaanya. 

Omunamido 44, Gideon Stefanus oo ha longele mopolifi yaShakati naye fiyo omefiku omo ehokololo eli la shangwa, oku li meembete mOshipangelo mOnandjokwe ta mono ouhaku, konima eshi a kandoma nohauto oyo a li ta shingi, shihe li paveta. Oshiningwanimwa eshi osha ningilwa momudingonoko waNiipa. 

Warrant Officer David Uunona oo ha longele opolifi kokamba yokOkave mOshakati, naye oumwe yoo womovapolifi ovo taku hokololwa kutya oveli hanga moiponga yomatuwa, tava shingi vehe na oufemba.

Ashike Amwele okwati epeko loshibofa shaUunona ola tuminwa nale kombelewa yOmutamaneki-ndjai onga oshitopolwa shekonaakono loshibofa.

“Oshibofa shaGideon kasha li sha lopotwa ko natango kopolifi, ashike ita tu shi efa, oshi na okushikulwa,” Amwele ta ti.

Kakukutu komatanga Opolifi wopedu mOshana ta weda ko yoo kutya Gideon natango oku li moshipangelo, ashike ina yandja ouyelele uyamba shina sha noshiponga shaye shaashi vati ita dimbuluka eshi sha ningwa po. Vati okwe ke li hanga ashike moshipangelo, ye eheshi kutya okwa ya mo ngahelipi.

“Ashike oveta ina i pitika nande omunhu umwe a shinge ehe na ombapila yokushinga, kutya nee oku kale omupolifi, oku na ashike oku pewa ehandukilo nekunghililola la mana mo,” Amwele ta ti.  

LEAVE A REPLY

Please enter your comment!
Please enter your name here