Uushenge ouli kondje yomithigululwakalo dhoshiAfrica – Iileka

0
210

KuClemence Tashaya

EENHANA – Amushanga gUukalinawa, Oshigwana nOmudhingoloko gwewawa lyaagundjuka moSWAPO, Soini Iikela okwa nyenyetele omahangano niiyukithilo yIilongo yokUuninginino mbyoka tayi kambadhala okugandja enwethemo ewinayi kaagundjuka pa kupopila nokuhwahwameka uushenge moAfrica. 

Iileka dhino okwe dhi popi pethimbo a egulula oshituthi shomithigululwakalo mOmundaungilo oshiwike shayi.

 Iileka ta tanguna kutya iilongo yokuuninginino ota yi teya po omithigululwakalo dhoshiAfrica sho ya hala opo ku gandjwe uuthemba wokusimaneka uusatana, uushenge nokuhokanathana kwomashenge,

“Omithigululwakalo dhetu noshowo oohedhi odho tadhi tu gamene komapiyagano ngaka taga etwa kiilongo yokUuninginino. Otwa pumbwa okupangula uumbwada noshowo ehokanathano lyomashenge. Mbaka oyo mboka ya hala okuteyapo  oohedhi dhetu, onkene oya pumbwa okupewa uusama nokupangulwa omolwiilonga yawo mbika iiwinayi,” osho a ulike.

Iituthi yopamuthigululwakalo otayi dhana onkandangala meyokomeho lyomulandu gwedhiminathanepo lyopashigwana, molwashoka mbika ohayi pitike opo aaNamibia yomihoko dha yooloka yi ilongathane nokukoleka ontseyo ndjika oshowo okusimanekathana.

Omolwaashoka Iikela ta ti ewawa lyaagundjuka oli ilongekidha  okuetapo nokuyambidhidha omahangano gopamuthigululwakalo, momanongelo okulundulula nokuetamo iitalendi maanasikola opo mbika yi vule okulongithwa moluuwanawa wawo.

“Omithigululwakalo odho uuthiga wetu nodho hadhi tu ithanitha kutya tse Aanamibia. Namibia okuna uuyamba wopamuthigululwakalo, na otuuvite enyanyu okumona  aagundjuka naakuluntu taya kuthombinga miinyangadhalwa yopahedhi.Osha pumbiwa oku kumika aagundjuka ya Namibia opo ya simaneke ongushu yooheedhi dhawo, ngaasi, iikulya, iizalomwa nomaudhano  ongo omukalo okupopya noku ulika nkene yo yuuvite mwashika ,” Iikela  a ti.

Oongundu adhihe dhomaudhano gopamuthigululwakalo  dhaalongwa  nodhaakuluntu     dha za miikandjohogololo Omundaungilo noshowo Oshikunde odha li dha kuthombinga methigathano ndika.

“Uudhano wetu wopahedhi, iiyimbo yetu, iikulya yetu mbyoka hatu li esiku kehe, ongushunkalelo yetu, omikalonkalelo dhetu, iizalomwa yetu, nelaka lyetu, noshowo iihongomwa niihambulwa kehe hatu longo oyo uuthiga wetu , naambika otwa pumbwa oku yi simaneka, onkene otuna okukala tu yi uvitile uuntsa ongo aaNamibia. Oongundu  dhopamuthigululwakalo omilongo 25 odha li dha kuthombinga moshituthi shika. Oongundu hetatu dhomwaandhika odho dha sindana nodha pewa omakopi  niimaliwa oodola N$ 300-00. Oongundu ya Ndaitavela,  Tumenge na Hamhundja dhokOshikunde odho dha sindanapo uudhano moshitopolwa shaagundjuka. Omanga ongundu yEpumba oya sindana moshitopolwa  shoongundu dhaakuluntu.  Oongundu dhilwe ndhoka wo dha sindana omakopi niimaliwa okuza moshikandjohogololo Omundaungilo, odho Temonyeka  Hamhundja noshowo Nafye Otweya mongundu yaagundjuka  omanga  Hadibo Momukalele oye a sindana kombinga yoongundu dhaa kuluntu.  

Oshituthi shopamuthigululwakalo shopOmundangilo osha hololwapo kukansela gwOmundaungilo, Festus Ikanda opamwe nomanongelo noshigwana miikandjohogololo mbyoka iyali.

Kansela Ikanda okwa fatulula kutya Oshikondo shAagundjuka  nasho osha kwatha sho sha gandja oshimaliwa omolwa omalweendo noshowo iikulya.

 “Otandi pandula shili Oshikondo Shaagundjuka omolweyambidhidho lyawo. Otwe shi pondola okuninga oshituthi shika omoIweyambidhidho lyawo, onkene otatu indile wo oshikondo shopaumwene opo wo shi kwathele melongekidho ndika omolwashoka tse aashona natango pashimaliwa,’ Ikanda a ti.

Pethimbo lyoshituthi shika opwa li tapa landithwa iikulya yopamuthigululwakalo ngaashi iiyimati onyama naandjoka yondjuhwa yOshiwambo..

 “Otatu dhana omithigululwakalo dhAakwanyama oshowo otatu ulike iitalendi yetu onga aagundjuka noshowo aakuluntu.

LEAVE A REPLY

Please enter your comment!
Please enter your name here