WHERE OTHERS WAVERED – Iihokolola yaakwiitaa mboka ya li pOmugulu-gOmbashe

0
206

M

ehokololo oshiwike shayi otwa li twa hulile puutokolwa wumwe woshipopiwa sha Andimba Toivo ya Toivo sho a popitha ompangu yepangelo lyokatongo moPretoria moka ye na yakwawo mboka ya li ya lukwa iikulo kepangelo ndyoka ya li taya tamanekwa. Metsikilo lyoshipopiwa she Ya Toivo okwa tile.

“Omuwa gwandje, tse otwi iyadha mpaka mevi ekwiilongo, tatu pangulwa noku tamanekwa kohi yoompango dha totwa kaantu mboka tse twa kala twa tala kutya oyo aakwiilongo. Otwi iyadha tatu pangulwa komupanguli ngoka keeshi omukwashilongo shetu ye ishewe keshi onziililo yetu”.

Okwa tsikile a ti:

 “Tse Aanamibia ndele katu shi aakwashigwana yaSouth Africa. Tse itatu ka yalula nena nenge monakuyiwa uuthemba weni okutupangela, okututotela oompango moka tse itaatu ti mo sha, okulonga noshilongo shetu ongo oshinima nenge uuyamba weni nokulonga natse ongo aahona yetu. Otwa kala aluhe nokutala South Africa ongo omwiiyakelimo moshilongo shetu. Shika osho twa kala aluhe tu uvite sho osho tu uvite nopethimbo ndi, na omonkalo yatya ngeyika twa taalela epangulo ndika.

“…Ngame omuNamibia kesipa no itandi vulu okulanditha po aantu yandje kaatondi yawo. Otandi zimine kutya onda kwathele mboka ya kutha omatati, ondi shishi kutya ekondjo otali ka kala ele nelulu. Ondi shishi wo kutya aantu yandje otaya ka kondja kutya otashi ya pula shi thike peni.

Otwi itaala kutya South Africa okuna ehogololo okukala nombili natse nande outu thindile pevi mokulongitha oonkondo. Ngele owa hogolola okutunyanyagula nokutu thiminikila ehalo lyoye, ito ka landitha po ashike einekelo ndyoka wa li wa pewa, ndele oto ka kala ashike wu uvite egameno sigo ethimbo ndyoka oonkondo dhomatati dhoye dhi vule dhetu.

“Omuwa gwandje owe shi mono shina oshilonga okuluka ndje omukatalume. Pethimbo lyIita Iitiyali yUuyuni sho sha ndhindhilikwa kutya oshilongo shandje nosheni oyali kohi yembandameko lyoshikogo oshiluudhe shomulandu guuNazisme, ngame onda tula omwenyo gwandje moshiponga opo ndi popile iilongo yetu iyali, nda zala ouniforoma nokapaya okashunga kuyo. Ndele yamwe yomaakwashigwana yoye shono ya ithanwa kiita okupopila  eputuko, oya ningi aatondi yiilongo mbika no ya tameke taya teya nokuhomona oshilongo shooyinakulu. Ngame ondi iyamba okutaalela ooholo niikuti yoondjembo dhAandowishi ongo omutonateli gwomahala gopakwiita mo South West Africa nomoRepublica, na onda li ndi ilongekidha okuninga oshihakanwa shiilonga yawo yomuyonena. Nena mboka oyo ya talika aahona yetu oyo ya kuutumba kiipundi yepangulo na oya talika ko ongo omapenda, manga ngame tandi ithanwa ewaya. Uuna nda tala oshilongo shandje ondi uvite uuntsa sho aantu yandje ya kutha iikondjitho omolwa oshigwana shawo, na ondi itaala kutya omuntu kehe hi iyithana yemwene omulumentu ite ya nyonyodhola noku ya dhina,”.

Ya Toivo osho a popi pehala lyemwene nolyooyakwawo ayehe yali taya pangulwa kohofa yokatongotongo.

Tse otwa li twa uvithwa nayi  shono twa tukwa komupanguli omunakatongo, Ludorf, ngoka kuyele a li etu luku aanona yaana ondjo mboka ya pukithwa kaakomunisi. Ndele konima nguka okwa li a thitapo kongeyo pethimbo lyoshipopiwa sha Ya Toivo nokonima yasho na okwa li a sohoni oshoka ohofa oya li yuudha aanadiplomate yiilongo yilwe mboka yi ile okupulakena oshipopiwa she. Yamwe oya li ye mu pandula sho a tsikile okulesha oshipopiwa shoka.

Omweeti gwiihokolola, Oosthuizen na ye kali wo uuvite nawa moku kuutumba moshipundi she, opamwe naapolisi yopombanda mohofa mboka ya li ya hala ompangu yi pangulile aantu yetu eso.

Sho omweeti gwiihokolola a gandja omatompelo kutya omolwashike aatamanekwa yena okupelwa egeelo, okwa dhenge omuthindo komakankameno ga Ya Toivo  moshipopiwa she ngoka ega tala ko ongo itaaga ulike omuntu uuva ondjo ye mwaashoka a longo andola tashi kondjtha oveta. Oshowo kutya nguka okwa tsikile okutsondumbo nomalongekidho gokupangela South West Africa.

Oshipotha shaalumentu mbaka osha li sha ithanwa Epangelo tali kondjitha Tuhadeleni na yakwawo 36. Petameko lyiihokolola Omupanguli okwa lesha omapogolo ngoka ga longwa kaatamanekwa mboka, oshowo iilonga yuukulo anuwa mbyoka omutamanekwa kehe a  longo.

Omadhina gaatamanekwa otaga monika pepandja 178 membo ndyoka lya fatululwa mpaka okukumika opo wu li ikongele ngoye wu leshe mwene ondjokonona yalyo ayihe.

Mbaka opamwe nayakwawo yamwe inaaya tumbulwa komadhina oya li ya lundilwa kutya oyi iunganeke nokulongela kumwe opo yuumbeko epangelo lyaatokele moSouth Africa noshowo elelo lyawo moSouth West Africa, nokupingenapo ndyoka nepangelo lyoSWAPO. Oya li taya tamanekwa kohi yoveta yUukulo noshowo Oompango dhilwe ndhoka dhina sha nethindilo pevi lyUukomunisi. Iihokolola ayihe oya li ya ningwa moShimbulu na kapwali pwa ningwa onkambadhala opo mbika yi ningwe mOshiingilisa nenge mbika yi tolokwe momalaka gaavalelwamo ya South West Africa.Pethimbo lyiihokolola gumwe gwaatamanekwa , Efraim Kapolo okwa mana oondjenda omolwa omahepeko Yatatu yomaatamanekwa oohailwa Festus Nehale, Petrus Niilenge na Jonas Shimweefeleni oya sile kondholongo yokontuntu ya Robben molwa okuningwa nayi  nokuliwa oshipungo.. Okuza mo 1966 sigo 1967 yaali nenge ye vule po  gumwe onkwatwa yopOmugulu-gOmbashe oya li ya mangululwa ndele oya ka mana oondjenda omolwa omahepeko nomadhengo omanga ya li mondjedhililo.

Tse otwa li tu shishi kutya otatu kondjele shike na ka twa li twa pumbwa okushi dhimbuluthwa komuntu, nenge okulombwelwa kutya otuna okweenda ngiini opo tu adhe emanguluko lyetu.Konima yiihokolola mbika iita yekondjelomanguluko oya ka geeyekwa, nekondjo lyetu olya li lya yambidhidhwa kiilongo oyindji muuyuni.

Ngaashi hashi kala aluhe monkalo yiita otwa tsakaneke omashongo ngaashi ndyoka lyedhipago lyokomanda yotango onene yetanga lyo SWALA nenge South West Africa Liberation Army, Tobias Hainyeko ngoka a dhipagelwa popepi noKatima Mulilo, ndele ina sa oye awike oshoka okwa si ta kondjo a yi pamwe na warrant officer Grobler, noshinima shika osha kumike aakwashigwana oyendji oku ka joina iita yemanguluko sho ya ndhindhilike kutya iilumbu nayo otayi vulu okudhipagwa kaaluudhe.

Grobler otwa kundana kutya okwa ka landulwa komupolisi omwana gwoshilyo sho parliamende mepangelo lya Balthazar Johannes Vorster, ye nguka okwa li omwana nee gwa Jansen. Omanga omwaJansen inaa ya mela lyondjila okuka kondjitha aakondjelimanguluko okwa li anuwa  a lombwele Vorster a  ti ye ita ka hepeka ooholo dhoholomende yaandjawo ndele ota ka kwata ashike iikulo mbyoka noombwa dhe..Okwa li ta dhiladhila kutya ngiika aakondjelimanguluko oya li ongundu yootjotji.Esiku a thika moKatima Mulilo olyo esiku egu ihula oshoka okwa thikile ashike ta indile opo a ka patolole momudhingoloko moka tamu popiwa muna iikulo. Po pethimbo ndyoka aakwiita yemanguluko oya li ya tege omboma onene yoku hanagula ootenga, ye yi mbalipaleka.Osheenditho sha Jansen sho sha lyatako inapa thigala nando osha kutya omudhimba andola gu ka ulikwe, iinyakwi ashike yoonyama ya li ya halakana kiihwa nokomiti dhomomudhingoloko moka.

Konima yiiningwanima mbika otwa ka ndhindhilika kutya ongundu yaakwiita yotango pOmugulu-gOmbashe  oya li unene onene onkene okuza mpoka otwa ka  kala twa topola aakwiita yetu muungundu uushona wo ohawu vulu okutembuka mbala noku inyenga uuna ye wete pokuma pwa piyagana. Nonando pwa kala yamwe yomongundu yetu taya kambadhala okuya ekondjelomanguluko moshipala , ngaashi Philemon Leonard Shuuya ngoka a landithapo aakwiita mwa kwatelwa na nakusa Tobias Hainyeko, mbaka otwe ke ya kwatamo mbala noku ya gandja miikaha yepangelo lyaTanzania ndyoka lya kala lye ya edhilila nokonima olye ke ya  egululamo, yamwe taya ka ninga aakwashilongo yiilongo yokoScandinavia.

Omalugodhi ngoka ga kondjwa koongundu dhongwerrila ndhoka dha ka tuminwa moshilongo okuza konima yetameko lyiita pOmugulu-gOmbashe oga lwilwa moshilongo konyala ashihe, naakwiita yetu mboka tse inaatu ya tala ongo iikulo ngaashi kwali ya lukwa komukolonyeki oya kala nokudhenga omutondi yo taya holama omanga ye ta matauka noshilongo oku ya konga. Oya kwathelwa oku edhililwa nokupaluthwa koshigwana oshoka mbaka oyo aana , aamwayina naatekulu yoshigwana shika. Yo kaya li iikulo nenge aahepeki naatilithi ngaashi ya li ya lukwa kaatondi yawo aaSouth Africa lyokatongotongo.

LEAVE A REPLY

Please enter your comment!
Please enter your name here