Old Mutual lyOosikola natango oko li li omumvo nguka

0
161

Ku Shipi Elago

ONGWEDIVA – Ethigathano lyaOld Mutual lyOosikola natango oko li li omumvo nguka.

Oosikola tadhi ka tegelelwa dhika kuthe ombinga molweendo lwuudhano wokatanga kokoompadhi nowokatanga komokambamba okukondjela ehala lyotango muudhano mbuka.

Gumwe gwomaaunganeki yuudhano mbuka mOshakati Mathew Shiindi okwa ti ethigathano ndika otali tameke kuutayigona weeSeketa(Cluster Centers) dhOosikola moka Oosikola dhomuutayigona mboka tadhi ka kondjithathana.

 Shiindi ta ti Osikola ndjoka tayi ka sindana otayi kakalela po okatayigona komaudhano gopaSeketa(Circuit), moka tamu ka za Osikola ndjoka tayi kakalela po Oshitopolwa shaShana.

Shiindi ta ti uungundumutima womaudhano womuutayigona wEseketa owo tawu wilike nokuenditha omaudhano ngaka pamuthika gwuutayigona wOoseketa dhOosikola.

Uudhano woSeketa owa tegelelwa wu kale wa pwa momasiku 12 July 2014.

Omapapa gaOld Mutual otaga ka gandjwa ngaashi tashi landula, Osikola ndjoka tayi ka sindana po nokukakalela po Oshitopolwa shayo otayi ka mbendekwa N$3000, ontiyali N$2000, naandjoka tayi ya puutititatu otayi ka pewa N$1000.

Osikola ndjoka tayi ka sindana po uudhano womoshilongo ashihe otayi ka yambuka po nokapandi ko N$5000, Ekopi, Eshina lyokuninga Ookopi, eembandi dhoshingoli, niikutu yomaudhano, ndjoka tayikeya pehala etiyali ota yi kapewa 3000, oombandi dhoshisiliveli,iikutu yomaudhano, Okomputa, niikutu yomaudhano.

Shiindi ta ti Osikola ndjoka tayi ke ya pehala etitatu nayo ita yi ka ethiwa oonyala dhowala, otayi ka pewa N$2000, oombandi dhoshikushu, iikutu yomaudhano, eshina lyokutuma eefaxa, niikwathithilongo.

Osikola ndjoka tayi ka etelela okano moshilongo ashihe otayi ka hekelekwa noN$1000 iilongitho yomaudhano pamwe niikwathitholongo.

Osikola ndjoka tayi ka ihumbata nawa otayi kapewa N$500, omanga omukwati dhingi, omudhani gwokonima dhingi, nakutula mo ookoola odhindji, ayehe otaya ka pewa N$200 kehe gumwe.

Shiindi ta tsikile ko ta ti omasindano ngaka oga fathana naangoka guudhano wokatanga komokambamba nokatanga kokoompadhi.

Uudhano wopiitopolwa ayihe moshilongo owa tegelelwa wuka kale ko momasiku 20 september mokapale kemanguluko mOshakati.

LEAVE A REPLY

Please enter your comment!
Please enter your name here