Nambala ta ti naanadholongo oya pumbwa Evaangeli

0
245

KuMaria Namupala

ONIIPA – Omumbisofi gwongeleka ya ELCIN mOshikandjongerki shokuuzilo okwa kumike aakwaELCIN, Omundohotola Veikko V Nambala okwali a tseyithile aakwaELCIN shoka sha kala tashi hepeke omadhiladhilo ge oshowoo okwaa ha kotha kwe omolwa onkalo ndjono yili mu ELCIN.  

“Onda ningi omasiku itaa ndi kotha omolwa iinima itatu mbyono ndiwete kutya onda pumbwa okuyi mu tseyithila mbala ne mu kale muyishi,” ta ti nga.

Okwa tsikileko noku popya iinima mbyoka ya ningi esiku itayi mu kothitha ngaashi aanaskola yomiiputudhilo yopombanda ngaashi oUniversity ya Namibia, Polytechnic oshowo IUM. 

Omumbisofi okuwete kutya aanaskola mbano oya pumbwa okufaalelwa mbala etumwalaka lyevangeli nonande e wete kutya omusita ota vulu okumonika, ashike okwa holola kutya ehala ando mpoka tapu kala tamu zi omusita nguka otali monika nuudhigu.

“Onda kala woo ndina omaipulo kombinga yaanandholongo mbono yeli moondjelilo moshilongo shetu, mbono e wete kutya oya pumbwa oku faalelwa evangeli meendelele oshowo ehungomwenyo, otandi pandula egongalo lyaHosiana kOvenduka ndyono tali kambadhala okutalela po oondholongo dhomovenduka oshowo okuya hunga oomwenyo,” Omundohotola  Nambala ta ti ngaaka.

Nambala okwali woo a tseyitha kutya okuli nokwa indile elelongerki opo li talulule edhiladhilo lyokupata manga oshifo shomukwetu pehulilo lya Juli nuumvo, shono sha kala nokuleshwa kaakriste oyendji moongerka dha Elcin. “Elelongerki lya ELCIN olya tokola opo li pate ombelewa yOmukwetu oshoka kapuna iimaliwa yokufuta omukundaneki nonande eli po i ilongekidha ethimbo kehe okukonga oonkundana,” ta gwedhapo ngaaka.

Omubiisofi okwa kumagidha aaELCIN opo ya pame meitaalo yo ya kale ya kola muukriste opo ya longele Omuwa nenyanyu.

Omundohotola Shekutamba V.V. Nambala  okwa kumagidha opo aanhu ya kale ya pama meitaalo, oshoka Omuwa Kalunga okwa gama kombinga yaantu ye moonkambadhala dhawo adhihe dhokulonga ashihe shoka oshiwanawa kevi ndika.

Nambala okwa tsikileko woo tati “ondi itaala kutya aakwaELCIN oye hole shili ongeleki yawo noya hala okukaleka po ondjundo yayo yiwetike moshigwana shika minima ayihe tayi gumu omalutu noomwenyo dhawo, onkee Omuwa Kalunga ne tupe omadhiladhilo taga dhenge kokule mokunongela shoka sha endelela mokulonga Etumo. Otandi mu indile aakriste akwetu tu pameni meitaalo tse tu longeleni Omuwa nenyanyu. Kalunga nemu yambeke”.

LEAVE A REPLY

Please enter your comment!
Please enter your name here