Oiponga inyanyalifa mOshikoto

0
248

KuHelvy Shaanika 

ONGWEDIVA – Ovanhu vatatu ova xulifa omanga vaheyali va mona oiponga, moiningwanima yoiponga yoihato itilifa noinyanyalifa ya ningilwa hanga ponhele imwe popepi nOmuthiya exuliloshivike ladjako. 

Moiponga ei omwa fila ovalumenhu vatatu, umwe okwa lyatwa kotuwa navavali ovali metuwa ole le lidenga mondoongi nokupitula po ovanhu vavali pokandingosho kopopepi, opo yoo peke ya vali pa kanghame okatuukala ka humbata ovanhu vatano konima eshi nako oke li denga mondoongi oyo tuu oyo. 

Ehokololo olo likumwifa ola tameka mOlomakaya ladja ko lwopo tundi 14h00, eekilometa omugoi lwaapo oku ya mOmuthiya, opo omulumenhu weedula di heshivike a lyatwa kokabesa kepangelo konomola GRN5073 omanga a li ta taulika opate. 

Otaku hokolwa kutya omulumenhu oo a shivika nedina Jeremia Iita, vati a dile lwokeembinga dokEpalela kUukwaluudhi okwa li ta londo ngeno moshiendifo shimwe ndele ta dimbuluka kutya okwa ufila pedu oN$10 yaye, ye ta tauluka nee opate ngeno eke i toole ko kombinga ikwao. Mupya munene okwa lyatwa kokabesa oko ka li ta ka di kombinga ikwao.

Efiku la landula ko, ovanhu vavali ova xulifila ponhele oyo i li ashike oshinano shokilometa imwe okudja opo pa fila Iita, eshi oToyota VVTi yavo yonomola N8866T oyo ya li tai dilile kombinga yokOshivelo sha Namutoni ye li denga mondongi. Otaku hokololwa kutya konima yoku li denga mundongi, oVVTi ei oya alangata ndele ta i ka pitula po nokuehameka ovanhu vavali, va li ve li omutumba pokandingosho ke li popepi. 

Mhanga ashike ovanashilonga vo MVA Fund, ovanambelewa vopolifi nookatalekonawa va li tava lotokela koshiponga opo, okatuukala kokaNissana konomola N103385W, oko nako ka li taka dilile kombinga yokoushimba, takashingwa komukainhu weedula 34, nako oke li denga mondongi oyo tuu oyo, ndele taka alangata, nokuka kanghamena pokandingosho oko opo ashike pa pitulwa ovanhu koVVTi. 

Mokatuwa omo omwa li muna ovanhu vatano, mwakwatelwa okaana keemwedi hamano. Aveshe ovo va li mokahauto omo, ota ku hokololwa kutya ova mona ouponga vanini. 

Ovo va fila moVVTi ovo Petrus Valomboleni Nghipuuma (26) na Josef Iifo (33) oo a li ta shingi. 

Oiningwanima ei oya ningwa ashike konima yomafiku manini eshi Brian Conolly Zaaruka ashivika nawa nedina Shikuma weedula 39 novatwaalelwa vaye vomadina Joel Sadama Kasamane (20) na David Nghilifavali Silas (22) navo va xulifila mondjila oyo yopokati kOshivelo nOndangwa popepi nomukunda Oniingo, moshitukulwa shaShikoto.

Ota ku hokololwa kutya omushingi okwa nyengwa oku pangela oshi endifo eshi sha eta opo shi alangate. Umwe womovatwaalelwa okwa xupa mo moshipango a mona oshiponga shinini koshipala. Oshiponga shikwao osha ningilwa kOnyati natango nOshitukulwa shaShikoto natango oshivike shadjako eshi ovanhu vane va twalwa koshipangele shaElcin kOnandjokwe shalandula eshi otuwa yoToyota omo va li tava ende ya fiya po opate nokualangata. Elao linene ina mu xulifila omunhu moshiponga omu.

Deputy Commissioner Willem Peter wokOshikoto okwa koleka oiningwanima ei. 

Peter okwa pula yoo, ovashivikile ile ovapambele vanakusa Jeremia Iita opo a denegele Constable Julia Shikongo kongodi yonomola 0817547051. Peter ta ta ti ovapammbele vomulumenhu ou ina va monika natango nomudimba waye ouli natango mokila yopolifi kTsumeb. Ta pula keshe ou a kanifa omunhu opo a ye koTsumeb aka tale omudimba womulumenhu ou pamwe ta dimbulukiwa. Otaku hokololwa kutya nakusa ou okwa li ha longo momaumbo moshitukulwa shaShakati naNgwediva, manga ina ka ninga omufita woimuna popepi nOmuthiya

LEAVE A REPLY

Please enter your comment!
Please enter your name here