Opolisi yomuuyuni tai konaakona Oliga yetu

0
162

KuCarlos Kambaekwa

WINDHOEK- Ewiliko lyetanga lyokoompadhi moNamibia otaku popiwa kutya otali kongo eyakulo lyopolisi yomuuyuni awuhe opo ku konaakonwe omapopyo taga popi kutya opwali aantu yamwe taya kambadhala okunwetha mo uudhano niizemo muudhano oshiwike sha zi ko pokati koAfrican Stras na Orlando Pirates. Opolisi yomuuyuni oyo opolisi pokati komapangelo ndjoka tayi kondjitha iimbuluma muuyuni awuhe.

Omuntu gumwe ngoka a li ha dhanene oNamibia Premier League okwa konekiwa kutya oye e lile komeho oshinima shika shoku dhanithitha owina aantu nayi. Omalundilo otaga ti okwa li ta kambadhala opo a lundulule iizemo yuudhano wa dhanwa pokati koosipana mbali- mpoka pwali tapu dhanenwa iimaliwa yi thike pomiliyona yimwe.

Oshikondo shomawudhano sho New Era, ngoka e li  omumwayina gwa Kundana, osha tseyithilwa edhina lyomudhani ngoka ta ku tiwa okwa pula aadhani ya simana yatatu ya Pirates, mwa kwatelwa omukeeleli gwomatanga mokoola opo ya efe ookola dhi yemo owina. Oshikondo shomawudhano sho New Era oshiwike ishewe shika osha kundaneke kutya osha lombwelekekwa nawa kutya aadhani oya li ya udhanekelwa N$10 000 uuna ya etha osipana yawo yi dhengwe.

Uudhano sho wa dhanwa, osipana kehe inayi tula mo sha ashike, Pirates oye a ningi omusindani molwaashoka oku na nale iitsa iyali mbyoka  a mono mu Apilili. Iizemo mbika oya etitha opo Stars a kale konima yi ilandula noBlack Africa nashika osha ningitha opo Pirates a kale omusindani. Ashike, uudhano wa hugunina woMTC mboka wa li wu na okudhanwa ando, owa eta po omwaka onene.

Stars okwi ikaleke kokule nomapopyo ngaka ashike, oya zimine ngaa kutya omudhani gumwe ali ha dhanene osipana ndjika nale okwa pulile omunashipundi Sidney Martin iimaliwa opo a nwethe mo iizemo yuudhano mbuka.

Okwa lombwelelwe mewukililo kutya shika itashi ka ningwa oshoka oshi li ompinge nomalandulathano nomalalakano gosipana ndjika yi isimaneka yoyene. “ Onda dhengelelwe ongodhi komudhani ta pula ndje iimaliwa yombumbo shika osha landula oonkundathana (ewi lya ndhindhilikwa) ashike onde mu lombwele kutya naye hwii, nonde mu mbandameke kutya shika otandi ke shi tseyithila aawiliki aakomeho, Martin osho a ti ye a geya nayi.

Pokati mpoka opwa tseyithwa kutya MTC okwa popi nogeyo onene ta ganda aawiliki ye te ya tseyithile opo ku tamekwe nomakonaakono ga yela. “ Otwa udhithwa nayi oku uva omalundilo ngaka, na unene  kutya oge li pondondo yopombanda. Onga omuyambidhidhi pashimaliwa, otatu ka pitika opo aawiliki yetanga lyokoompadhi ya ninge omakonaakono e tatu ya tsu omukumo kutya uuyuuki nawu holoke,” osho sha leshwa momushangwa gwa nyolwa ku Tim Ekandjo, Omunambelewa moshikondo shoonzo dhaantu  nokukalela po omalanditho moMTC.

Ekandjo ota ti kutya sigo oompaka MTC ina kutha ombinga nenge a mbandameke ewiliko lyetanga molwashoka oye shi shi kutya olya tseya nkene li na okulonga iilonga yalyo nankene tali ungawunga nomikundu ngaashi ndhika ashike, inali kutha owala oomvula okumana omakonaakono ngaka.

Omunambelewa gwoPirates okwa koleke omalundilo ngaka na okwa ti kutya sho yeshi uvu kaadhani mboka yali ya pulwa ombumbo nosho tuu mokupitila momakwatathano galwe gopamalusheno, kutya ope na oonkambadhala tadhi ningwa opo iizemo yomawudhano yi vundakanithwe, osipana oya kutha onkatu meendelelo e tayi tseyithile aawiliki kombinga yompangela ndjoka.

Oonkundana dhimwe kadhi shi naanaa oku kolekwa odha kundaneke kutya aadhani yaali mboka yali ya pulwa opo ya kengelele osipana oya taamba nale iimaliwa nokuli omanga omukwawo gumwe, taku hokololwa omuhikihiya, a tindi thiluthilu okulandwa. Omunambelewa gwoNPL okwa ti oya konga ekwatho kopolisi yomuuyuni opo ku ningwe omakonaakono ga kwata miiti shi na sha nokukengelela uudhano mbuka. Okulongitha eyakulo lyopolisi yomuuuyuni otashi ti, osha ninga oshipu opo ongongahangano yetanga muuyuni, FIFA, a kuthe ombinga momakonaakono ngaka, omunambelewa gwetanga osho a ti.

“Otu wete kutya omalundilo ngaka omanene unene na otu na oku ga konaakono sigo twa adha petameko lyago na uuna sha pumbiwa, mboka ye na ondjo mushika oye na okupangulwa, ano omugandji nomutaambi,” omunambelewa osho a ti nongeyo.

Martin ye okwa ti kutya ota gamenene po efano lyosipana ndjoka a kala nokuyambidhidha pashimaliwa muule woomvula.

“Onga omunashipundi shosipana, ondi na okugamena esimano nuunambano woshilimbo shetu no kandi na esiku tandi ka kutha ombinga miilonga ya nyata ngaaka”, osho a ti.

“Kehe   mboka ye shi ningi, oye shi ningi muyo yene, onkene naya mone ashike iizemo yiilonga yawo molwashoka kapwali pe na ngoka e ya tuma opo ya ka longe iilonga yuungangala yatya ngaaka.” Martin okwa uvaneke okuyambidhidha nokulongela kumwe newiliko momakonaakono ngaka opo ayehe mboka ye na ondjo mushika, ya monike. Moshiningwanima ishewe shimwe muudhano ngaa tawu popiwa mpaka,omunambelewa omutine okwa kuthwa mo miilonga ye yomawudhano potundi ontimulongo nayimwe yuudhano, konima sho sha monika mo kutya okwa li ta indile iimaliwa komunambelewa gwopombanda gwoBlack Africa.

Momwedhi gwa piti, Omupelesitende gwoNamibia Football Association John Muinjo, okwa holokele miikundaneki yaBritain kutya oye gumwe gwomaakuluntuwiliki yoosipana dhomatanga dhAafulika mboka ya uvanekelelwe oombumbo komunangeshefa omuQatari, Mohamed Bin Hammam, mepingakanitho lyomawi opo a hogololwe a ninge OmuPelesitende. Muinjo ndhika ote dhi ikala thilu, nonando okwa zimina ngaa kutya okwa pulile Bin Hammam iimaliwa opo ku tungwe uupale nomayakulilo omolwa etanga lyokoompadhi moshilongo ashihe.

LEAVE A REPLY

Please enter your comment!
Please enter your name here