Oshikandjongeleki shokuuzilo sha dhana oshituthitumo

0
267

KuMaria Namupala

OMUTHIYA – Ehuliloshiwike lyaziko oshikandjongeleki shokUuzilo osha li sha unganeke ontanda yEtumo, ndjono yi li ngashingeyi omukalondjigilile nohayi ningwa aluhe ethimbo ndika.

Ontanda ndjika yEtumo oya li ya tameke  etitano lyaziko noya hulu mosoondaha. Oya li ya ningilwa megongalo lyaMuthiya,  moka omagongalo gaza kiitayi ya yoolokathana ga li geya opo ga topolelathane enyanyu noku uvitha elaka lyevaangeli nolyehupitho ndyoka aasomi ya li ya eta.

Konyala oshituthitumo osha kala hashi dhanwa mu ELCIN sho aatumwa aasoomi ya thiki mOmandongo nokuthikithila aantu evangeli yaze momilema yo ya papudhuke mUukriste, noku kala ya hwama noya kola meitaalo.

Oshituthitumo shika shonuumvo oshali sha kalwa koyendji mono mwa kwatelwa omumbisofi gongerki ya ELCIN  moshikandjongerki shokuuzilo omundohotola Shekutamba V.V. Nambala, aasita yaza komagongalo oshowo aadiakoni noitaali ya yoolokathana yaza komagongalo gi ili nogi ile oyali yeya ya dhane  oshituthitumo shika.

Amushanga gwEtumo mongerki ndjika Stefanus Shigwedha okwali a popitha aakwashituthi teya kumike opo ya longe Etumo noku kwatha mboka ya pumbwa omakwato oshowo okuthikitha elaka lyehupitho kooyitaali ayehe. 

Nonande kapuna oshilonga shaana omashongo Shigwedha okwa tumbulapo gamwe gomomashongo ngono  ge ya adha mewilikongundu lyawo lyEtumo “Yimwe yomiilyo yetu oyali ya kwatwa kuunkundi na inatu vula oku kala tatu gongala nayo omolwa uunkundi mbono wa kwata omalutu gawu, otatu ya halele uukolele ye Kalunga ne yape oonkondo dhokuvulasha”, Shigwedha ta ti nga.

Okwa tsikileko woo ta ti sho omupeha gwe Elia Ndishishi a li a yi keilongo okwali a uvu nayi kashona oshoka okwali a tala kutya otashi ka kala oshidhigu kuye okukwatela komeho ewiliko epe.

Moshituthitumo muno omwali muna oongundu dhomalwiimbo ndhono dhali dheyan okumwenyeka esiku ngaashi, ongundulwiimbo yokovenduka Tungira kemanya , Jakko Kangaayi ndjono yaza kOkavango, ongundulwiimbo yokoRundu oshowo ndjoka yokegongalo lyaHosiana , okutumbulapo owala dhimwepo.

Okwali woo kwa ningwa oshinyandwa shEtumo shono sha etwapo kaakwanegongalo yomOndjamba,  shono sha dhanwa noku ulika nkene aasoomi yali ya thiki mOmandongo noku uvitha oohapu dhOmuwa nonande petaameko shali oshidhigu okukwatathana omolwa okwaa uvitathane komalaka.

Oongalo odhali dhu umbwa tadhi kondjithathana pokati kIitayingerki opo put alike ngoka tayi nepandela. Oshitayingerki sha Omuthiya osho shali sha sindanapo epandela nooN$252 99-85, Oshitayi shuumbangalantu oshina ondjokonona sho osho aluhe hashiya ponomola ontiyali noshikando shino osha kuthapo ekopi nooN$ 81 620-95 naashi sha etelele okano oshitayingerki shaShigambo nooN$58 945-40 nosha pewa ombiimbeli. 

Elesho lyoohapu olyali lya ningwa komumbisofi pamwe naakwathi ye, nelongelokalunga olyali lya ningwa kaasita ngaashi Martha Kanyemba, Debrah O Nuuyoma, Juliana Shikongo oshowo Hilja Nghaangulwa. Omusita Wilhelm Hainane oye ali a ningi euvitho.

Aakwashituthi oyendji oyali ya umbu oongalo na yamwe oya gandja iimaliwa omolwa etumo. Omagongalo ogali ga etelele oonguyo ndhono hadhi gandjwa kwaamba ye wetike kutya oyeli mompumbwe yiikutu oshowo iikumbaatha.

Amushangatumo ta pandula ayehe yali ya holoka nokuya indila ya longe oshilongatumo. Okwa pandula woo ayehe mbono ya gandjasha omolwa etumo teya indile ya tsikile nokulonga ngaaka.

LEAVE A REPLY

Please enter your comment!
Please enter your name here