Simanekeni omithigululwakalo

0
259

KuMaria Namupala

ONAYENA – Omukalimo gomomukunda Ompugulu mOnayena okwali a kumagidha aantu opo ya kale nokusimaneka omithigululwakalo dhookuku yonale.

Meme Beata Kalekela okuli omuwiliki gwongundu ndjono hayi ulike iikulya ya yoolokathana yomuthigululwakalo gwAawambo. Ongundu ndjino oya thikamapo moomeme  mbono yiimanga kumwe opo ya yambulepo omuthigululwakalo.

“Natu kaleni nokusimaneka omithigululwakalo tse tatu kala noku ulika iilikolomwa yetu mbyono hatu longo momapya getu, inatu ekelahipo omithigululwakalo ndhono twa thigilwa kookuku yetu mbono ya tetekela nale muukwaaluhe,” tati ngaa.

Ndhino okwali edhi popi miidhano yomithigululwakalo oshowo euliko lyiilongomwa, shoka sha ningilwe Olyomakaya gaziko pombelewa ya Kansela pOnayena. Oongundu odhindji odhali dha holoka mono mwa kwatelwa nongundu yoomeme hayi ithanwa Omutumba Ethete.

Omutumba Ethete oya yambukile momudhingoloko gwaNayena ndjono ya thikamapo ashike moomeme mbono ya kala taya itangumuna nkene haya longekidha  iikulya yawo yOshiwambo.

 Oomeme mbaka oyali yena iikulya yomuthigululwakalo ya yoolokathana mbyono yali ye ya nayo komaulikilo ngaka. Oyali yena iikulya ngaashi oshimbunda shono hashi telekwa nomahini gomunya nomagadhi goongombe, oshigali, iimbombo, oyali yena omagadhi goontanga oshowo goongongo, oontanga dhomukokotwa ndhono dhi holike kookuku oshowo omalovu giilya ngono ga simanekwa unene momagumbo gAawambo.

Meme Kalekela okwati ongundu ye otayi kala noku ulika iilongomwa niikulya yomithigululwakalo kehe omumvo, yo ya ulikile mboka yaa heshi iikulya yomithigululwakalo. Esiku ndyoka aakalimo yomoshikandjohogololo Onayena oyali ya holoka yo ya ninge oombangi  nokutala enyakwa dhingi muudhano oshowo okutala nkene yimwepo yomiikulya yAawambo hayi longwa noku telekwa.

Aaniilonga yaza kombelewa yomithigululwakalo mOshikoto nayo oyali ya holoka, ya tale nkene omithigululwakalo tadhi ende mOnayena nonkene taye dhi simaneke. Aina Paulina Muulila naye aza kombelewa yomithigululwakalo okwati otaya ka gandja ehokololo oshowo iizemo yoongundu koombelwa oonene omolwa oshituthi shomuthigululwakalo shono sha longekidhwa kuyele nuumvo. 

LEAVE A REPLY

Please enter your comment!
Please enter your name here