WHERE OTHERS WAVERED – Ekondjo lya tsikila papolitika nopaudiplomate

0
227

Onda li nda popitha oshigongi momasiku 26 Auguste 1968, pethimbo lyedhimbuluko etiyali lyetameko lyiita yekondjelomanguluko.Mpaka onda kambadhala okuyelithila nawa aapulakeni yandje kombinga ye kondjo lyetu noshowo etegameno lyo nakuyiwa yetu.

Onda li wo nda hala oku ya yelithila nawa mokukondjitha omitoto ndhoka yo ya kala noku lombwelwa kepangelo lya South Africa okuza  tuu  piihokolola mbyoka yaatokokele ya ningilwa mOmpangu Yuuyuni omimvo mbali dha piti.

Moshipopiwa shandje onda tameke ngeyi.

“Ngaashi shi shiwike uuna ongundu nenge oshigwana sha tindilwa uuthemba washo wopapolitika, tse moNamibia otwa tameke okudhikapo omahangano gopapolitika okukondjela emanguluko lyopapolitika nuuthemba wopapolitika tashi pitile momikalo dhuudemokoli. 

SWAPO ehangano lyeegulukila aantu ayehe yo moshilongo shetu, pwaana ondjoolola yuukwaludhi nenge yehempululo. Namibia oshilongo oshinene noshina ehala lyaaNamibia ayehe.

Oshikumungu sha Namibia osha kundathanwa, ngaashi amuhe ndi inekela mu shi shi, miigongi yIigwana Hangano konyala uule womimvo 20 no pwaana oshizemo tashi vulu ku ulikwa, tu tye shoka oshaanawa.

Okuza moombelewa dhIigwana Hangano oshikumungu shika osha falwa kOmpangu yUuyuki yOpaigwana.Etokolo nenge nditye okwaa na etokolo kwOmpangu ndjika oku shiwike nawa kune amuhe.

Mondjokonona yoshigwana kehe nenge yaantu kehe mboka ya thiminikwa ohamu ya ethimbo uuna elunduluko tali  undula lyuuka komeho, noshowo uuna etokolo epe lina okukuthwa.Uupyakadhi mboka wa taalela aantu owu na okutalululwa nomukalo omupe gwoku wu kandulapo oguna okutulwa miilonga.Sigo oosho Ompangu Yuuyuki yOpaigwana moHague ya tokola, tse ka twali twa hala okuningapo elunduluko lyasha, oshoka ndika okwa li lyiikwatelela koshizemo shiihokolola yetu mOmpangu ndjoka. 

Oshina okupopiwa ngaashi sha tumbulilwe olwindji nale kutya tse otwa li twa tegamena okumona oshizemo oshiwanawa shiihokolola yetu. 

Etokolo lyahugunina olye tu thigi pomutenya nolye tu uvitha nayi, molwashoka olye tu yugu etegameno, kehe twali tuna noku tu thiga otse atuke.Oshike we twa li tatu vulu okuninga?Itatu vulu okupitika opo oludhi lwetu lu tu gwililepo, osha li miikaha yetu ngashingeyi opo oluhodhi nduka tulu mweneke , osha li miikaha yetu opo tu ninge etokolo epe noku tula ndika miilonga.

Okwaa longitha ekuni kakuna mpoka kwetu fala, ngele osha, okwa nayipike ashike onkalo yetu. Ompito nondjila yimwe ayike ndjoka ya thigalapo oondjoka yoku kutha omatati noku ga longitha ngaashi  ngoka ga li ga longithwa kaathiminike yetu, ngaka otwa tokola oku ga longitha omanga omuthiminiki gwetu a tindila moshilongo shetu. 

Etameko lyiita yemanguluko olyo etokolo ndyoka twa ningi nokuli tula miilonga opo tu tidhemo omuthiminiki gwetu noku adha emanguluko.

Ota shi kala sha puka ku Britania nenge ku USA niilongo ayihe yUuninginino oku itaala kutya tse iikulo yuuvite nayi  yo ishewe ina yi panda onkalo”. 

Moshitopolwa shUumbugantu wAfrica ashihe omuna ekondjelomanguluko tali kondjwa kaakalimo yamo omolwo ondhilo yuuntu wayo nuuthikepamwe, lyo ndika ina li hwamekwa nenge li kumikwe kaakomunisi ngaashi omapangelo gomwaalu omushona gaatiligane  muumbugantu wAfrica taga hokolola opo iilongo yoKuuninginino yi itaale.

Otandi indile iilongo yokUuninginino ; ‘Opo yi game kombinga yAfrica, noku tameka okugandja omakwatho pamwenyo noshowo niinima tayi vulu okulongithwa okuyambidhidha ekondjo lyetu eyuki. Shimwe sho miinima yasimana okuninga osho oku ikalekela South Africa lyokatongotongo opo lyaa kale nekwatathano niilongo yilwe muuyuni, oku li lumbula omakwatathano agehe goludhi kehe.

Tse moSWAPO otwa tegelela omalugodhi ogendji nomanene.

Eyambidhidho noshowo uukwawo wa nankali mboka tatu pewa okuza koombinga adhihe dhUuyuni osho oshinima oshinene shoka tashi fala miizemo iiwanawa yekondjo ndika, kokutya  etidhomo lyomuthiminiki gwetu sho ta kanitha ekondjo ndika.

Otandi simaneke nokupandula aamati naakadhona omapenda ya Namibia mboka yi igandjele noku sila emanguluko lyevi ndika.Otandi dhimbulukwa nokutothamo aakondjelimanguluko yetu ngaashi mboka ya li mewiliko lya Hailwa Tobias Hainyeko, aantu yetu mondholongo kontuntu ya Robben, na otandi tanga nokudhimbulukwa ayehe mboka ya  li ya dhipagwa yaana ondjo medhipago lyaantu yetu    oyendji  pOlukanda olukulu mOvenduka 1959,’

Omimvo 25 konima yaashika  ngame ongo Omuperesidende gwoRepublica ya Namibia, osha li ondjokonona nethimbo tali inyengitha omwenyo, shono nda tsakanene noohailwa yamwe mboka ya li ya kuthombinga molugodhi lwopOmugulu –gOmbashe nokudhimbulukwa etameko lyiita yemanguluko.

Omadhina ngaka ogoo hailwa mboka ya mana oondjenda naampoka mbaka ya hulithila

Mbaka oya sile mondjedhililo koRobben Island

Festus Nehale , 4 Maalitsa 1971

Petrus Simon Niilenge, 8Maalitsa 1974

Jonas Shimueefeleni, 18 Auguste 1974

Mbaka oya sile mondholongo onene ya Pretoria pethimbo ya li  taya pula pulwa    

James Amukuaja, 15 Septemba 1966

Efraim Kapolo, Septemba 1967

Mbaka oya mana oondjenda konima yoku mangululwa mondholongo kontuntu ya Robben

Immanuel Shifidi[edhipago lyoshiyakela] , 11Novemba 1986

Kaleb Hanganee Tjipahura[ eso lyo paushitwe] 1985

Israel Nashilongo Taapopi[ okwa sile medhipago lyomoCassinga 4 Mai 1978

David Shikomba [eso lyo paushitwe mu ] Septemba 1990 na

Philipus Itika

Eindilo lyandje lya hugunina nda popi poshigongi moLondon mesiku 26 Auguste 1968 olya li;

“Kwatha oSWAPO ngoye to yambidhidha ekondjelomanguluko lyetu, opo tse tu vule okudhana onkandangala mbala memangululo lyAfrica alihe!”

Okunana nenge oku itaalitha oyendji opo yetu yambidhidhe osha ningi ihe oshilonga shandje oshinene. 

LEAVE A REPLY

Please enter your comment!
Please enter your name here