Ya gandwa nokukunkililwa kombinga yoHIV/AIDS

0
227

KuClemence Tashaya

EENHANA – Ehangano kali shi lyepangelo hali uvitha ko aantu kombinga yomilalo dha gamenwa nosho wo okuhaa ya momilalo onga omikalo dhokukeelela okutaandeleka omukithi gwoHIV/AIDS, hali ithanwa Namibia Planned Parenthood Association (NAPPA), olya taandeleke oopolohalama dhalyo kaayilongi yomendiki lyopawungomba mEenhana lyedhina Eenhana Vocational Training Centre (EVTC).

Endiki lyomadhewulo olya longekidha esiku lyowina opo li tseyithile noli dhimbulukithe aalongwa kombinga yoHIV/AIDS ngaashi sha ulikwa kokaliindeli kombelewa-unganeki yomadhewulo hayi ithanwa Namibia Training Authority (NTA) mEtitano lya zi ko. Endiki naalongi nosho wo aalongwa yalyo 300 olya endithwa po moopolohalama dha guma oHIV/AIDS.

Omukwatakanithi gwoNAPPA moshitopolwa shOhangwena, Risto Mushongo okwa holola omalimbililo ge kondondo ndjoka omukithi tagu taandele moshitopolwa, ta ti kutya otashi vulika yi kale onene unene ngele itapu katukwa oonkatu dhomeendelelo unene mokati kaagundjuka.

Okwa popi ethimbo ele kesimano lyoku ikonaakonitha nomashongo ngoka ga taalela aagundjuka moshitopolwa shOhangwena. 

Okwa indile aalongwa yomo EVTC, unene aagundjuka aakiintu opo ya hogolole oku haaya momilalo pehala lyokulongitha oongumi. Ota ti kutya oku haaya momilalo ogwo ashike omukalo omuwanawa kamana oku keelela etaandelo lyomukithi unene mokati kaagundjuka naakuluntu mboka inaaya hokanwa.   

“Oku igameka moku haaya momilalo otashi ku pe omukalo gweyisimaneko sho tashi keelele omahalo gomilalo ndhoka tadhi etitha ombuto. Okukala omwiilongi ngoka a taalela onkalo yokomongula ombwaanawa, otandi indile amuhe opo mu hogolole oku haaya momilalo noku kala aayineekelwa nashika otashi kala omukalo gwoku keelela oHIV/ AIDS ku ayehe mboka inaaya hokanwa naahokanwa,” osho a popi nomuthindo.

Mushongo okwa lombwele Kundana kutya NAPPA ita sholola nando moku taandeleka mokati kaagundjuka elaka lyoku haaya momilalo, oshoka oyo aaleli yoshilongo komongula.

“Epuko lya ha ndyoka omuntu ta vulu okuninga olyo okukala wu hole oku ya momilalo nomuntu gumwe, to mu etha po nokonima yethimbo to kala ishewe wu  hole oku ya momilalo nagulwe nando shika otashi ningwa konima yoomwedhi sho wi ihula okuya momilalo. Okukala inoo konaakonwa sho wa kala to yi momilalo naantu oyendji, otashi etitha omuntu a kwatwe kombuto ondhipagi yoHIV.”  Ota ti NAPPA otaka longekidha iipopiwa ya faathana nomasiku goludhi ngaa nduka pomahala mpoka pe na aagundjuka oyendji ngaashi, iiputudhilo yopombanda moshilongo ashihe sigo etumwalaka lyoku haaya momilalo neyineekelathano tayi dhama omidhi momidhingoloko dhaNamibia alihe.

Omudhewulwa mondondo ontiyali moshimpungu shOminino nokutula kumwe ominino, Theopolina Ndaitwa okwa fatululile Kundana esimano lyoonkundathana nomayelitho ngaka na unene kutya oshitopolwa Ohangwena osho shi na omwaalu gu li pombanda moshilongo maagundjuka mboka taa ningi omategelelo. 

“ Otwa pumbwa oonkundathana ngaa ndhika momvula kehe molwaashoka odha nuninwa aagundjuka moshitopolwa. Otatu pandula NTA sho e tu tula mokaliindeli omvula ndjika. Tse natu kuthe ko lela  etumwalaka lyo NAPPA onga li na oshilonga,” osho a ti.

Esiku lyowina lyo EVTC lyokutseyitha nokudhimbulukitha aantu kombinga yoAIDS olya kalwa kaawiliki, aaniilonga naadhewulwa yomendiki mEtitano lya yi.

LEAVE A REPLY

Please enter your comment!
Please enter your name here