Aapolisi yomomikunda otaya kaleke po egameno

0
147

KuMaria Namupala

ONDANGWA – Aaniilonga mboka ya kwatathana melyenge mokukondjitha iimbuluma  natango otaya kaleke po egameno momikunda.

Omunashipundi gwOmbelewa yelyenge lyokukondjitha iimbuluma mEloolo  moshikandjohogololo Okaku, Salome Hamukwaya okwa ti  otaya kambadhala okukaleka iimbuluma kokule. “Otuna ombelewa yetu ndjono ya patululilwe omumvo (2012), ohatu lopotelwa iiningwanima yomaludhi nongele  itatu shi vulu ohatu shi lopota kopolisi yo tayi ungaunga nomufekelwa,” Hamukwaya tati ngaa.

Hamukwaya okwa gwedha po wo kutya elongelokumwe oshowo ekwatathano pokati kawo naakwaashigwana  oli li nawa oshoka olundji ngele iiningwanima yomaludhi gayooloka ya holoka ohaya kambadhala okukwatathana nelyenge lyoomeme notate.

“Konyala ohatu lopotelwa iimbuluma yomadhengo, ngaashi pethimbo ndino otuna aantu taya yaka oongodhi dhopeke unene ngaa uunona wosikola tawu yakapo oongodhi dhaakuluntu momagumbo wo tawu dhi landithapo,” ta tsikile ko. Hamukwaya ota ti ohaya gongala konyala kehe esiku yo ya kondjithe moku keelela iimbuluma oshowo okuyi shunitha pevi mEloolo, nokukaleka oshikandjohogololo  kaashina iimbuluma.

 “Ngele opwa holoka omukundu ohatu gongala opo tu vule okugu kandulapo mbala, omasiku ga ziko otwali tuna uunona wa yakapo iimaliwa yomukulupe gumwe ashike otwa pondola oku wu kwata eta wu tu ulukile mpoka wa fala iimaliwa mbyoka, otwa li  twe wu gandja momake gopolisi yo yi tale shoka tayi wu ningile,” Hamukwaya ta ti ngaaka.

Amushanga mombelewa ndjika yoomeme nootate ya kwatathana melyenge lyokukondjitha iimbuluma, Lydia Kayone okwati ohaya shanga iipotha kehe momambo mbyono taya lopotelwa, ta holola kutya olundji ohaya kala taya tonatele uundingosho mbono wuli momudhingoloko moka nelalakano okukalekapo elandulathano.

Okwa indile aakalimo yomEloolo ya longithe nawa iikolitha yo ya yande okulonga iilonga kaa yi li mondjila.

LEAVE A REPLY

Please enter your comment!
Please enter your name here