Ekondjo lya nenepekwa moombinga adhihe

0
383

Okuza mo 1966 sho twa tameke iita yekondjelomanguluko, otwa nenepeke wo nokuandjaganeka ekalelo po lyetu lyopaudiplomate poombelewa oonene dhIigwana Hangano moNew York oshowo pomahala ogendji kondje yAfrica.

Okuya mo 1970 otwa li tuna oombelewa dhoSWAPO moStockholm, London, Belgrade, Moscow, Bucharest, Paris na Helsinki. Elalakano okuegulula oombelewa ndhika olya li okukwatha okuhwahwameka iigwana yomuuyuni  oku uvako ekondjo lyetu. Kakele keegululo lyoombelewa kiilongo yopondje yAfrica, SWAPO okwa li wo a nenepeke iikonga yehwahwameko lyopapolitika meni lyoshilongo, oshowo iita yekondjelomanguluko, mbyoka ya li tayi gumu olutu lwomutondi shi iwetikile.

Etokolo oku tameka iita yekondjelomanguluko, lya ningwa mbala konima yiihokolola inaa yi tokoka yOmpangu Yuuyuki  yOpaigwana, ya landulwa kiihokolola yiilyo yoSWAPO mompangu moPretoria 1968, oya eta SWAPO shinene puuyelele okuyeleka petameko. 

Iiningwanima ayihe mbika oya ulike puuyelele kutya oshilongo shetu osha yooloka kashishi ashike oshitopolwa sha South Africa hashi ithanwa andola South West Africa.

Iigwana Hangano oya li yiilongekidha okuyambidhidha aantu yaSouth West Africa mekondjo lyawo lyemanguluko konima yiihokolola yOmpangu Yuuyuki yOpaigwana mbyoka yali yaa tokokele. Eilongekidho ndika olya eta sigo oompoka kutya omumvo 1967 Iigwana Hangano kohi yokatokolitho 2248 kOshigongi shAayehe oya dhikepo olutu lwedhina UN Council for South West Africa ongo epangelo lyesiku kehe lyoshilongo. Elalakano nenge ehalelo okwa li kutya oraata ndjika oyo yi kale tayi wilike oshilongo sigo shika shaadha emanguluko lyasho.

 South Africa okwa tindi okulongela kumwe ngaashi sha li sha tegelelwa onkene okakomitee haka nenge oraata ndjika inayi vula okuya mo South West Africa opo yi longe iilonga yayo. Ngaashi ashike okakomittee kowina, komeho nenge hoka keyi tetekele, oraata ndjika oya kala ashike hayi vulu okutalela po iilongo ngaashi Botswana, Zambia, na Tanzania nokushuna okuka gandja omushangwahokololo gwayo koshigongi shAayehe shIigwana Hangano.

Pethimbo iilyo yoraata ndjika ya li ya talele po Dar es Salaam mu Apilili 1968, onde yi tseyithile etokolo ndyoka lya ningwa koSWAPO naandika okwa li wo lya yambidhidhwa kaantu yomoshilongo kutya ongundu oya tokola okulongitha edhina Namibia oku ithana oshilongo shetu, onkene ndika nali kale wo tali longithwa pambelewa kIigwana Hangano.Pethimbo olyo tuu ndyoka onda gandja ehokololo lyandje kuyo tandi popi kombinga ya nkene aakondjelimanguluko noonkwatwa dhopapolitika dha li dha longwa nadho pethimbo dha tamanekwa mohofa moPretoria noshowo kombinga yongundu ontiyali ndjoka ya li ya tegelela okupangulwa, onda hokolola wo ombandameko nomahepeko ngoka ga ningilwa oshigwana shandje kepangelo lyokatongotongo lyomwaalu omushona mewiliko lyiilumbu unene tuu okuza petameko lyiita yemanguluko pOmugulu gOmbashe. “Otatu pula opo Oraata yi ye moNamibia [onda longitha edhina epe ndika moshipopiwa shandje] puna nenge pwaana elongelokumwe nepangelo lyaatiligane lya South Africa, opo yi ka tule miilonga ontokolwa 2145[xxi] yomomasiku 29 Kotoba  1966. 

“Ekondjo lyo SWAPO moNamibia itali kondjitha aatiligane ndele otali kondjitha omulandu gwawo ngoka gwa tula Aafrica pevi kohi yoompadhi dhiilumbu. Ekondjo ndika otali tsikile osigo twaadha esindano. Esindano otashi vulika li adhike pwaana ekanitho lyoomwenyo inaashi pumbiwa, nenge ombinga yimwe otashi vulika pukale etiko lyombinzi omanga elalakano lyahugunina inaali adhika. Iigwana Hangano oya pumbwa okuninga po sha okuyanda onkalo ngaashi ndjoka ya tengenekwa pehulilo, onkene oshinima shika nashi talelwe mefano ndika pethimbo Oraata ya Namibia tayi ilongekidha okuya moNamibia.”

“Edhina Namibia olya li lya dhiladhilwamo nawa. Kerina okwa li a humitha komeho opo oshilongo shi lukwe Namib, ihe Namibia olya li lya lukwa koSWAPO, osho Oraata ya Namibia ya nyola momushangwahokololo gwayo ngoka ya gandja kuAmushanga Ndjayi gwIigwana Hangano , U Thant. 

Omushangwa ota gu ti: “Aakalelipo yaantu ya South West Africa oya tseyithile Oraata yaNamibia kutya yo oya hala oshilongo shawo shikale hashi ithanwa Namibia. Onkene Oraata ndjika nayo otayi yambidhidha ethaneko ndika na otayi indile eyambidhidho opo edhina Namibia li kale tali longithwa uuna tapa popiwa sha pambelewa kombinga yoshitopolwa shoka”. Osheetwapo osha gandjwa kOraata ayihe ndele Mustafa Rateb Abdel-Wahab omukalelipo gwEgipti ngoka oye a li Omuperesidende gwOraata ndjika oye a li a ningitha opo shika shaadhike. Okwa li a taambako ethaneko ndika nale pethimbo lyetalelopo lye koDar es Salaam.  Oraata yIigwana Hangano oye li taamba noku li fala kOshigongi Shaayehe shIigwana Hangano shoka sha tula ndika miilonga.

Abdel Wahab okwa li eshi iilonga ye nawa  na okwa li wo omunashipundi ha longo nawa, nuuna wuna omunashipundi ngaashi ye iilonga otayi longwa nawa. Oto vulu okufatulula shoka wa hala shi ningwe omanga inoo holoka komeho gOraata ndjoka , nuuna ompito ye ya, ye ota adhika nale eshi kutya elalakano lyoye olini onkene ote li yambidhidha. Abdel Wahab ngoka a ka ninga omuambasade konima okwa li ha longo niipambele yokakomitee okatine. Okwa li omunadiplomate paithano pethimbo lyepangelo lyomukwaniilwa Farouk.Onda kala mekwatathano naanadiplomate yapyokoka, mboka ye mu fa ngaashi, ambassador Clark gwa Nigeria, John Malecela gwa Tanzania, Vernon Mwaanga gwa Zambia. Pethimbo ndika enenevi alihe olya li lya hangana moshinima shokuteyapo uukoloni miilongo mbyoka ya li inaa yi manguluka natango, onkene tse otwe shi pondola okwaadha omatokolo gamwe ngoka omanene.

Edhina Namibia olya li lya taambwa kIigwana Hangano, ndele iifonkundana yimwe noshowo omapangelo gamwe unene epangelo lya Britania olya li lya tsondumbo nedhina ndika. Aakalelipo yawo kIigwana Hangano oye tu lundile kutya anuwa otatu thiminikile edhina ndika kombanda yaantu. Otwa longo ngaashi tatu vulu okufatulula kutya omolwashike twa hogololele edhina ndika Namibia, naantu kegumbo oya li ye li yambidhidha.

“Otwe li hogolola oshoka ombuga ya Namib oya kala eshigombanza lyetu oku keelelamo aakolonyeki oyendji naalandi yaapika moshilongo shetu omimvo omathele ogendji. Kakele kaashika ombuga ndjika oyili komunkulofuta guudha uuyamba woohi, guna omatuliloskepa gaali Ombaye nOlindili oshowo okawe kondilo. Onkene iinima ayihe mbika oya simana kutse opo oshilongo shetu tu shi ithane Namibia omolwayo”.

Iigwana Hangano nehangano Lyuukumwe wa Africa oya taambako edhina ndika Namibia ongo edhina lyolela lyoshilongo shoka. Netaambeko lyalyo otali tsu kumwe nomakankameno gIigwana Hangano goku ithikamena mwene . “Onkene oshali oshinakugwanithwa shetu aantu yaNamibia okuutha onakuyiwa yetu nuukwatya wetu, onkene otwi ithana Namibia.

Otwa li twa ende ondjila onde okuza tuu sho twa egulula ombelewa yetu oshona moDar es Salaam ndjoka twa li twa longitha opamwe nomahangano ngaashi PAFMECSA.” 

Onkene engongo lyehokololo lyOraata ndjika lya longekidhilwa amushanga ndjayi gwIigwana Hangano kombinga yoshikumungu shopapolitika , olya ti oshafa SWAPO oye ongundu yimwe yi ilongekidha nawa mokati koongundu adhihe dhomo South West Africa. Oongundu dhilwe odha li SWANU na NUDO-SWANUF. SWAPO okwa li ta longo okuza mombelewa ye onene moDar Es Salaam, moka ndjika ya topolwa miilonga niinakugwanithwa mbyoka ya fa ashike mbyoka hayi longwa momahangano gopapangelo. Kakele kaashika oSWAPO oyi na wo oombelewa miilandopangelo yiilongo ya yooloka. Pethimbo ndika oombelewa ndhika otadhi adhika mo Lusaka, Algiers, Cairo, London, Helsinki noNew York. Iitayi mbelelwa mbika oyi li kohi yewiliko lyombelewa onene moDar es Salaam,yo mbika ohayi longo wo ongo oombelewa dhopaudiplomate dhoSWAPO miilongo mbyoka.Okuza momahokololo gaawiliki yoSWAPO oshi iwetikile kutya SWAPO olyo ehangano lya thikamapo ongo ehuku lyepangelo. Omanga kombinga onkwawo omahangano gamwe ngoka wo gaaNamibia ita ga ulike kutya ogena omalongekidho ngaashi ngoka goSWAPO. Oraata ya Namibia yIigwana Hangano oya li wo ya kundathana naangoka.

Momushangwa nguka omwa li wo mwa ulikwa niitya nomomaityo ogendji kutya Iigwana Hangano ota yi yambidhidha ekondjelomanguluko lyaNamibia palongitho lyomahomato.

LEAVE A REPLY

Please enter your comment!
Please enter your name here