Ina mu ekelashi vali ounona

0
195

Omukalo oo we ya ko omafiku aa ile hano omwoode yokudipaa nokuekelashi ounona otau nyemateke neenghono.

Oshinima eshi sha hanga oomeme, ile oukadona novamati Ovanamibia shokudipaa nokuekelashi eedjona dihe na ondjo ota shi ehameke nota shi  nyateke edina loshilongo shaashi kashi li paunhu ile nokuli pashito shaashi noinamwenyo mwakwatelwa oifitukuti iha i dipaa ounimwena vayo. Mbela oshikwashike hashi hange omunhu a kale neeteelelo eemwedi adishe omugoyi ndele ta pulumuna nawa, nokonima ta ka ekelashi okaana? Nokuli umwe oto hange a kala nookana nande oule weemwedi ile nokuli wodula aishe, ile shidulife po, ndele te ke ka ekelashi.

Oshikwashike naana sheya moshiwana shetu, omolwashike naanaa tuhe na vali omhepo yokuyambididafana meefamili? Ohatu popi eyambidido meefamili shaashi oshinima shimwe osho hashi etifa opo ovakainhu ovanyasha va ekele shi ounona, eyambidido, olukeno, nefiloshisho olo hali kala lihe mo movakwapata. Oto hange ounona vamwe eefiye, kave na xe kave na ina ashike ovadja meefamili dakula muna ovanhu hava longo oilonga iwa, ashike ounona ava ova efelwa ashike moluhepo, nomonghalo yokakombo li lifa shaashi kape na nande oumwe womepata lavo eli longekida okuva kufa po eva tekule nokuva fila oshisho. Monghalo nee yoluhepo, nomoukakombo li lifa omo ounona iha va kala vena ouyelele una sha noilyo yopaidalifi, omikifi dohoni nomateelelo ina a longekidwa. Eshi hava kala tava dilaadila, oku li monena shopedimo ile shokudjala -kutya nee okomukalo uli ngahelipi, kuvo osho kashi na shilonga. Voo tave ke lihanga nee nomateelelo inaa longekidwa. Vamwe kavefi eefiye ashike omolwa onghalo yomomaumbo omo ovakulunhu va pikwa koikolwifa ile vanyengwa okuulika ohole nouteku muwa kounona namo oto hange ta mu di oukadona ta va ekele shi ounona. Pomatumbulo opetameko otwa holola kutya ovalumenhu ovanyasha navo ohava ekeleshi ounona. Eheno, ohave shi ngi nonande kashi li meyukililo.  Ovalumenhu vamwe otava kala itava ekeleshi ounona ngahelipi ngeenge ohave ve lipatana omadimo? Otava kala iha va ekele shi ounona ngahelipi ngeenge ihava wanifa po oinakuwanifwa yavo onga ovadali?  Omunhu ta pe omukainhu eteelelo, ndele nghee emu lixulile li na eemwedi nhee, ndele opuwo ina monika vali. Efimbo limwe nakuyandja eteelelo omunhu a kula edule omukainhu nande oneedula o20, ndele ita fi ohoni okufaduka po oshinakuwanifwa shaye onga xe nomudali wokaana oko.  Eyooloko pokati komulumenhu teli patana ile ta faduka po oufimba euyandja, nomukainhu ou ta ekele okaana mokanala oli li peni? Omolwa onghalo yokuhe na eyambidido nokulipatanwa kooxe younona vavo, ovakainhu vahapu ohave li hange tava dipaa noku ekela shi ounona vavo. Oomeme kufe ni oshiholelwa komukainhu eheshivike oo a dipila okaana peumbo limwe mOshakati, ndele ta faduka po. Kashi fi shiwa ashike oshi li xwepo.

Oshi li xwepo okufiya okaana koye povanhu vonhumba uva shi ile uheva shi, poshivelo shopolifi ile poshivelo shoshipangelo, shamha ashike uwete kutya ope na eameno shi dulife eshi to ekele okaana mokanala ile toka dipaa nokuka tula monailona ile toka yandje po ka like po keembwa ile uka nangeke mopate opo ka lyatwe koihauto. Nande ngaho omunhu oukale uhe na eyambidido kofamili ile komulumenhu ove uhe na oilonga, oomeme ovanyasha, ngeenge mweli hanga mwa ninga omateelelo ina a longekidwa alikana kendabaleni opo mu konge ekwafo. Kakele koshipangelo nopolifi, momufyuululwakalo woshiAfrica ohatu tekulwa. Okaana koye kapa nyokogona ile xogona ile omunhu wonhumba wemulineekelela okaana koye. Ashike oshinenenima osheshi, epangalo la Namibia oli na eepologalama ta di dulu okukukwafela. omanga ino ninga etokolo la nyika oshiponga, kufa omhadi ndele toi koshipangelo keembelewa doukalinawa nexungomwenyo ndele to kwafelwa.

Xupifa omweyo wohanana ihena ondjo.  

LEAVE A REPLY

Please enter your comment!
Please enter your name here