Yandeni okulanda iinima ya yakwa

0
234

KuMaria Namupala

ONANKALI – Molyomakaya goshiwike shaziko mwene gwomukunda  Onkankali  Neshuku Mupupa pamwe nopolisi yaNankali oya li ya ningile aakwashigwana oshigongi omolwa onkalo ndjono yili moshitopolwa ta yi limbilike.

Oshigongi shino oshali sha ningilwa petala lyaNankali popepi nuundingosho. Mupupa okwa li a holola okuuva nayi kwe omolwa onkalo yuunona itaa wu vulika momagumbo. “Yakwetu eputudho ohali tamekele megumbo , natu longeni aana yetu okuvulika tse tatu ya longo omikalo dho ku tila nokusimaneka aakuluntu,” Mupupa ta ti nga.

Mwene gwomukunda nguno okwa holola woo kutya mOnankali omuna ombepo ombwinayi yi iteyelamo. 

“Aantu otaya nu omalovu sha pitilila nongele ya kolwa oyendji ohaya tameke taya tukathana yo yamwe taya kondjo, omadhengathano oga londa unene ngaa maagundjuka ashike omatukano ogeli nomaakuluntu,” ta gwedhako ngaaka.

Omukalimo gumwe gomOnankali ngono a tseyika owala nedhina Nangula naye okwa koleke oohapu dha mwene gwomukunda ta ti omatukano mOnankali oga londa unene. “Nena ngele omuntu oho kala owala totukana iitya iinene megumbo nena owa tega uunona wu ka kale tawu tuku naalongi kosikola, yakwetu gandjeni oshiholelwa oshiwanawa kuunona mbono tawu putuka momagumbo geni,” Nangula ta ti.

Okwa tsikileko woo ta ti opuna aalandithi yamwe yomuundingosho ha ya pitika okulandwa kuunona uushona niimaliwa iinene mbyono e wete kutya iimaliwa mbika uunona oha wu yi yaka owala momagumbo. “Aavali inaya kala ha ya gandja iimaliwa kuunona naangu pungoye pweya omunona ta landa nenge ta limbilike ino taamba oshimaliwa shoka, mu lombwela a shune kegumbo noshimaliwa shoka oshoka ongula ongweye ta keya ka yake, nena ngawo uufuthi wuunona otawu shuna pevi,” Nangula ta popi ndhoka.

Timoteus Enkono ngono eli omupolisi pOnankali okwa kumagidha aantu ya yande iinima ya yakwa opo ya hulithepo omukalo guufuthi momukunda.

 “Otandi indile pu kale elongelokumwe ewanawa pokati kaakwashigwana nopolisi opo tu yandeni nokuhulithapo iimbuluma moshitopolwa, uuna puna epuko dhengeleni opolisi yo yi thike meendelelo,” Enkono ta popi ngaa.

Mwene gwomukunda okwa uvaneke taya tsikile noku ningila aakwashigwana iigongi yo ye ya lombwelepo dhimwe dhomooveta dhomuthigululwakalo, ta kumagidha aanuundingosho ya kale ha ya patulula noku edhila pootundi ndhoka dhuuthwa nongele hasho ompango ota yi longo iilonga yayo.

LEAVE A REPLY

Please enter your comment!
Please enter your name here