Ohungi yoondjimbo dhopambepo

0
296

OSHIGAMBO – Oongundu dhomalwiimbo dhahangana mOngeleki onkwaEvangeli
paLuther yomuNamibia (ELCIN), Oshikandjongeleki shokUuzilo nosho
kUuninginino odha thaneka tadhi ka kala nohungi ta yi nyanyudha no ta yi vululukitha
mOlyomakaya yomasiku 19 Juuli nuumvo. Ohungi ndjika oya thanekwa ta yi
ka kala megongalo lyaELCIN mOshigambo nokwa tegelelwa yi ka tameke
komatango esiku ndyoka .

 Ongundu yaagundjuka yedhina Twahangana mOmuwa yegongalo lyaNakambale
moWalvis Bay kOshikandjongeleki shokUuninginino noshowo Ongundulwiimbo
Matukila Kemanya Lyehupitho yegongalo lyaHosianna moVenduka odho tadhi ka
kwatela komeho osheendo shika sho ku ka ninga ohungi yoondjimbo
dhopambepo muukumwe megongalo lyaShigambo.

 Pahokololo lya gandjwa komupitithi guuyelele Naftal Kondombolo Amutoko,
oongundu ndhika odha pangele uukuume wopambepo momumvo 2007.
Oku za tuu momumvo ngoka oongundu ndhika odha kala hadhi talelathanapo
komagongalo gawo okukoleka uukuume wadho. 

Osho sha kala ngaaka sigo
omomumvo gwa ziko sho Matukila oye a hugunine noku talelapo Twahangana
koWalvis Bay. “ Omumvo nguka oya kundathana no ya tsu kumwe opo ya kuthe olweendo oku ka tsakanena pamwe kegongalo lyaShigambo hoka kwa za iilyo yimwe yomoongundu ndhika. 

Oshinenenima oku taandelitha Elaka etoye molupe lwoondjimbo nokutungathana pambepo yuukriste” Amutoko ta ti ngaaka. Okwa gwedhapo kutya oongundu ota dhi lalakanene woo okugongelela noku gwanithapo
oontengenekothaneko dhopayiiniwe yadho. 

“Mohungi ndjika otamu ka
kala iinyangadhalwa mbyoka tayi tungu nokulongathana ngaashi iipopiwa
ya pamba aagundjuka kwa talika nokuli ke kandulepo lyeshongo
lyokwaahena iilonga maagundjuka, oonkambadhala okuyanda, okungambeka nokuhulithapo  iimbuluma moshilongo unene tuu oku tala komahepekathano pokati
kaagundjukamati naakadhona. 

Otamu ka kala wo oshinyandwalongo, otundimbiimbeli niinyangadhalwa oyindji yomainyanyudho”, ta  gwedhapo. Oongundu dhomalwiimbo ota dhi ka kala nomathigathano pashimaliwa
nopandjimbo. Oongundu dhokonooli ndhoka tadhi ka kutha ombinga
mohungi muka ongaashi nee ongundu yaagundjuka, Ondangwa Youth Choir
, ongundulwiimbo Natse Oy’Omuwa yegongalo lyaNiipa
naandhoka adhihe dhomegongalo lyaShigambo.

 Ota ku hiywa woo nesimaneko enene oongundu dhilwe monooli no kehe tuu omukwashigwana ena ehalo opo e ye a hungile pamwe noombwiti mohungi oyo tuu ndjka ye a mone kutya
oombwiti nadho odhi shi okuiimba. Natu pameni meitaalo tse tu longeleni Omuwa nenyanyu. Amutoko osho a kumike ayehe ngaaka.

LEAVE A REPLY

Please enter your comment!
Please enter your name here