Olye nakale ta putudha omunona nguno?

0
214

 

WINDHOEK – Iiningwanima nomahokololo taga nyuwitha omakutsi monkalamwenyo yeshenge dhingi Wendelinus Hamutenya, onkene tayi tsikile.

Yimwe yomiinima mbyoka iitalala okuvalwa kokamwanakadhona hoka kena oomwedhi ndatu ngashingeyi, nomaidhengo mumwe nenge okwaahatsa kumwe pokati kayina yokamwanakadhona nomuyaleki gwe ngoka naye eli eshenge elumentu. 

Kakele kwaambika, opena woo ompito onene opo Hamutenya nomuyaleki gwe nofamili ya yina yokahanona opo ya kaye kompangu taya kondjele kutya olye ta mono uuthemba wokukala nenge okutekula okanona hoka. 

Hamutenya (27), ngoka a li a sindana epapa lyeshenge dhingi  moNamibia oomvula dhaziko okwa ti ye okwa nyanyukilwa okanona ke hoka a ti okwe ka vala nomukiintu gwoomvula 32, ngoka a kuthile ombinga nokwamono oshishani oshititatu ano oSecond Princes moMiss Namibia gwoomvula dha pita.

Hamutenya okwa lombwele oshifo Kundana ta ti oshi li enyanyu ku ye, na otashi holola kutya okukala eshenge  ita shi mu indike opo a kale omuvali ena esiloshimpwiyu. “Ootate yaali okuputudha okaana oshinima hashi kala shapumba momathimbo gonena, ishewe aalumentu oyena esiloshimpwiyu lyaanona shi vulithe aakiintu. Uunona wa tekulwa komashenge ohawu putudhilwa monkalo yili nawa nomesimaneko,” Wendelinus ta ti.

Yina yokanona kaWendelinus ngoka a hala a ithanwe nedhina lye lyopomboga Ndaombanongwe okwa ti omuholike gwe ota hokana neshenge ekwawo, na oye na ehalo okutekula okanona, ashike ofamili yaNdaombanongwe inayi hala okanona kawo ka tekulwe keshenge.

“Ngame mwene kandi na uudhigu nasho, ashike otatu ka tala ngaa kutya ompangu ota yi kapa lye epitikilo okutekula okanona oshoka ofamili yandje oya dhika oonyala mevi,” Ndaombanongwe ta ti ngaaka. 

Ndaombanongwe ta ti Wendelinus omuntu omwaanawa, e na ombepo ombwanawa, keshi owala kutya omolwashike iitula miinima yuushenge. 

“Ethimbo limwe ohandi kala nda hala okuya naye pokati kaantu ashike ohandi kala nda sa ohoni, nonda tila kutya pamwe aantu ota ya yolo ndje.  

“Ngame mwene ondi hole Wendelinus okutya ashike ye okuna nale omuholike gwe omulumentu omukwawo ngoka taya ka hokana na ye. Ohandi kala te dhiladhila Wendelinus onga omuholike gwandje oshoka ye omulumentu omuwanawa, ye okuna oombepo oombwaanawa nokukala na ye, ashike itashi pi ti,” Ndaombanongwe ngoka ha longele ehangano lyokawe lyaNamdeb ta gwedha po.

 Omukiintu nguka ta ti sho a tsakanene lwotango neshenge dhingi, Wendelinus ine mu fundja nande nenge emu kengelele kombinga yuukwatya we, ashike okwe mu lombwele kutya ye eshenge na okuna omulumentu gwokomuhoko gwAashawana (Tswana).

Sho a pulwa kutya omuyaleki gwaWendelinus okuuvitile ngiini iihole yawo, Ndaombanongwe okwa ti: “Omusaane okwa li a geela ndje petameko, a hala okudhenga ndje. Ashike paife okuli ngaa. Ngame kandi na uudhigu nomusaane gwe shaashi otwa tsa nale kumwe kombinga yoshinima shoka, ihe ngele onda adha ngaa Wendelinus ena po omukiintu gulwe, mpoka otuna naana okulwilwa po mpoka.”

Sho a popi na Kundana paku itumuna omatumwalaka, Eshenge dhingi ndyoka olya li komutumba nenge koshigongi tashi popile uuthemba womashenge muuyuni koSan Francisco, moCalifonia, shaAmerica a ka kalelapo Namibia koshigongi muJuni 29.

Wendelinus ngoka a li a tegelelwa opo a thike moshilongo ohela, okwa indile opo, aantu ya hulithe po uutondwe woku tonda omashenge yo ye ga kutheko ngaashi geli, oshoka oga fa ashike aantu ooyakwawo. 

“Aavali na ya itaale uukwatya wuunona wawo unene tuu aaleli yoshilongo shetu, naanapolotika oyo naanaa yamwe po ya nika oshiponga ngele tashiya poshinima sha  tya ngeyika,” Wendelinus ta gwedha po.

Okanona ka Wendelinus ho ka kena ashike oomwedhi ndatu ngashingeyi ota ka ithanwa Mother Teresa.  “Meme okwe ka luku  Meitavelo, omanga ngame, nomuholike gwandje na yina yokanona …shaashi paife okena  aavali yatatu, otwa li twa uvathana opo kehe gumwe aluke edhina lye, ta tu shanga muumbapila e tatu wutula moshimbamba. Otwa pula kuume ketu opo a kuthemo okambaapila kamwe, ashike edhina lyandje olyo lya zimo, nongashingeyi okanona ota ka ithanwa Mother Teresa,” Wendelinus ta ti.

LEAVE A REPLY

Please enter your comment!
Please enter your name here