Outapi wa gongele omiliona N$1.7 molwOlufuko

0
160

OUTAPI – Egongelo lyoshimaliwa omolwa oshituthi shOlufuko nuumvo olya yi sigo opoodola dha Namibia omiliona yimwe oshinkwanu heyali. Nguka ogo omwaalu omunene gwa gongelelwa oshituthi shika okuza tuu nkene shika sha tamekele omimvo mbali dha piti.

Oshituthi shOlufuko shoka osho epito lyetanda lyaakadhonakadhona yAawambo otashi kalako omwedhi tuuka pOutapi moshitopolwa Omusati.

Omwaalu nguka gweemiliona N$1.7, ogwa gongelwa pethimbo lyiitelekela yowina ya li ya longekidhwa kElelo lyondoolopa Outapi no ya ningilwa moshinyanga shelelo lyoshitopolwa Omusati pondoolopa ndjoka.

Piitelekela mbika opwa li aanangeshefa yomoshilongo omathele aanambelewa aanene moholomende yaNamibia mwa kwatelwa Oominista oshowo aanambelewa okuza kiigwana yopondje ngaashi Angola na Indonesia. Omukokoli-peresidende Sam Nujoma naye okwa li piitelekela mbika.

Nujoma ngoka oye eshigombanza[patron] lyoshituthi shOlufuko okwa uvaneke ta gandja oodola N$20 000, omanga omunangeshefa gwehangano lyomatungo O’B Davids Properties CC okwa ti ye ota gandja oodola omiliona yimwe molwoshituthi shoka. Euvaneko lya O’B Davids  olyo lya li li pombanda ku agehe ongulohi ndjoka.

Omahangano AMA Engineering, Construction Omuzile Properties naKambwa Trading, kehe limwe olya uvaneke tali gandja N$55, 000, N$50 000 noshowo N$40 000 ngaashi ga landulathana. Ehangano lyoongeshefa Tona Trading, Ezimo lyAmadhila nOmbaanga yOtango yOpashigwana kehe gumwe okwa ti ota gandja N$25 000. Ngoloneya gwoshitopolwa shaMusati,  Sophia Shaningwa paumwene we okwa uvaneke ta gandja ongombe yogushu ithike po N$7000. 

Iitelekela omolwoshituthi shOlufuko omumvo 2012 no 2013 oya li ye shi pondola N$442 000 noshowo 618 000. 

Nujoma ngoka oye a li omupopi omunene okwa indile oshigwana shi tsikile noku simaneka omithigululwakalo, oshoka okudhikalekapo osho ondjila ndjoka tayi wilike oshigwana kehe.Uuna oohedhi dha dhigininwa noonkuvunkalelo[norms ] inaadhi ethiwa oshigwana otashi kala shina omuthika gwopankalathano omwaanawa.

Omukokoliperesidende okwa dhimbulutha mboka ya li piitelekela mbika, kutya omashongo gopankalathano ngoka taga hepeke oshigwana nena, mwa kwatelwa elongitho lyoonkondo momagumbo oga holoka oshoka oshigwana osheethapo ondhilo yoonkuluhedhi. Nujoma okwa ti nena elongitho lyekuni momagumbo olya londa pombanda okuyeleka monakuziwa shono ondhilo yomithigululwakalo ya li ya kola natango.

 “Oshigwana shaana omuthigululwakalo itashi humu komitse  molwashoka oonkuluhedhi odho onziililo  yoshilongo noshigwana kehe,” Nujoma a dhimbulutha . 

Ngoloneya gwOmusati, Sophia Shaningwa, okwa ti konyala aakadhona ya nakandjengwa[ ano inaa ya mona nando omulumentu] yeli lwopo 40 oya tegelelwa okufukala  pethimbo lyoshituthi shOlufuko shonuumvo.

 Shaningwa okwa kwashilipaleke kutya aakadhona mbaka itaya fukalekwa andola opo ya hokanwepo mbala, aawe oya tegelelwa ya ka shune komanongelo gawo noku mana eilongo lyawo yo  ya ka kwathe mokuhumitha komeho evi lyooyinakulu monakuyiwa.

Shaningwa ngoka oshikako shiilonga ye yuungoloneya sha tegelelwa okuthika pehulilo omumvo 2015 okwa ti okupendulapo oshituthi shOlufuko osho oshinyangadhalwa shimwe tashi kala momusholondondo gwaambyoka ye  eetapo pethimbo lyewiliko lye moshitopolwa shOmisati.

 “Oshikako shiilonga shandje otashi hulu mo 2015 na otandi tala konakuziwa nuuntsa no ne iyuvo ewanawa kutya tse mOmusati otwa adha ondjodhi yetu moshinima   shoonkuluhedhi. Ndhika odha simana oshoka otadhi ulike kutya otse oolye na otwa yama peni,” Shaningwa  a popi nomuthindo. 

LEAVE A REPLY

Please enter your comment!
Please enter your name here