Ovakalimo vomOhakafiya nOshikunde va holola omadiladilo avo oshikando oshitivali

0
262

KuClemence Tashaya

EENHANA – Ovakalimo vomomikunda Ohakafiya nOshikunde moshitukulwa Ohangwena ovaninga vali ehololo lomadiladilo lopambili Oshoondaxa ya djako. Ova enda mewiliko lopolifi fiyo okombelewa yoshikandjohoololelwa Omundaungilo tava ulike  okuhena ombili kwavo ne uliko loovene vomikunda veli vatatu.

Ovakwashiwana ava ova ningile nale ehololomadilaadilo lafa eli omudo wadjako ina va hala euliko loovene vomikunda, Ephraim Weyulu, Toivo Shiweda na Ephraim Haihambo. Omalenga aa okwa ulikilwe nokupewa oinakuwanifwa okuwilika, sha shikula eshi oshitukulwa shoulenga shaHakafiya sha tukulwa moitukulwa ivali.

Ehololo lomadiladilo eli olali la kwatelwa komesho ku Werner Nghifikwa oo a lesha omukanda wavo womanyenyeto osho yo womaindilo  nokonima okwe u yandje komukalelipo wamwene womukunda   Kakololo Johannes Tulipamwe. Eshi a tambula omukanda oo okwa udaneka nokutya ote kuu yandja koovene vomikunda pombelewa yelelo lopamufyuululwakalo pOmundaungilo.

 Werner Nghifikwa okwa holola kutya ovanhu ka ve uditile euliko lovawiliki ava vatatu ombili osheshi euliko lavo inali enda paudemokoli molwasho vo ongo ovalelwa kovawiliki ava inava pewa omhito yoku tya sha moshinima eshi.

“Namibia oshilongo shoudemokoli na otwa hala elelo lopamufyuululwakalo lOukwanyama opo li kundafane nafye  fimbo inaali tula ile li ulike ovawiliki vape ovo tava wilike omikunda detu, “ Fye ohatu kala tu he na ombili ngeenge  onghalo  ei oya twikile ngaha nopehena  eudafano ile epwilikino lomakemo etu  fye ovaHakafiya nOshikunde.

Pandjovo da Werner Nghifikwa, omalenga aa atatu,  Ephraim Weyulu, Toivo Shiweda na Ephraim Haihambo ova ulikilwe momafiku 20 August 2013  ndele nee ewiliko olo lilipo noshoyo oshiwana ka sha li sha kundafanwa noku pulwa omaele asho ile omafaneko asho.

 “Elelo letu lOukwanyama ola longo eshi li udite, nonando ovawiliki voshitukulwa shetu ova li ve na okukundafanwa navo fimbo omalenga aa inaa ulikwa nokutulwa moilonga ei. Ohatu indile Elelo lopamufyuululwakalo  letu opo li ninge omahoololo, opo fyee tu dule okuhoolola omalenga etu vene oo twa hala e tu wilike nokutu kwatela komesho. Kakele kaasho fye otu udite  kutya Elelo lOukwanyama inali tu fimaneka ongo ovanhu vena eenghedi noshoyo  omifyuululwakalo,” osho a ti 

Ovakwashiwana ovo ova lundile yoo oilyo imwe melelo lOpamufyuululwakalo lOukwanyama nokutya , kavena efimaneko lovawiliki mepangelo na vali ohava pe Ohamba Meekulu Martha Mwadinomho Kristian Nelumbu omaele eheli mondjila, onghee vo ova hala omalenga aa a tewatewe moilonga.

Pexulilo leholo lomadiladilo oshiwana shomomikunda edi osha yandja omukanda wmaopandja atano komukalelipo  womalenga oo peembonge delelo lOukwanyama pOmundaungilo. Kakololo Johannes Tulipamwe eshi a tambula omukanda oo okwa udaneka nokutya ote ke u fikifa koovene wavo.

Omalenga oo inaa halika kovawilikwa vavo oo, Shiweda elenga lOhakafiya yokOushilo na  Ephraim Weyulu elenga linene lOhakafiya yokOutokelo. Omudo wadjako opali okwaa he nombili melelo lOukwanyama , vati molwashi Ohamba Meekulu Martha Kristian Nelumbu, oha i wilike nomukalo woukayamukulwa, eshi ha i ulike omalenga manene no ina i kundafana noshiwana.Omangongoto aa okwa  holokele odula yadjako konima eshi Ohamba ya li ya kufa omalenga ane moilonga. Ndele poshoongalele shoikundaneki odula yadjako  Elelo lOukwanyama ole shi popile shayela nokutya euliko lomalenga manene aa moitukulwa yOhakafiya itali lunduluka, na vali ovakwashiwana vomomikunda odo itava pewa omhito okuhoolola ovawiliki ovo va hala. Shikwawo Omunashipundi welelo lOukwanyama elenga linene, George Nelulu ola tile euliko la Ephraim Weyulu, Toivo Shiweda na Ephraim Haihambo ola li la ningwa konima eshi ovakwashiwana vomomikunda odo va kundafanwa navo. Omudo wadjako ovakwashiwana ovo tuu ava ova hololele omadilaadilo avo eshi va ya kombelewa ya Ngoloneya woshitukulwa shaHangwena noku mu pa omukanda nyenyeto wavo kombinga yoshinima osho tava kongo evatelo kuye

LEAVE A REPLY

Please enter your comment!
Please enter your name here