Peter a lalekwa nombili

0
267

KuPinehas Nakaziko

ONDJAMBA – Ongundu onene oya li ya gongala pomayendo gopOndjamba moshikandjohogololo Omuntele, Olyomakaya ya piti opo ya laleke lwahugunina Peter Valomboleni Nghipuuma, gumwepo gwomaalongimina yaali mboka yali ya mana oondjenda dhawo sho ohauto yawo yoToyota ya ipumu mOndoongi noku puma okandingosho mopate onene pokati kOmuthiya nOshivelo omasiku sho gali ga 6 Juuli omvula ndjika.

Oshiyematithi ooshino kutya, Peter ngoka gwoomvula omilongo mbali nahamano (26) okwa adhika ashike opo a hogololwa onga omupangeli gwomalusheno muMaalitsa, konima sho a mana eilongo lye lyoomvula ne (4) koshiputudhilo shaNIMT.

Po ku popya ongulohi yelaleko lyaPeter lyahugunina, Kansela gwoshikandjohogololo Omuntele, Sackey Nangula, okwa lombwele mboka ya li ya gongala mpoka kutya eso lya tya ngaaka ka kwali oshinima oshipe, oshoka omaso gombaadhilila oga indjipala noonkondo ngashingeyi. 

Kansela okwa li ishewe a lombwele mboka ya li yadhengwa pomitima ye shi kutheko onga oshitopolwa sheshito, no ya kutheko eso lya Peter onga ishewe oshitopolwa shonkalamwenyo, manga inaa gandja omahekeleko kaakwanezimo, kookuume osho woo kaaniilonga pamwe naPeter.

Omupopi natango asimana a popi pelaleko lyahugunina, Mathew Hango, okwa hokolola Peter onga omunambili, omunyanyukwi nomunandunge ngoka a gwedha kehumokomeho lyoshilongo. Hango ngoka a kutha ko Peter onga kuume ke kopothingo okwa ti, Peter okwa li omumati omwiifupipiki. 

 “Okutseya Peter okwa li oshingoli oshoka okwa li kuume ngoka ha vulu okukwathela mpaka naampeyaka, itaapula omatompelo, kuume ngoka ha uvu omahodhi gaantu evulithe ookuume oyendji,” Hango ta ti ngaaka.

Ngaashi aapopi ooyakwawo, Hango okwa holola kutya eso lya Peter oshinima sha holoka kuyele unene noonkondo, manga ashike aadhika ta tyapula uutoye wiilonga ye. “Oshidhigu oku itaala shoka sha holoka po ngele tashiya kombinga ya Peter,” Hango ta ti ngaaka moshipopiwa she shoka shali sha longekidhwa kuTonateni Shidhudhu na Basson Ndengu.

LEAVE A REPLY

Please enter your comment!
Please enter your name here