Uunona tawu putudhilwa uudhano poondondo dhopetameko

0
145

KuMaria Namupala

ONAYENA – Okluster yokOniiwe oyali ya longekidha omaudhano gopambili oshiwike shaziko. Uudhano mbuno owali wa kuthwa ombinga konyala koosikola ndhono dhili mocluster nenge mongundu yoosikola ndhoka.

Dhimwe dhomoosikola ndhono dha kuthombinga ongaashi Ekaha, Ambunda, Oniiwe, Onuuya oshowo Uuyoka. Uudhano mbuno owa li wakuthwa ombinga kuunona mbono wuli mondondo yotango sigo ondondo ontiheyali.

Uudhano mbuno owali wa ningilwa pokapale ketanga posikola yopevi yaEkaha ndjono yili mOnayena, aakadhona oyali ya kutha ombinga mokatanga komokambamba omanga aamati yali taya dhana etanga lyokoompadhi. 

Omukuluntusikola posikola yEkaha Sacky Nikanor okwa ti omumvo kehe ohaya longekidha omaudhano goludhi nduka “nelalakano oku eta uunona pamwe, wo wu putudhilwe ombepo yomaudhano manga wuli poondondo dhopetameko lela, uudhano owa pumbiwa poosikola opo uunona wu kale tawu inyanyudha pamwe nuukwawo wo tawu ulike iipewa yawo ya yoolokathana,” ta gwedha ko.

Oosikola adhihe dha kuthombinga odhali dha thigathanapo sho kehe osikola ya kuthombinga naandji ya dhengemo oosikola adhihe oyali ya sindana ekopi oshowo iimaliwa. Ketanga lyomokambamba osikola yEkaha oyo yali yeshi pondola sho ya dhengemo oosikola adhihe noya sindana ekopi nooN$600. 

Osikola Oniiwe oyali ashike ya dhengwa kosikola yimwe no yeya ponomola ontiyali eta yi sindana N$300, omanga Uuyoka we ya ponkatu ontitatu noya pewa N$200.

Ketanga lyokoompadhi Ekaha okwe ya ponkatu yotango sho a dhengemo oosikola adhihe nokwa sindanapo ekopi oshowo N$800, Uuyoka owe ya puutiyali sho wa sindana N$500 omanga Oniiwe ya etelele okano no ya pewa N$300.

Omuunganeki gwomaudhano mongundu yoosikola yaNiiwe, Oiva Namgongo okwa ti oya gongelapo oshimaliwa oshishona opo ya lande omakopi, na yimwe tayi sindanwapo kwaamboka ya longa nawa. 

“Oosikola adhihe odha gongele iimaliwa mbyono tayi sindanwa po,” Namgongo ta ti.

Okwa ti uudhano mbuka owa endele nawa lela oshoka oosikola adhihe dhomongundu ndjoka  odhali dha kuthombinga.

LEAVE A REPLY

Please enter your comment!
Please enter your name here