Dogg, Gazza naExit taya ka imba pOmauliko gIipindi pEenhana 2014

0
346

KuClemence Tashaya

EENHANA – Aahikingalo ya simana, The Dogg, Gazza na Exit opamwe naahikingalo mboka opo taye ya moshimpungu shoongalo  okuza moshitopolwa Ohangwena otaya ka nyanyudha pethimbo lyOmauliko Giipindi gokomumvo pondoolopa yEenhana oshiwike shika.

Omauliko ngaka ga tseyika nawa Eenhana Trade Fair and Expo 2014 otaga tameke Osoondaha ndjika no taga ka  hula momasiku 3 gAuguste nuumvo. Ngaka okwa tegelelwa ga hile aauliki yiipindi oyendji okuza meni nopondje yoshilongo oshowo aatalelipo naalandi yiilandithomwa.

Omauliko gIipindi ngaka otaga ningilwa nonuumvo pEenhana Multi-Purpose Centre, nokwa tegelelwa wo pu ka ningwe ethigathano lyomukadhona nomumati dhingi pethimbo lyago.

Pahapu dhomupopiliko gwElelo lyondoolopa yEenhana,  Paullo Shilongo, aatalelipo naya holoke momwaalu omunene okuyambidhidha oshilando “Shaziza’, nuunene tuu sho pomauliko ngaka tapa kakala aauliki yIipindi yaza meni nopondje ya Namibia, oshowo omainyanyudho taga etwa kaahikingalo ya tseyika nawa noshowo aahikingalo aape yomoshitopolwa Ohangwena.

 “Moshimpungu shOmainyanyudho otwa soshimpwiyu kutya otwa longekidha aahikingalo dhingi aaNamibia ngaashi Dogg, Gazza naExit mokati kaamboka taya ka mwenyeka pethimbo lyomauliko gIipindi ngaka.Aahikingalo yomoshitopolwa ngaashi Nakale ya Nakale na Kuku Nkandanga otwa tegelela opo ya koleke kutya otaya ka kuthombinga mokunyanyudha aatalelipo pomauliko ngaka,’ osho Paullo Shilongo a ti.

Okuza tuu nkene omauliko gIipindi nOmalanditho ga tamekele pEenhana , aahikingalo yeholike naanamadhina oya kala noku ithanwa okuya ya nyanyudhe aatalelipo unene tuu molwashoka oshitopolwa Ohangwena oshakala nondjala yomauliko gomusika poompito odhindji.

Paullo Shilongo okwa endulula eindilo lye kaatalelipo kutya naya holoke momwaalu omunene molwashoka omalongekidho gomainyanyudho nuumvo oga dhenga pombanda. 

Pethimbo lyomauliko ngaka aauliki ohaya paluthwa kaateleki yiikulya iiwanawa notayi tokola elaka yopamuthigululwakalo gwoshitopolwa shaHangwena.

 “Otuna omaudhano palupe lwomapulo ogendji noopreisa odhindji otadhi ka sindanwa kaakuthimbinga pomauliko ngaka gonuumvo. Kakele komauliko gomusiki, otatu ka kala wo nethigathano lya Mr na Miss Eenhana Expo 2014. Aamati naakadhona otaya ka kuthombinga methigathano ndika na otwa taamba nale nookuli omwaalu omunene gwaamboka ya ninga omaindilo okukuthombinga mulyo,” osho Shilongo a koleke.

Omulanduli gwaMshasho gumwe, Simon Sheefeni, okwa li a nyanyukwa noonkondo okuuva kutya omuhikingalo gwe omuholike otaka imba pEenhana. “Eeno Ewiliko lyondoolopa yEenhana na li pandulwe molwashika , oshoka olundji ihatu mono ompito okumona aahikingalo mbaka ohatu ya uvu ashike taya dhana koondolopa ngaashi Ongwediva ndele itatu vulu okuya hoka molwaashoka katuna iimaliwa ya gwana, ndele sho ngashingeyi mbaka taya holoka muka , otandi adhika nda gongela oshimaliwa okukatala nkene taya hiki oongalo noku dhi imba,’ osho a uvaneke.

 Aaholi yoongalo oyendji yomEenhana oye na enota lyomauliko goongalo, oshoka olundji ohaya tegelele ashike omauliko ngaashi ndyoka lyaKapuka Tournament, nenge ndika lyIipindi opo ya mone nokutala aahikingalo yawo mboka ye hole uuna mbaka ya hiywa okuya ya dhane piituthi mbika.

Omulanduli gwa Exit, Lydia Ndamona okwa li wo a nyanyukwa okuuva kutya omuhikingalo gwe ngoka ehole otaka imba pondoolopa yEenhana. “ Oshili itandi vulu okutegelela ndi mone Exit ta imbi eli ko kasteiga, na onda gongelela nale oshinima shika oshimaliwa,’ osho naye a koleke.

Aahikingalo yomoshitopolwa Ohangwena mboka taya ka dhana pomauliko gIipindi oya kwatelamo Chella-Boy, LMT 906 nomu Omp’tine.

Omauliko gonuumvo ogeli kohi yoshipalanyolo nenge oTema  “Okulundulula oongeshefa dhopamuthigululwako okudhininga ndhoka tadhi endele pamwe nonkalo yopauyuni’.

LEAVE A REPLY

Please enter your comment!
Please enter your name here