Makhazola ota ka tseyitha oalubuma ye Evugu

0
175

KuPinehas Nakaziko

WINDHOEK- Nalimaanguluke Ndengu a tseyika nawa koyendji nedhina Makhazola, otaka tseyitha oalubuma ye ontitano tayi ithanwa Evugu, muAguste 02, mehala lyomainyanyudho moCeleb-Spot, Greenwell Matongo, moshilando.

Omusholondondo gwoongalo dha Makhazola ogwa pitile omwedhi gwazako, moka konyala oongalo adhihe dhali dha holika koyendji, noalubuma oya landelwe nawa sho kaleke. 

“Onda kala tandi ningi oalubuma ndjika konyala oomvula mbali adhihe, okuza koalubuma yandje ndjoka yahugunina yali ta yi ithanwa Ohandje yimwe yafikile okuti. Molwethimbo ndjoka lya pitipo, ondali ashike te longekidhile aaholi yoongalo yandje omulyo gwoongalo oomwanawa ngoka inaa mona nale,” Makhazola ta ti ngaaka.

 Okwa gwedhapo ta ti, Evugu kuye osha hala ashike okutya ye okwa pita mombuga, nomefululu enene opo a thike ponkatu mpoka eli mongashingeyi. 

Omusholondondo ngoka gwoongalo dha adha pomulongo nahamano (16), otamu monika oongalo ndhoka tadhi ndaanisitha omuntu unene tuu ndjoka yotango ta yi ithanwa Suwala Shandje. Suwala Shandje ongalo ndjoka ta yi nyuwitha omakutsi gaapulakeni oshoka oshipopiwa oshalungilwa nawa mumwe nomukwelengendjo gwongalo ndjika. Ongalo onkwawo oondjoka a kwathelwa kuThe Doog, ta yi ithanwa Corner. Kakele ashike kwaandhika twa tumbula mpaka, konyala oongalo adhihe oombwaanawa.

Oalubuma yaMakhazola oyina omaludhi goongalo ngaashi dhoKwaito, Rock, House noKwasa Kwasa. Oalubuma oya ningwa kuMomento, Nell-D naMakhazola yemwene. Okwa kwathelwa nee oku imba  kuOmzoo, Kafaule Kanembwaya, Guguletu naKuku Nkandanga. 

Makhazola okwa ti, petseyitho neuliko lyoalubuma ye okwa tokola a manamo opo ekiinyenge ngaashi naanaa ta vulu.

LEAVE A REPLY

Please enter your comment!
Please enter your name here