Matukila kemanya a pititha oalbum kohungi kOshigambo

0
263

KuMaria Namupala

OSHIGAMBO – Ongundulwiimbo Matukila Kemanya Lyehupitho yokoWindhoek okwa li ya tula miilonga okaCD ka yo hoka ka kala ka tegelelwa koyendji. OkaCD haka okena omaimbilo geli 12 notaka ithanwa “Pameni meitavelo,” ka lukilwa oshipalanyolo shonuumvo.

Shino oshali sha ningilwa pohungi ndjoka yali ya ningwa ehuliloshiwike lya ziko, ya longekidhwa koongundu ndhika mbali Twahangana oshowo Matukila kEmanya lyehupitho sho yali ya hangana pohungi ndjika megongalo lyaShigambo.

Gumwe gwomaagundjuka mboka yali ya holoka kohungi esiku ndyoka, Silas Antindi, okwa kumike aagundjuka ya dhiginine uugundjuka wawo yo ya longithe oompito adhihe ndhoka oombwanawa yena, yo ye dhi simaneke. Okwa londodha aagundjuka mboka aahokanathani ashike inaya pewa omagano gomoondjokana opo ya inekele Omuwa aluhe  noku dhiginina egalikano moonkalamwenyo dhawo.

Aagundjuka oyendji oyali ya holoka opo ya kundathane iinima ya pamba uukriste nonkene yena oku yanda iilonga iiwinayi noku kondjitha omamakelo nomutondi. Naftal Amutoko okwa yelitha kutya mohungi yawo omwali muna iinyangadhalwa oyindji oshowo iipopiwa ya pamba onkalathano. 

“ Otwa li twa yi moshipopiwa kombinga yoondjokana mono aagundjuka yali ya londodhwa nokulombwelwa kutya ondjokana oyo omagano gaza ku Kalunga mwene, onkene ihadhi lolwa nenge wu ninge omashendjo nondjokana uuna wa hala okuhokana shi ninga lela nomutima no nomwenyo goye aguhe,” Amutoko ta ti nga. Amutoko okwa holola euvonayi lye “oongundu odhindji inadhi holoka nande momwaalu omunene, aagundjika oyendji oya shuna monima komatompelo inaa ga tseyika, nonande twa kala mohungi yetu muno omwali muna omashongo ogendji ngono twa kala tatu ga yanda,” tati ngaaka.

Okwa holola kutya aagundjuka oyendji oya kala taya piyaganeke ohungi ndjoka mbono yamwe ya konekiwa yazi pomahala gomanwino, ta holola kutya osha li oshidhigu kuyo petameko oku tsikila niipopiwa mbyoka yali tayi tungu ashike konima oyeke shi pondola  sho ya yanda omashongo ngoka geya adha. Oya li ya notheleko omiya dhashinana ndhoka dheya noku tulapo elandulathano mbala. Aagundjuka mbaka manga inaaya kwata ela lyondjila oyali ya kala melongeloKalunga megongalo lyaShigambo moka, Twahangana na Matukila kemanya yali ya gandja omagano ogendji kegongalo ndika. Oya pandula ayehe mboka yali ya gongala noku topolelathana ayihe mbyoka ya ningwapo. 

LEAVE A REPLY

Please enter your comment!
Please enter your name here