Mofikola King Kauluma mwa hangwa eeboma

0
246

Komutoolinghundana

ONGWEDIVA – Eenduba deeboma da  panga da fudama koshi yedu okudja pefimbo loita yekondjelomanguluko, natango onghee tadi twikile nokufudulwa, oshinima osho sha nyika oshiponga neenghono.

Oshivike eshi, ongudu  yovanambelewa vopolifi yoshitukulwa shokuhada mo eeboma oshivike eshi oya telulula eeboma da kala  koshi yedu oule weedula dihapu. Eboma edi ode lituwa moluumbo loKing Kauluma Combined School. 

Omunambelewa  omukulunhu woshitukulwa shokutelulula eeboma mopolifi Petrus Nepunda okwa holola  kutya, konyala omatanga aeshe ovakwaita  a li haa i kolwoodi keembinga da yooloka, okwa deulilwa moshitukulwa shaShikoto sha tofwa mo shi kale onhele yowina yomadeulilo ovakwaita. Patomhelo eli, eeboma dihapu oda fudikwa peenhele da yooloka nopeenhele dimwe, opa lwilwa omalwoodi. Ofikola yaKing Kauluma Combined School, oya tungwa momudingililo wonhele yomadeulilo ovakwaita. Okudja petoto lofikola, omwaalu wovanafikola poKing Kauluma, owa enda nokutana  meendelelo fiyo 578 okudja popre- grade  fiyo ondodo onhimulongo. Ofikola otai pumbwa ku tamununwa mo ku wedwe omabloka amwe nongulu yomakonaakoneno.

King Kauluma, oya dikwa monhele ya li yoita muyadi eeboma nosha tula omiyenyo  yovanafikola novahongi moupyakadi, onghee ewilikonongelo lofikola ola tokola ku ifana opolifi  ihade mo eeboma da ninga efimbo da fudama. Omunambelewa wopolifi  koshitukulwa shetelululo leeboma moshitukulwa shopolifi yaShikoto, Petrus Nepunda ota ti, opo oilonga yetelulo leeboma i twikile otaku pumbiwa oshimaliwa shokulongifwa metelululo leeboma poKing Kauluma.

Nepunda okwa weda po kutya, moule woivike ivali ovanambelewa  vopolifi ova kala ve lipyakidila  nokufukula mo eeboma noitopifa yomaludi ya longwa moSouth Africa.

Omunambelewa omukwateli komesho woshitukulwa shetelulo leeboma ta weda po vali ta ti, oilonga yetelululo leeboma oya taalela omashongo omaludi omumbwe yomatuwa okweenda mefululu okufika komikunda kuyadi eenduba deeboma da fudama ngaashi koAndoni, Hakadjulu, Amalyanga notashi pula oule womafiku 60 okumana mo eeboma adishe moKing Kauluma amuke.

Nepunda ta ti, omumbwe yoshimaliwa oya etifa ku kalekwe eshikulafano letelululo leeboma shaashi kape na naana oshikefa shoimaliwa yetelulululo leeboma nohaku longifwa oshimaliwa hashi di moshikefa shoku kondjifa oilonga yOmunyonena.  Omangetti omukunda u li moshitukulwa shaShikoto, omwa ongelwa eeboma  12 doludi lweemilimeter 82, da longwa moSouth Africa da teelela ku hanaunwa po, notashi ka dulika ashike ngenge  oushako vomadu ava tava longifwa metelululo ova fiki okudja koWindhoek.

LEAVE A REPLY

Please enter your comment!
Please enter your name here