Omukongi gwoondjamba a shuna koGerman

0
154

KuLoide Jason 

ONGWEDIVA – Omukongi a pyokoka nawa mokukonga oondjamba ngoka ali a tewa oombati nokuehamekwa sha pitilila kokandjambona okwa kala nawa na okwa shuna aniwa koGermany.

Omukongi omuGerman ngoka ali apewa uuthemba wokukala ta kongo iithitukutu moKashana kUukwaluudhi okwa li a monithwa oshiponga  kondjamba sho aniwa ya engene unene mudho omanga inaya lengaalenga.

Omugandji guuyele ku Kundana ngoka ina hala okutumbulwa oshoka kena uuthemba okupopya niikundaneki, okwa ti aakongo mbaka ina ya tala nawa omazililo goondjamba gesiku ndyoka oya yi ashike yuukilila moondjamba sigo yimwe po tayi ya ponokele.

Omukongi nguka pamwe na yakwawo okwali ya ponokelwa kondjamba iiwike iyali yazi ko, na okwali a ningi esiku moshipangelo shopaumwene shaMedi Park mOngwediva, eta tuminwa koshipangelo shopaumwene koWindhoek hoka a ningi omasiku.

Okwa hokololwa kutya omukongi nguka okwali a teka oombati dhokombinga yimwe, ta tauka komulungu noshowo okuteka okasipa kamwe kepepe lyokombinga yimwe.

Ngashingeyi okwa hokololwa nee kutya okwa shuna koshilongo shawo koGerman hoka ayi mOlyomakaya gehuliloshiwike ndika.

Omupopiliko gwoministeli yomudhingoloko niinima yomokuti Romeo Muyunda okwa li a koleke oshiningwanima shika kutya omuyahi nomukongi gwiiyamakuti apyokoka okwali a ponokelwa kondjamba onshona omanga eli muukongo.

Ashike omanga oshiningwanima shika shali inashi holoka, opwali pwa adhika pwa yahwa oompinda ne kaashili paveta ashike mboka ya longo shika ka kwali ya mangwa sigo oompaka.

LEAVE A REPLY

Please enter your comment!
Please enter your name here