Oonkundathana nomuAmbassade gwAagundjuka

0
217

Omutoolinkundana Selma Neshiko okwa ningi oonkundathana oshipala noshipala na Olavi Hangula ngoka oye eli ahogololwa Ominista Ongundjuka yOmatalelopo moSADC noshowo oAmbassada yo NYC yAagundjuka ya Namibia. Mpaka otapa landula oonkundathana dhawo

Selma Neshiko: Ongoye lye, owa valelwa peni, owa kokele peni? Ouna aamwanyoko yangapi  na owa sikola peni?

Olavi Hangula: Ongame Olavi Hangula, omugundjuka gwomimvo 16, nda valelwa moVenduka. Onda kokele mondoolopa ya Khomasdal kohi yeputudho lyaakuluntu yandje ayehe. Ondina aamwameme elongo lyaamati ayehe, yomimvo dhili hetatu. Onda hita osikola poprima ya Van Rhyn nopethimbo ndika ondili moGrade 11 poWindhoek Gymnasium.

Selma Neshiko: Omashongo geni wa tsakaneka nonkene we ga taaguluka?

Olavi Hangula: Onda tsakaneka aantu oohandimwe mboka ya talandje nondhino unene okutala uukuluntu wandje okuyeleka noshinakugwanithwa shoka ndina.Okuya ulukila kutya oya puka osha kwatha ndje ethimbo kehe. Onda longitha ehala kehe nompito kehe oku ulukila uuyuni kutya shoka sha simana kashishi oomvula dhoye ndele osho ekoko nenge uukokele moondunge dhomuntu.Aantu olundji ohaya kambadhala oku kushuna pevi moku ku etela omadhiladhilo omiinayi, ndele shika ina shi pumbwa okukupiyaganeka, ndele shoka sha pumbiwa ooshoka kutya omuntu owuna okukala wa thikama mwaashoka wa itaala, nomwaashoka hashi ku pe enyanyu esiku kehe.

Selma Neshiko: Olye nenge oolye mboka ya kala ye kulilepo molweendo lwoye, nenge ye ku kwa tha opo wu adhe omuthika mpoka wu li nena?

Olavi Hangula: Aakuluntu yandje pwaana omalimbililo oya kalele ndje po. Mbaka oya putudha, nokukokeka ndje, noku longa ndje evuliko momukalo omwaanawa ngoka gu liko. Oya yambidhidha ndje mehogololo kehe okuza kwaandyoka lyotango sigo okwaa ndika ndina nena. 

Ondi shishi kutya otaya tsikile oku yambidhidha ndje metokolo kehe tandi ningi nenge tandi ka ninga monakuyiwa.Ofamili nookuume wo oya kumike ndje ethimbo alihe naashika osha pendje etompelo nehalo opo ndi tsikile no inandi ya uvitha nayi omolweinekelo lyawo mungame.

Selma Neshiko: Oto dhiladhila wu kale peni nopomuthika guni omimvo ntano komeho?

Olavi Hangula: Moomvula ntano okuza nena otandi kala moUnivesiti, noshikwawo otandi kala natango meyakulo  lyoshigwana shandje pamukalo gulwe nenge gwontumba omanga tandi manitha elongo lyandje.

Selma Neshiko:Oshike hashi ku kumike wu tsikile komeho na oshike hashi ku teya omukumo? 

Olavi Hangula: Ngame omuntu  ndu udha oonkondo. Etsomukumo nekumiko oha yi kwatha ndje ndi tsikile nokuya komeho.Ohandi konakona nokutala mpoka ndili nokumona shoka shapumbwa okulundululwa. Na ohandi katuka onkatu mokulongitha shoka ndina opo ndi etepo elunduluko mwaashoka shapumbwa okulundululwa. Shoka hashi teya ndje omukumo iinima mbyoka itaandi vulu okulundulula , kutya nee ondi kambadhale ngiini, ohashi ehameke ndje okumona kutya shika otashi kala ngaaka molwashoka kandina oonkondo okushilundulula.

 

Selma Neshiko: Omalunduluko geni wa hala  okweeta monkalamwenyo yoye  nomoshilongo?

Olavi Hangula: Onda hala lela okukala omuntu eli nawa mukehe shoka tandi longo, nomolwashoka  kakuna omuntu eli nawa lela lela, omuntu oto vulu okuninga wuli nawa ngaashi tashi vulika. 

Onda hala okumona  kutya moshilongo shandje omawi gaantu ohaga uvika nokulila kwawo ohaku tulwa miilonga nenge omaindilo gawo otaga monenwa omayamukulo omawanawa notaga mbilipalele aantu.

Aantu mboka ye na oonkondo dhokutokola oyena okuulikila oshigwana kutya otaya vulu oku ya pa omayakulo ngoka naashoka sha pumbiwa.Omakemo ogendji ohaga gwile momakutsi gathita, uuna pweya elunduluko sho omakutsi ngoka taga thituluka nokuuvako nena otapa holoka elunduluko , nonkalamwenyo yomuNamibia kehe otayi ka kala hwepo ndele uuna omukithi gwokwaatseya sha gwapangwa nenge gwa kuthwapo..

Selma Neshiko: Etumwalaka lini wu nine aagundjuka mboka taya kambadhala oku adha sha?

Olavi Hangula: Otandi ya lombwele ya kale noondjodhi ya yagume oondjodhi oonene nenge ya kale nomathaneko omanene, oshoka aapopi oya ti ngele oamathaneko goye itage ku tilitha, nena ngoka ka ge shi omanene shagwana. Onkalo yoye yonena hayo tayi utha onakuyiwa yoye, ndjika otayi vulu okuhwepopekwa.Ndele omuntu ngoka ta vulu okuninga shika ongoye awike. Longitha ompito kehe ndjoka to mono, itashi ku ningi sha ngele oto kambadhala, olundji otashi ku fala mesindano. 

Kala kokule nuuwinayi  wenyanyu lyonkalamwenyo oshoka ndika otali ku yonagula, olundji ito shi dhimbulula mbala , ihe esiku limwe shika otashi ke ku galukila notashi vulika ethimbo li ka kale lya pwapo, onkene okukeelela oku vule okupanga.

Selma Neshiko:Oshike nenge olye he ku kumike nomolwashike?

Olavi Hangula: Otashi vulika tandi popi omupopyofano , kutya , itaku ka enda we omuntu kombanda yevi ndika ngaashi Nelson Mandela. Okwa ulikile ndje kutya aantu otashi vulika ya kambadhale oku kuhanagulapo, ndele uuna wa sindana noku yanda ehanagulo ndyoka, iikonene ina yi kala shimwe shomiilalakanenwa yoye, oshoka ngele owe shi ningi nena shika otashi ku landula sigo aluhe. 

Etameko epe nepandja epe otali eta enyanyu  ndele uuna ashike shika sha kalekwapo.Pamwe naye aawiliki ngaashi Sam Nujoma, Andimba Toivo ya Toivo, Hifekepunye Pohamba na Hage Geingob, aantu mboka haya longo iilongo kehe  okutala kutya aantu yawo oya nyanyukwa noyuuvite ombili. 

Ohaya kondjele yalwe omanga inaa yi itala yoyene, onkene uuthiga mboka taya thigipo otandi ke wu nyanyukilwa aluhe.

LEAVE A REPLY

Please enter your comment!
Please enter your name here