Ovalihongi momuhandjo kOnkumbula ova kondekwa komashongo

0
174

Komutoolinghundana

ONGWEDIVA – Onkumbula Combined School oimwe yomeefikola da shita mokati kofuka da kondekwa komashongo omaludi mahapu  ashike nande ongaho, ofikola ei oyo imwe yomeefikola  hadi piti nawa moshitukulwa shaShikoto.  

Odula ya dja ko,  ovahongwa 99 mokati kovahongwa vakwao 120 va li mondodo onhimulongo, ova hanga oshishonekwa sheepelesenta 60 okuya kondodo onhi-11.

Olomakaya ladjako Oministeli  yoshikondo shomauyelele, omakwatafano  noutekenika, Joel Kaapanda, oya holola eudonai layo kombinga yonghalo yii momuhandjo wofikola wa tungwa po kovakwashiwana poNkumbula. Onkumbula  omukunda u li moshikandjohoololo shaKankolo moshitukulwa shaShikoto oya li ya talelwa po koministeli fiku  loshivilo sheyandjo lomapole kwaava va longa nawa moshikandjolongo fiku yo kwa yeululwa oshungo yaMTC.

Ofikola oya kondekwa  komashongo omaludi  a kwatela mo omumbwe  yeenhele dokudja, omolwaasho ovanafikola 45 vali hava ende oshikako sheekilometa di dule pomulongo okuya nokwaluka kofikola moshikandjohoololo eshi, ova  idililwa momuhandjo. Omuhandjo owa tungwa po konima yeedula di dule omulongo, pakwafelo loshimaliwa sha yandjwa kepangelo laLibya.

Ovalihongi kave  na eembete onghee ohava nangala komitala dihe na omatalashe,  vo ohave li koshele poluhaela, nohave liyakulile moundjuwo vavali va tungwa po koshi yeshikulafano lElelo loshitukulwa lokutunga   oundjuwo  komikunda. Oikulya yovalihongi momuhandjo, ohai telekelwa pongalangala. 

Mokulitalela ko konghalo i li ngaha, oministeli Kaapanda  oya holola onya yayo  konghalo iheli nawa yovalihongi moNkumbula Combined School. Ashike nande ve li monghalo ihe li pandodo youndjolowele, Kaapanda okwa pandula eenghendabala dofikola eshi ya yambula po edina loshitukulwa shaShikoto, te i tu omukumo i longe noudiinini. Ta udaneke kutya efano a mona ote li hepaululile  Oministeli yoshikondo shEhongo.

Elelo loshitukulwa ola nangeka ovayakuli hava futwa kombelewa oyo yelelo loshitukulwa. Molwa omumbwe yomeva, ovapashukili ava ohava  nangala moundjuwo ovo ihava longo.

LEAVE A REPLY

Please enter your comment!
Please enter your name here