Aailongi moAlgeria kaya uvite ombili

0
149

KuAlbertina Nakale

WINDHOEK- Aailongi aaNamibia mboka taya ilongo moAlgeria oya lundile ehangano lyokugandja iimaliwa yomikuli dhokwiilongitha Namibia Student Financial Assistance Fund (NSFAF) kutya olya ndopa , sho ihaali ya tumine oshimaliwa shawo shokomwedhi kehe pethimbo.

Aalongwa mbaka oya popi mo-emaila ya monika ku Kundana oshiwike shika kutya ngashingeyi sho tuu NSFAF a ningi olutu lwiithikamena, nduka olwa kala itaalu gwanithapo we iinakugwanithwa yalwo yopashimaliwa kombinga yaalongwa.

 Onkalo yatya ngaaka aalongwa oya ti otayi naipike onkalamwenyo yawo nayi unene tuu sho mbaka taya ilongo moshilongo oshikwiilongo.

“Ohatu tuminwa iimaliwa yomondjato omwedhi kehe, na oya li yena okutu tumina iimaliwa yetu mu Desemba omumvo gwayi ndele oya kala taya undulile shika komeho noku tu pa omaipopilo  sigo omuFebuluali nuumvo.Oshiketha shika oshishi kutya opo iimaliwa yithike kutse moAlgeria ohashi kwata iiwike itatu sigo ine. Shika otashi ti tse katwa li tuna oshimaliwa konyala uule woomwedhi ne,” osho aailongi mbaka ya ti.

Pahapu dhawo sho NSFAF eya tumine iimaliwa kuyele nuumvo omwaalu gwawo ogwa li gwa shunithwa pevi.

  “Sho twa pula, NSFAF oye tu lombwele kutya yo oya li ya tuma iimaliwa ayihe. Ihe nando okukuthwe iifuta yetaambathano lyiimaliwa pokati ka Namibia na Algeria , omwaalu ngoka gwa kuthwako itagu kala omunene gwa fa ngoka gwa kuthwa kiimaliwa yetu,’ osho aalongwa mboka yuuvite nayi ya popi, no inaaya ulika kutya iimaliwa yithike peni ya tuminwa  nenge haya tuminwa omwedhi kehe. Oshikwawo mbaka oya ti aniwa NSFAF okwa ndopa oku ya kwathela okuningulula oopassporta dhawo molwashoka Namibia kena mo ombelewa yoembasy moAlgeria.  “Katuna mo ombelewa yuukaleliposhilongo moAlgeria, nuuna oopassporta dhetu dha kwishi NSFAF okwa li hetu landele uutekete opo tu ye kegumbo oku ningulula oopassporta oompe, ndele oshinima shika osha hulithwapo inaatu shi tegelela tse ishewe inatu tseyithilwa.Shi twe yapula, oya ti otuna okutumina oopassporta dhetu koEgipiti opo dhi ka ningululwe, ihe mboka ya tumine oopassporta dhawo hoka adhihe odha kana, okuningulula oombapila moAlgeria oshinima oshidhigu, naasho twa galukile kuNSFAF opo andola yetu kwathe oyati oopassporta iinima yopaumwene na NSFAF kena sho te shingi,’osho aalongwa ya ti.

Aalongwa oya ti NSFAF anuwa okwa li a uvaneke okushangela kUuministeli wIikwapondje opo aakwanezimo lyawo ya vule okuningula oopassporta dhawo ndele shika kashina shoka sha kwatha.

LEAVE A REPLY

Please enter your comment!
Please enter your name here