Imwe yovaChina yateywa vali

0
343

KuHelvy Shaanika

ONGWEDIVA – Opolifi mOshitukulwa shaHangwena oi li mokashoko tai kongo eengangala odo deli teela mokafitola kovaChina nokulaima ovakainhu ovo hava longo mo komilungu, komaoko nokumaulu, ndele tava faduka po noilandifomwa noimaliwa keemuma.

Oshiningwanima eshi osha ningwa keengulasha dokupendukila Omaandaxa oshivike eshi komukunda Onheleiwa mOshitukulwa shaMusati.

Nonande Onheleiwa oi li kOmusati, palandulafano letonatelo lopolifi, omukunda ou oha u tonatelwa kopolifi yaHangwena.

Kouyelele ou wa yandjwa kuKakukutu omutivali mokukomanda omatanga opolifi kOshitukulwa shaHangwena Deputy Komishina Abner Agas, ovalumenhu veli vane va homata, ove li teela mokafitola kovaChina nokutilifa ovanailonga ndele tave va mange nokuva umba mofitola.

Konima ova tameka okulongela oinima mofitola oyo ya kwatela mo eenghaku ousola panel, okafiya kokuteleka, noimaliwa keemuma ifike poN$6000.

Agas ta ti, nonande oshiningwa nima eshi osha ningwa pokati ko03h00 no04h00 yokeengula, eengangala edi oda li da etwa mo kopolifi, shaashi ovanailonga ova dula oku li mangulula, ndele tava faduka po nokuka lopotela opolifi diva. Eshi va mona kutya ota va hale okukwatwa ova tameka tava ekeleshi oinima kooshimwe nooshimwe moluxwa, ndele tava londo mokatuwa kafa onhata oko ka shingwa ka yuka kombinga yaShikuku.

Agas ta ti ihapu yomoinima oyo va vaka oya monika, kakele ashike koimaliwa. Pefimbo opo oshiningwanima eshi sha ningwa oovene vofitola, hano ovaChina kava li po pofitola, opa li ashike ovanailonga.

LEAVE A REPLY

Please enter your comment!
Please enter your name here