Shokonawa a talelepo egongalo lyAnglican mOmuthiya

0
319

KuMaria Namupala

OMUTHIYA –  Omutondoki dhingi moshilongo ngono a tseyika nawa nedhina Simon Gabriel Shokonawa, Osoondaha ya ziko okwa li a talelepo egongalo lya Monika Omuyapuki mOmuthiya.

Elongelo Kalunga olya li lya kalwa kaaleli yoondondo dha yoolokathana. Omupevi Minista gwOmidhingoloko nomatalelepo Pohamba Shifeta, Ngoloneya gwaShikoto Penda ya Ndakolo ngono a lesha noku fatulula oshipopiwa shomukadhi gwoshilongo ngoka ali ena okuholoka a uve pamwe naakriste mpoka ashike omolwa iinakugwanithwa yimwe ina vula okuthika.

 Kansela gwaMuthiya Armas Amukoto naye okwali a kala pelongeloKalunga mpoka pegongalo lya Anglican. Aaleli yopamuthigululwakalo nayo oyali ya holoka, aakwanegongalo lya Elcin,aasita oshowo aauvithi yaza komagongalo ga yoolokathana nayo oya li ya kala mpoka pOmuthiya.

Osheendo sha Shokonawa osha li shi li pamwe naanangeshefa mboka haya yambidhidha aluhe Shokonawa uuna tayi mokumatuka kwe. “Elalakano lyetu okuya megongalo muno nena otwa hala okugongela oshimaliwa opo ongeleka ndjika yi tungululwe pamuthika goshinanena ngaashi etumwalaka lyazi komukulukadhi gwotango moshilongo, Penehupifo Pohamba, ngono ali a pula ndje opo ndi yambidhidhe metungo lyongeleka ndjika,” Shokonawa ta ti ngaaka.

Okwa gwedha po kutya yo oya hala ongeleka ndjoka ompe tayi tungwa ando yi tamekwe momvula tayi ya yo yi kale tayi gwana aantu ayehe , ta holola kutya aakwanegongalo yamwe oha ya uvile pondje oshoka anuwa ongeleka onshona unene na oya pumbwa oku opalekwa.

Shokonawa okwa ti oya dhiladhila taya ka galukila kegongalo ndika lya Anglican nomitse ominene dhepangelo, yo ya ye ishewe moondjato ya gwedhepo poshimaliwa shono sha gongelwapo ngaashingeyi.

Esiku olyo tuu ndyoka aantu oyendji oyali ya gandja iimaliwa opo ongeleka ndjika yi tamekwe okutungwa mbala ngaashi tashi vulika. 

Ofamili ya Mwiila ndjono tayi wilike oongeshefa dhElao oya gandja ooN$ 7500, Omunyekadhi gwoshilongo meme Penehupifo Pohamba okwa gandja N$10 000, Armas Amukwiyu naye okwa gandja N$2500, Ngoloneya gwaShikoto N$1000,Armas Amukoto N$1500, elelo lyopamuthigululwakalo lyaMuthiya olya gandja N$1300 oshowo ongombe ndjono itaayi kokowe.

Shokonawa okwali woo a ende pamwe nomukuluntu gwoshipangelo Engela Eva-Lisa Hango,aasita yoo Fillepus Hainane gwokegongalo Onekwaya,John Shivute gwokOshali, Junias Nghitewapo naasita woo oyendji yomuyo oyali ya gandja oshimaliwa esiku ndyoka. 

Omusita gwegongalo ndika Selma Mbandi- Shafudah okwa ti egongelo lyoshimaliwa ndika olya enda nawa lela, tati esiku ndyoka oya gongele oshimaliwa shooN$50 950,ongombe, oshikombo, oolata dhiilya oyindji,omatanga oshowo omanyangwa.

Omutondoki dhingi okwa pandula ooyene yoongeshefa mbono haye mu yambidhidha teya indile ya tsikile nokushininga. 

“Onda tokola opo ndi gandje sha moshigwana oshoka olundji oha shi kwatha ndje uuna tandi yi molweendo lwandje, otwa dhiladhila tu galukile kegongalo ndika mu Novomba tse tuye tu gongele lwa hugunina yo ya wape ya tule miilonga etungo ndika lyongeleka,” Shokonawa tati ngaa. 

Okwa pandula aakalimo yomOmuthiya sho ya gandja elongelokumwe no yi imangulula kiilonga yawo ya uve pamwe naye, ta pandula woo ayehe mboka ya yambidhidha egongalo ndika lya Anglican.

LEAVE A REPLY

Please enter your comment!
Please enter your name here