A yashwa eshi a hangwa ta vake 

0
205

KuHelvy Shaanika 

ONGWEDIVA – Omulumenhu umwe oku li mOshipangelo shaShakati eli monghalo ta i limbilike omanga vavali veli konima yekumba, konima eshi va hangelelwa veli teela mokandingosho ke li pokati kOshakati nOngwediva. 

Otaku hokololwa kutya elao ola kanduka po po ovalumenhu ava vatatu eshi va hangelelwa ta va teya onduda yomalandifilo poundingosho vopOlulongo.

Ouyelele oo wa yandjwa ku Kakukutu kOmatanga Opolifi mOshitukulwa shaShana Komishina Ndahangwapo Kashihakumwa, ovalumenhu ava ova monika tava teya nokuya mokandingosho oko kovakwashiwana. 

Kashihakumwa ta holola kutya eengangala edi oda ninga omupya shaashi ovakwashiwana ova dengela opolifi meendelelo nookalyamupombo ava ova shakena nopolifi manga ashike vali tava kendabala okudja mo mokandingosho omo, konima yokuteya.

Eshi va kanghamekwa kopolifi umwe womuvo oo a li a homata ombele okwa kendabala oku li shitilila, osho sha etifa opo umwe womovapolifi elipule kutya pamwe okwa homata ondjebo, oyo pamwe a li ta kendabala oku umba nayo ovapolifi.

Onghee hano omupolifi umwe okwa patulula omundilo, ta yashe omufekelwa ou metundji lokolulyo, noholo oya ka mbadukila mokuulu kwokolumosho. 

“Omupolifi okwa li ena okuumba shaashi oikulumuna aishe oyo ya lopotwa omafiku aa ya nyika omunyeka, ovanhu ova homata ashike eendjebo. 

Nena omupolifi oku na ashike okulipula kutya pamwe omunhu ota kufile ovapolifi ondjebo,” Kashihakumwa ta ti.

Otaku hokololwa kutya ovafekelwa ava aveshe ovadja pomudingonoko womukunda Akuna oo uli popepi nOlulongo.

Uumwe woomwaava ongangala idjuu oyo paife ya hangika opo ye lifutile mo modolongo, noina oshibofa shomunyeka kwa homatiwa tashi twikile momhangu.

Kashihakumwa ta hokolola kutya opolifi otai fekele  kutya ovalumenhu ava vatatu ovo vamwe vomeengangala odo da li deliteela meumbo lovakwashiwana ovaIndia kOndangwa omafiku natango oshivike eshi.

Otaku hokololwa kutya ovalumenhu va homata eendjebo ovali veli teela meumbo lovanangeshefa ovaIndia tava pula opo va pewe oimaliwa.

Mupya munene, ovanangeshefa ava iha va kala noimaliwa meumbo, omolwaasho eengangala oda dula ashike oku faduka po neengodi dopeke, noimaliwa keemuma i fike poN$200. “Omukalo ngaho oo va longa mokunyeka Ovaindia oo naana ou wa longifwa kOlulongo. Otu wete kutya vamwe vomovalumenhu ava ovo ashike va teya kOndangwa.

Oshiningwanima shokOndangwa osha ningwa okupendukila Osoondaxa omanga shopOlulongo okupendukila Etivali loshivike eshi, novafekelwa otaku ti ove li pokati keedula 20 fiyo 30. 

LEAVE A REPLY

Please enter your comment!
Please enter your name here