Natu kalekiipo ombili yoshilongo shetu

0
210

ONAYENA – Omunashipundi gwongundu yoDTA moshitopolwa shaHangwena, Hidipo Hamata okwali a ningile aakalimo yomOhangwena oshigongi pehulilo lyomwedhi gwaziko mono yali ya kundathana kombinga yongundu ndjika nonkene yena okwiihumbata pethimbo lyiikonga yomahogololo.

Hamata okwa indile iilyo yongundu ndjika yi ikaleke kokule niinima iiwinayi, yo ya yande omatukano oshowo omutyanayi kiilyo yoongundu dhimwe.

Oshigongi shino oshali moshikandjohogololo Ohangwena, konyala aagundjuka oyendji oyali ya gongala moshigongi moka noya kundathana nawa. Oshali woo sha kalwa kaantu yaza komikunda dha yoolokathana mOhangwena.

Aakwashigongi oyali ya kumikwa kaa ya longithe nande omalaka ga honga pethimbo lyomahogololo. “Otandi indile tu kalekiipo ombili nelandulathano moshilongo shetu, natu yandeni ombepo yuutondwe maakwashigwana yetu opo tu kale moshilongo shetu twa manguluka, uuna oshilongo shaana ombili kashishi oshinima oshiwanawa oshoka kapuna we ngo ta tungu nena kehe gumwe ota teya owala,” Hamata ta ti ngaaka.

Okwa gwedhako kutya ongundu yawo oya longekidha opo mu kale muna aantu yeli ya hamano mboka taya kala nokutalelapo iikandjohogololo yomOhangwena  yo ya tale nkene ehumokomeho tali ende moshitopolwa noku tala nkene aantu taya hupu momikunda dhawo. Ta ti ongundu yo DTA  oyi ilongekidhila omahogololo pwaana nenge uudhigu washa , yo oya hala unene okukondjitha onkalo yoluhepo.

Hamata okwa ti wo ongundu yawo otayi kambadhala opo kehe omugundjuka eli moshitopolwa a kale ena iilonga yo ya vule okuyambulapo omikunda.

Okwa uvaneke  taya ka adha yimwe yomiilalakanenwa yawo mbala, yo taya kandulapo omikundu ndhoka aakwashigwana ya taalela.

Aagundjuka oyendji mboka yali ya holoka koshigongi moku uva kutya DTA otaka kandulapo omukundu gwokwaahena iilonga mokati kaagundjuka oyali ya nyanyukwa unene, noku tameka taya imbi omaimbilo gongundu ndjoka.

“ Natu kalekiipo ombili yoshilongo shetu, tse tatu shi yambulapo paliko otandi indile aagundjuka oyo ya kale taya lele oshilongo shika oshoka konyala aagundjuka oyo ehukamugongo lyoshilongo uuna twaa yena nena katuna mpoka tatu uka nonakuyiwa otayi kala ya toka noya tsima,” Hamata ta londodha ngaaka.

Okwa uvaneke ongundu yawo tayi ka gandja omakwatho ku kehe ngoka eli mompumbwe yo tayi yambulapo onkalo momikunda nokukwatha wo aakulupe mbono taya mono iihuna.

Ta indile aantu ya pangelwe kombili nohole yuumwayinathana pethimbo ndika aantu ya taalela omahogololo,Ta ti oshilongo shaNamibia osha kehe gumwe ehole ombili nelandulathano onkee nashi kalekwepo mombepo ombwaanawa.

KuMaria Namupala

LEAVE A REPLY

Please enter your comment!
Please enter your name here