Neudo, ovanyasha vomOshana, va teya omahangu mahapu

0
200

ONGWEDIVA – Eshi pa totwa ewiliko lipe lolutu oluwiliki lovanysha moshitukulwa shaShana, ola tula moilonga omafaneko okuyakula ovanyasha. Edi oda tumbulwa komunashipundi wOshana Youth Forum Ephraim Nekongo pefimbo leenghundafana noshifo Kundana.

Pamukalo wokweeta oukumwe movanyasha nokupalamena eemhumbwe davo, eshi va pewa oshinhenga shomutamo weehecta 61 moshikandjohoololo shaMpundja, neudo ova teya eeshako domahangu 36  deekilograma 50 kwa wedwa oshako imwe yoilyavala. Okudja eshi va pewa N$10 000 koNational Youth council, ovanyasha ova tula odalate koshinhenga  shavo nande kaya li ya wana. Naashi va ka pewa oimaliwa kOshana Regional Council, ova shakenifa odalate kepya leehecta 61.

Nekongo ta twikile ko ta ti, eteyo ola dja moupenda eshi ovanyasha vomOshana ova pululifa ombakumbaku yepangelo oshinhenga. Ombakumbaku oya kuna ofimbo ovanyasha va ka ninga oshitemo opo va helele mo oilya momwiidi.

Ovanyasha vomOshana kave na ashike oshikunino shimwe, ndee ope na yoo  shokoKaku shedina Albertina Shilikomwenyo shi li kEloolo. Ovanyasha vokOkatyali ova longa noudiinini eshi va tunga ombelewa yovanyasha moshitukulwa noyoshikandjohoololo, hava file eefiye oshisho naashi va eta po. Kakele ovanyasha koshikandjohoololo shaKatana kuna epya nomeva otava li onyalo. Oprojeja yokutunga eumbo lomufyuululwakalo longushu N$20 000 inai xula molwa omatomheno onhumba.

Nekongo ota ti, ovanyasha ova faneka ku ninga oyoongalele va pukululafane nokutwaafana omukumo kwaayo tai va kame. Pefimbo loshoongalele ove na kupukulula ovo inava hala ku longa. Onghee Nekongo ota tu ovanyasha omukumo va kwate komesho moilonga mewiliko lovakulunhu. Ta weda po ta ti,  vanyasha inamu tya vali epangelo itali longo, shapo tamekeni  oilonga  nyee mu ka indile kepangelo. Moshitukulwa shaShana omu na ongudu yovanyahsa ve fike pe100 vehe na oilonga, ashike eshi ovanyasha va pewa oshimaliwa sheemiliyuna N$2.5 koSocial Security, otava ka tunga ombelewa kepya kOmpundja nokukuta  moilonga ovanyasha veli 20.

Komutoolinghundana

LEAVE A REPLY

Please enter your comment!
Please enter your name here