Omulongo gwomoseko ya Haimbili Haufiku ya vala Miss na Mr Eenhana Expo 2014

0
390

EENHANA – Aalongwa yaali poseko yaHaimbili Haufiku moshitopolwa sha Hangwena oye shi pondola okusindana po iikoloni niishani yomukadhona dhingi oshowo shomumati dhingi pehullilo lyomauliko gIipindi nIikwafabulika gopEenhana oshiwike shayi.

Julia Nghifikwa gwomimvo 17 oye a sindanapo oshishani shomukadhona dhingi nenge sha Miss Eenhana Expo 2014 poshiithanene shaningilwe Olyomakaya ga ziko moshilando shoka. Oshiithanene shokuhogolola omukadhona dhingi nomumati kamana ohashi nyanyudha aatali yasho.

Miss Eenhana okwa pewa omagano ogendji mwakatelwa notiivi ompe , oka ipod noshihampi shikwamagadhi niikwathewa. Julia Nghifikwa okuli mongundu 12 nuumvo.

Paulina Moses (16) eli mograde 10 poseko ya  Gabriel Taapopi okweya pehala lyuukombanda  wotango omanga  Albertina Ndjubila (17) gwokoseko ya Mwadikange Kaulinge oye omukombanda omutiyali ye oye ishewe a pewa esimaneko lyomuntu gwombepo ombwaanawa.

Omukadhona ngoka ho opala momathano oye Evangeline Ashiyala gwomenongelo lyuungomba lyomEenhana. Omukombanda gwotango okwa pewa oshihampi shomagano giikwamagadhi niimumamuthi ya gandjwa kEenhana Green Pharmacy, ndjoka oyo ya gandja iikwamagadhi ayihe mbyoka ya pewa heke gumwe a sindana methigathano ndika. Go omagano ngaka oga kuthamo oodola omayovi gahamano mondjato yEenhana Green Pharmacy.Ehangano lyo Litu Investments olyo lya kwashilipaleke otiivii noshowo uu iPods auhe mboka wa sindanwa methigathano ndyoka.

Oshishani shomumati dhingi momauliko Mr Eenhana Expo 2014 osha kuthwapo ku Johannes Kanyemba aza koseko ya Haimbili Haufiku, ye ta landulwa kaakombanda gwotango Reuben Shivute na Paulus Lukas ayehe yomendiki lyuungomba lyomEenhana, mboka kehe gumwe a pewa  oka  iPod.

Omupopiliko gwa Miss Eenhana Expo, Paullo Shilongo okwa ti oshiningwanima shika shokomumvo , osha kalelapo oshilando shika , shomaluhwa gaziza pomuthika gwopashitopolwa noshowo pwaangoka gwopaigwana, onkene Omukadhona dhingi otaka pewa oshinakugwanithwa shoku tseyitha noku humitha komeho iinyangadhalwa yoshilando shoka apehe mpoka nguka te kiinyenga.

“Otwa hala okupandula aakwashilipaleki yetu ayehe ya simana molwashoka ya tondoka onkugo yetu noku tu joina moshinyangadhalwa shika. Oshilongekidhwa shika otashi koko nokunenepala meendelelo ,” osho Shilongo a ti.

Pethimbo lyokukala koshipundi shuu Miss Eenhana Expo 2014 Nghifikwa otaka talelapo nokukumika aanona monkalamwenyo yaashi ompu momanongelo gomoshitopolwa Ohangwena.

Nghifikwa okwa ti okwa hala okukuthombinga mokumodelinga neitulemo manga kombinga yimwe ta landula eilongo lyopaithano moUnivesiti ya Namibia nenge moPolytechnic.Mr-and-Miss-Eenhana-Expo-2014

“Elalakano lyandje okuninga omukiintu, omuneithano moshilongo omanga wo tandi kuthombinga mokumodelinga  ongo eithano lyopakathimbo. Uuwanawa waa na ondunge yasha itawu longo, onkene otuna okuulika kutya tse otuna oondunge ongo oomodela,’ osho a ti.

Omukombanda gwotango, Paulina Moses a za moseko ya Gabriel Taapopi ngoka wo a li a nyanyukwa  okwa ti oondjodhi dhe otadhi ende tadhi ningi dhoshili, oshoka okwa li wo a ulikwa ongo omukombanda omutiyali methigathano lyotonamende ya Kapuka nuumvo ndjoka ya li ya kwashilipalekwa ku Namib Mills. “Oondjodhi dhandje otadhi tsu na onda tegamena kutya ngele onda piti ograde 12 niitsa iiwanawa , otandi kaya ko

univesiti, nokonima otandi ka landula oondjodhi dhandje pomuthika gwopombanda,’ osho a uvaneke.

KuClemence Tashaya

 

LEAVE A REPLY

Please enter your comment!
Please enter your name here