Omuthika gwoluvalo noshowo omaso moNamibia gwa tseyithwa

0
343

Namibia okuna omuthika gwoluvalo gu li pevi muAfrica kohi yombuga ya Sahara. Uuyelele mbuka owuli momushangwahokololo  kombinga Yoluvalo nOmaso moNamibia ngoka gwa ngongwa po kOlutu lwOmiyalu lwa Namibia omasiku ngaka. Omushangwahokololo nguka ogwa tseyithilwe kOmukulukadhi gwOmuperesidende, Meme Penehupifo Pohamba moVenduka oshiwike shayi.

Omushangwahokololo ogwa ulike kutya omuthika gwoluvalo moshilongo , kokutya omwaalu gwaanona mboka omukiintu omuNamibia a tegelelwa okuvala muule wonkalamwenyo ye , ogwa kala nokuuka pevi uule womimvo omilongo mbali dha piti.

Nonando oluvalo otalu shuna pevi ngaaka omushangwahokololo ogwa ti  okushuna pevi hoka okuli natango pombanda yomwaalu gwopokati ngoka gwa pumbiwa okupingenapo omapipi ngoka taga hulupo.Ogwa ti omatengeneko miitopolwa oga ulike kutya opena omuthika guli pombanda moluvalo miitopolwa yokomikunda oshowo miikandjohogololo yokuushayi. Oshikwawo omushangwahokololo ogwa ulike kutya oluvalo oluli pombanda mokati kaakwashigwana aagundjuka moNamibia.

Omushangwa ogwa mono kutya omuthika gwElongo, gwondjokana noshowo gwiilonga oguna enwethemo enene metokolo lyaakiintu kutya oya hala okumona uunona nenge ahawe. Aakiintu ya hokanwa oyena egamo lyokumona uunona owindji okuyeleka naamboka inaa ya hokanwa. Ishewe aakiintu mboka yena uulongelwe wuli pombanda oye na egamo lyokuvala aanona yomwaalu omushona. Omushangwa ogwa tsikile gwa ti aakiintu yomomagumbo, aakiintu mboka ihaaya longo, aakiintu mboka yeli muunamapya wokuhupa ashike oshowo aaniilonga mofamilia mboka ihaaya futwa oyena oluvalo luli pombanda.

Okutala kwaashoka sha monika, omushangwahokololo nguka otagu ulike kutya oshishonekwa shoku shonopeka omuthika gwoluvalo moNamibia sigo opaanona 3,5 megumbo nenge komukiintu gumwe, okuya komumvo 2015 ngaashi sha thanekwa mOmulandu gwomwaalu gwAantu moNamibia inashi pumbiwa we okutulwa miilonga, oshoka omuthika gwoluvalo ogwa tsikila okuya pevi  gwogwene, gwa ya kohi yomwaalu ngoka gwa tengenekwa.

Omushangwahokololo gweso kombinga onkwawo otagu tu tseyithile kombinga yomaso moshigwana. Onkalamwenyo moNamibia okuza kevalo oyo omimvo 53,3 kaalumentu, nomimvo 60,5 kaakiintu omanga omwaalu gwoomvula dhopokati ndhoka ayehe ya tegelelwa okukala nomwenyo okuza kesiku lyevalo oyo omimvo 56,8. Opwa li ehwepopalo monkalamwenyo uule womimvo ntano okuza keyalulo lyuuwindji waantu lyomumvo 2001, sho aantu ya kala taya si konima yokukala nomwenyo konyala omimvo 52.Shika otashi ti aantu otaya kala nomwenyo omimvo odhindji okuyeleka nomumvo 2001.

Okusa okwa yooloka oshitopolwa noshitopolwa oshowo miilando nomahala gokomikunda. Okukala nomwenyo miilando okuvule okukala nomwenyo komikunda nomimvo dhili hamano. Ishewe eso nuukolele woohandimwe ohawu nwethwamo komimvo dhe, kuukashike kookantu kwe, koshitopolwa moka a kala oshowo uukwatya wulwe wopankalathano. Oshiholelwa uuna ooyina yaanona yena uulongelwe wuli pombanda mbuka owa kwatakanithwa noompito dhili pombanda dhokuhupa  nomwenyo kwaanona. Ishewe aakiintu mboka aaselekadhi nenge ya hengwa oshowo ya topoka nomahewa gawo oya ulike ya kanitha oyana keso yomwaalu omunene. Sho ya pulwa kombinga yiiyeti yeso oyendji oya ulike kutya osheeti osho uuvu, mboka owo weeta eso miiningwanima yooperesenda 75 dhomaso agehe.Omaso mokati kaalumentu oga etwa kiiponga , komaidhipago noshowo komadhipago.

Omaso galwe ngoka giigalala mokati kaakiintu oge na sha noshinima shuumeme, ngaashi pethimbo lyokupulumutha nosho tuu. Uukokele wa yina owu na ekwatathano neso lyomunona. Kokutya pamwenyo okuvala uunona pomimvo dhuugundjuka unene nenge momimvo dhuukokele okwa nika oshiponga paukolele na oshina ekwatathano neso lili pombanda mokati kaakiintu aagundjuka noshowo mboka ya koka.

 

Omushangwa ogwa ti osha pumbiwa okushitumbula kutya ongushu yonkalamwenyo otayi hwepopala. Ihe nando ongaaka oshigwana natango otashi yugwa uuhanona, uunona noshowo aakuluntu oyendji keso.Omishangwahokololo ndhika otadhi adhika poombelewa oonene dhOlutu lwOmiyalu lwaNamibia moVenduka nenge pepandja lyalwo mo internet, mpoka ngoye to vulu oku ikuthilamo okopi, po: www.nsa.org.na.

Omishangwa ndhika otadhi tu pe euveko lili hwepo kombinga yoluvalo neso moshilongo. Oshowo otadhi kwathele mokutengeneka ekoko momwaalu gwoshigwana monakuyiwa, otadhi ulikile epangelo konkalo yoluvalo neso , noshowo ngele oshigwana otashi ivala tuu shoshene okupingenapo omapipi ngoka taga hulupo nomapipi omashona nongeyi tashi ikalekepo omimvo nomimvo.

KuIipumbu Sakaria

 

 

LEAVE A REPLY

Please enter your comment!
Please enter your name here