Otatu indile ehulithopo lyomaumbathano moGaza

0
203

 

O

shiwike shayi Kundana okwa nyanyangidhile omushangwa kundaneki gwa puka.Gwomondjila otagu landula mpaka.

Kundana, ota joina oshimwayinafonkundana, New Era, mokupangula embomo lya Kaposi kayaalela  nedhipago lyaanuuge lyaningilwa aakiintu , aanona naakwashigwana inaa ya yonasha, miitopolwa ya Palestina mwakwatelwa naashoka sha Gaza.Nonando   Israel okuna uuthemba okwiipopila kiiponokela nokomahomono goorocketa tadhi zi mo Palestina, aaPalestina oyena uuthemba , mboka wa simana oomboka wokukala nomwenyo monkalamwenyo yuuntu wu li nawa.

Kundana, noshimwayinafo New Era, otaya zimine kutya Israel nakalepo ongo oshilongo shaana uuhwenge nuutile kutya otashi hindwa nenge otashi tilithwa okuza koshigwana shimwe , koshilongo nenge kaantu yontumba.Otatu endulula eyambidhidho enene lyepangelo lyetu ndyoka tali yambidhidha uuthemba waantu yaPalestina oku utha onakuyiwa yawo yene nokudhikapo oshilongo shawo shamanguluka. Iigwana mbika iyali ayihe oyina uuthemba okukalapo yi li iishiinda, yamanguluka  na otayi ipangele yoyene pwaana uutile kutya otayi hindwa okuza pontumba nenge okutilithwa.

Onkene Palestine na Israel naya uve eigidho lyOraata yEgameno yIigwana Hangano ndyoka tali indile omaumbathano moGaza ga hulepo. Epangelo lya Namibia olili mondjila sho lya joina omaindilo giilongo ya yooloka mwakwatelwa okomittee yOominista dhiilyolongo mehangano lyiilongo yeyokomeho lyuumbugantu wAfrica [Southern Africa Development Community] molutu lwelongelokumwe mopolitika, Egameno nEpopilo ,osho wo omahangano gopaigwana ga indile iishiindalongo mbika iyali yi tulepo ombili pokati kayo.

Eeno oshoshili ngaashi Okomittee yOominista dho SADC ya  popile poshigongi shayo omwedhi gwayi moSwakopmund, kutya oyina omaipulo omanene kutya uuyuni owa talako ashike sho Israel iininga amamudhimbo  sho ta longitha ominkondo dha pitilila moPalestina nomoshitopolwa sha Gaza. Naashika osha kunu eso , emono lyiihuna lyaakwashigwana yaPalestina, oyendji yomuyo aakiintu, aanona naakulupe.

Tse otatu pangula nokugandja uusama keumbo nembomo tali ningwa kaakwiita yIsrael lyaana ontondo okuza kevi mombanda nomefuta nokudhipaga aakwashigwana yaana ondjo omathele.

Otatu yambidhidha ontokolwa yOlutu lUuthemba womuntu lwIigwana Hangano yomasiku 23 Juli 2014 ndjoka ya indile opo  pu ningwe ekonakono lyiithikamena kombinga yomiyonena ndhoka dha longwelwa aakwashigwana moGaza kaakwiita yaIsrael. Mbyoka tashi vulika yi kale eyonagulo lyooveta dhuuntu nodhopaigwana.

Otatu yambidhidha shinene  notwa thikama konima yepangelo lya Namibia mokupangula eyonagulo lyoshiningilewina noolyana kayoya  lya hanagulapo omagumbo , oomosque, naandika olya fala momadhipago gaakwashigwana mokati kaamboka muna aalumentu aakokele , aakiintu naanona.Otatu koleke kutya tse katuna esiku natu yambidhidha nenge okuzimina ekwatombambyona oshowo edhipago lyaantu yaana ondjo tali ningwa koombinga ndhoka mbali.

LEAVE A REPLY

Please enter your comment!
Please enter your name here