Ebola kemo moNamibia … Nompito ya Ebola okuya moNamibia oshona shona

0
185

Ompito kutya omukithi gwoEbola otashi vulika gu taandele sigo okoNamibia oshona shona, nongele shoka osha ningwa otashi kakala ashike  shimwe oshishona noshi ikalekelwa.Onkene , Kundana okwa hala okushipopya shuukilila kutya aantu mboka taya taandeleke omahokololo kutya moshilongo omwa monika ebola naya hulithepo  omahokololo ngoka gaana uushili washa sigo oompaka.MoNamibia ka mwali oshiningwanima shoEbola sigo oompaka. Eeno opwa li oshiningwanima shoka sha li sha fekelwa ongo ebola sho omuyakuli gumwe gwomiilonga yoondhila dho Air Namibia a li a dhiladhila kutya omuntu gumwe ngoka ena oallegi yoohi okuna ngiika ebola.Ndele nani omuniilonga nguka okwa li a puka mokuninga ngaaka oshoka kali ena uuyelele womondjila.

 Omatseyitho nomatokolo guuhasha gatya ngaaka inaga pumbwa okuningwa.Ina shi pumbiwa oku eta uumbanda mokati kaantu. Oshoka shika osha tameka oku tilitha aatalelipo moshilongo shetu, molwaashike omahokololo giifundja ngoka. Aatalelipo yopaigwana mboka haya talelepo muka pethimbo ndika  nokweetamo iiyemo oyindji koongeshefa noshowo iifendela mondjato yepangelo oyendji oya ti ita ye ya ko we manga okutalelapo oshoka anuwa okuna ebola, ngoka ta popiwa ashike momatumwalaka gaana uushili washa.

Okutilitha aatalelipo mbaka otaku gumu oonkalamwenyo dhaantu oyendji  mboka iilonga yawo tayi ka gumwa oshowo oonkalamwenyo dhaamboka ya ikwatelela kaaniilonga mboka. 

Oshikondo shUundjolowele sha Namibia  osha kwashilipaleke kutya sigo oompaka moNamibia inamu monika omuntu ena uuvu woebola. Ishewe owa koleke kutya wo owa langela komauta uule wootundi dhesiku alihe oshiwike ashihe omwedhi kehe oku tala kutya moshilongo itamu etwa uuvu mbuka inaawu monikilapo. Shika otashi kala ngaaka molwashoka aantu mboka haya ende okuza kiilongo mbyoka yi na uuvu mbuka ohaya pitile tango mo South Africa po puupale woshilongo shoka opena omashina gokupupa uupyu okutala mboka tashi vulika yena uuvu wo ebola omanga mbaka inaa ya tsikila okuya koNamibia.  Mboka taya ende niihauto olundji otaya pitile poongamba dha Shikango, hoka oko kwategelelwa  ku ziilile omukithi nguka molwashoka iilongo hoka guli oya gama kuumbangalantu nininginino. Omolwashika Uuministeli wUundjolowele owa tula eshina lyokutala uupyu pomweelo gwopoongamba gwa Shikango. 

Okugwedhapo ehangano Federation of Namibian Tourism Association, olya ti  iiningwanima yomukithi nguka oya ndhindhilikwa kiilongo yokuuninginino waAfrica unene moNigeria, Liberia, Guinea  na Sierra Leone. Namibia kena oongamba niilongo mbika pa kaalita oshowo iishiindalongo yetu.Oshinano pokati ketu niilongo mbyoka ngaashi Guinea na Namibia osho ookilometa 4,657.  Nando ongaaka Uuministeli wUundjolowele owa tseyitha kutya owa langela komatati ethimbo alihe unene puupitilo wopoongamba dhoshilongo ashihe hapuupale woondhila auke. Ongundu yokulala ya tonata mUuminsteli mbuka oyi li komalwilo na oya tulapo nale omalongekidho kutya ngele ebola okwa thiki muka pamukalo gwontumba nenge gwongandi ita ka taandela nuupu.

Pethimbo ndika shoka ndjika tayi ningi osho okutala kutya omukithi nguka itagu iyakelemo muka inaagu monika.Ishewe aanambelewa yuuministeli oyi ilongekidha okukonakona ehokololo kehe kombinga yoshiningwanima kehe sha fa shuuvu mboka. Ndele osha pumbiwa omitoto dhi hulithwepo alikana ngaashi tashi vulika.  Aantu ayehe mboka yeli moshiponga shoku kwata kuuvu mbuka ngele andola owu holoke ngaashi  aaniilonga yuundjolowele, oonganga dhopashigwana, aaopaleki noshowo aaniilonga mooambulansa otaya ka dheulwa  nkene taya longo , ngele uuvu mbuka owu ye mo moshilongo.  Euvithoko lyopankalathano olya nkondopekwa. Uuministeli owi ikalekela oflura ayihe moshipangelo sha Central osaal ohamano kuuzilo opo yi kale ehala lyoku ikalekelwa mboka tashi vulika yena uuvu wo ebola ngele mbuka owa holokele muka. Ishewe euvithoko nonkalo yuupathi otayi tsikile yaana ezimbuko.  Uuministeli otawu indile oshigwana opo shaa haluke .Onkene Namibia ongo ehala lyokutalelwapo olya egulukila natango kehe omuntu ngoka a hala okuya a talelepo muka. 

LEAVE A REPLY

Please enter your comment!
Please enter your name here