Geingob a talelepo oshitopolwa shaShikoto

0
204

ONYAANYA –  Metine lyoshiwike shaziko  omuulikwahogololwa guuperesidente gwongundu  yoSWAPO omundohotola, Hage Geingob okwa li a talelepo oshitopolwa shaShikoto netalelopo ndika olya li lya ningilwa pombelewa yo Swapo moshikandjohogololo Onyaanya.

Metalelepo lye Geingob okwa li a tsakanene naaleli yomoshitopolwa Oshikoto yomongundu ompangeli, noya li ya kundathana iikundathanwa ya pamba ehumokomeho moshilongo.

Poshigongi opwali pwa kalwa kuNgoloneya gwaShikoto, Penda ya Ndakolo, Minista yOonakulwa Aakulu omundohotola Nicky Iyambo, ookansela yomiikandjohogololo ayihe  moshitopolwa Oshikoto, oshowo aawiliki yalwe yongundu tayi pangele.

Omundohotola Geingob  okwa ti elalakano okutalelapo Oshikoto okwa hala a uve omashongo ngoka ga taalela aantu oshowo okwa yamukula omapulo gamwepo ngono aantu ya kala noku pula. Geingob okwati konyala okwa li a talelepo iitopolwa ayihe moshitopolwa shoka kwali hashi ithanwa Owambo nale moka  a li a ningi iigongi naawiliki yoSwapo. Geingob ngoka tegelelwa a ka kutheko oshipundi shuuperesindente konima yomahogololo mu Novomba nuumvo okwa uvaneke ta ka longa nuudhiginini. “ otatu ka longeleni kumwe uuna nda hogololwa opo mu ulukilendje oosikola ndhono dhina uunona hawu longelwa kohi yomiti opo dhi tungwe wo wu kale tawu mono elongo ewanawa oshoka uunona owo oongudhi dhoshilongo shika, ulukiliindje uupangelo mbono ihaawu longo nenge wuli monkalo ombwinayi opo wu opalekwe,” Geingob tati ngaa.

Omupopiliko gwaanangeshefa Banda Shilimela naye okwa uvaneke kutya yo ongaanangeshefa oyi ilongekidha okuhogolola Geingob, ta ti omake gawo ogendji oga landula Geingob, nokuli a halelela unene omahogololo ga thike opo ya ulike ehogololo lyawo.

Shilimela okwa tsu aanangeshefa omukumo opo ya longe nuudhiginini yo ya  kale ya tula ongeshefa komutima opo ya yambulepo Namibia paliko. Okwa indile woo epangelo li totepo endiki mono tamu vulu okudheulwa noku nongekwa aanangeshefa opo ya mone uunongo wumwe wa pamba ongeshefa.

Oshigongi oshali sha mwenyekwa nomaimbilo goSwapo na gamwe taga tanga omundohotola Geingob, aakwashigwana oya li ya nyanyukwa noonkondo okutsakanena nomundohotola noku kundathana naye oshoka yamwe oyali ya mono ompito yokupula omapulo etaga yamukulwa ethimbo ndyoka.

KuMaria Namupala

LEAVE A REPLY

Please enter your comment!
Please enter your name here