Iizalomwa iipe yospana Red Warriors yonuumvo

0
135

Katima Mulilo – Ospana onkulu yetanga lyokoompadhi moshitopolwa sha Zambezi moliha ya Zambezi Football League, yedhina Red Warriors oya pewa omagano pethimbo ewanawa sho ya mbendekwa omizalo dhuudhano dhongushu yoodola omayovi gaheyali. 

Omagano ngaka ga pewa ospana ndjika konyala popepi ashike netameko lyomumvo omupe guudhano oga zi kehangano lyaatseyiveta lya Kwala  and Company Incorporated.

Omizalo odha gandjwa kehangano ndyoka ongo oshitopolwa shalyo okugandja sha koshigwana moshinakugwanithwa shalyo shopankalathano. Ehangano ndika hali longele moVenduka olya uvaneke tali ka tsikila noku yambidhidha ospana ndjika oomvula ndatu tadhi landula.

Omukalelipo gwehangano Munembo Munembo, okwa ti oya tokola okuyambidhidha  ospana ndjika oshoka oya mono kutya oyina eitulemo enene muudhano wetanga lyokoompadhi . 

“Tse otwa tungu uukuume wa kola nospana ndjika ndele otwa kala wo tu shishi kutya oya pumbwa eyambidhidho, onkene otweya mpaka oku yi yambidhidha.Kwala nehangano lyayakwawo okwa kumikwa kospana ndjika sho ya tsikila neitulemo okuyambulapo uudhano moshitopolwa shika,’Munembo a ulike.

Kombinga ye omuwiliki gwospana ndjoka yo Red Warriors , Elliots Kakona okwa pandula noonkondo  omolwa omagano ngoka na okwa indile omahangano gamwe gomoshitopolwa moka opo ga kwathele omaudhano opo ga yambukepo.

 “Otwa hala okupandula Kwala and Company omolwekwashilipaleko ndika.Tse otatu ke li sila nawa oshimpwiyu noku tala kutya otali tu fala pomuthika omupe gwopombanda,” Kakona ta uvaneke.

Ospana yo Red Warriors oya totwapo omumvo 1971 pomukunda Musanga, kuuzilo wondoolopa ya Katima Mulilo.Aadhani aakulu yospana ndjika mboka yeli momwenyo natango omwa kwatelwa Matengu Sakutiya, Nkwamba Museta na Barthromew Kambinda.

KuGeorge Sanzila

LEAVE A REPLY

Please enter your comment!
Please enter your name here