Omeya otaga pwine, go ngoka gomumvo gwaziko ogo natango onzo yokunwa momukunda nguka

0
211

ONTANA – Nonando omapangelo giilongo yAfrica oga li ga shaina eigidho lya   eThekwini , mundyoka ga uvaneke taga ka longitha konyala ooperesenda 0.5% dhiilikolwa ayihe  yomoshilongo (GDP) okuyogopeka nokukalekapo uuyogoki womeya , oshowo oku ikalekela omiyalu thaneko dhiimaliwa ya nuninwa okutala ngele oshinakugwanithwa shika osha longwa. Osha fa ogendji gomwaangaka muumbugantu wa Africa gandopa moshinakugwanithwa shika sigo oompaka, pahapu dhehangano lyedhina WaterAid.

Onkalo yompumbwe yomeya ngaashi ndjoka ya li yi na okukondjithwa okupitila meuvaneko lyiikwatelela keigidho lya eThikwini otayi adhika momukunda Ontana moshikandjohogololo Eengodi moshitopolwa Oshikoto, moka  aanamukunda yamo natango haya nu omeya gomvula ndjoka ya lokele omuloka gwa zako, nando ngaka otaga monika gena oonguwi no ngiika itaga vulu okunuwa kaantu.

Ngele owu li kokule  oshilambo shoka muna omeya ngoka osha fa ondama yopaushitwe, sigo uuna wa thiki popepi opo to dhimbulula shoka wa tala. Kutya nani osho  oshilambo sha li sha fulwapo pethimbo ondjila yongalama yuuka momakuti gomuuzilo ya li tayi tungwa.Mushika omo mwa kuthilwe omamanya gokutula kongalama ndjoka opo yi kale inaayi nika evi unene oshowo yaakale niilambo oyindji.

Aakalimo ngaashi Joseph Kayambu 28 ohaya hupu mokulongitha omeya ngoka ga ninga omaziza kashona ngashingeyi omolwa onguwi ndjoka yi igongela kombanda yago. Kayambu naanamukunda ooyakwawo ohaya longitha ngaka esiku kehe momagumbo gawo ngaashi okutelekitha, okunwa nokwiiyoga.Omvula oya sheka ethimbo konyala ele lyapitipo ngashingeyi ihe natango omeya ngaka ga ninga omaziza oge na oshilonga kaanamukunda mbaka molwashoka ogo ageke onzo yomanamwenyo momudhingoloko gwayo.

 “Ohatu longitha omeya ngaka okutelekitha iikulya yetu, okunwa ngele twa sa enota, nokwiiyoga wo, aanamukunda oyendji ohaya teke mpaka,” osho omunamimvo 28 Kayambu a hokolola, ngoka oye a li noshinakugwanithwa shoku teka omeya  gegumbo lyaantu yeli yahetatu esiku ndyoka.

 Oondongi hetatu odha li dha tegelela neidhidhimiko okuhumbata kehe yimwe endi lyoomilitela 500, omuntu oto ndhindhilike kutya ndhika odha dheulwa lela na odhi igilila okulonga iilonga mbika.

Oyendji yomaakalimo mUumbugantu wAfrica ohaya mwenya kohi yekondjo lyaanehulilo okukondjitha oluhepo luuyogoki oshowo lwompumbwe yomeya, pamushangwahokololo ngoka opo gwa piti tagu pe omapangelo gomoshitopolwa shika oombedhi sho inaa ga ninga egandjo lyomeya nuuyogoki oshinima sha simana okulongwa meendelelo.

 “Omeya ngaka inaa ga yogoka gomvula yayi ogo natango onzo yomeya koyendji yomOntana sigo uuna ga piwinepo muNovemba” osho Kayambu a tsikile nokuhokolola. Kayambu oha teke podama ndjika konyala esiku kehe.   Sho omeya ga yela taga ende taga pwine  na oshaninga oshidhigu oku ga mona , aanamukunda oha ye ya kodama ndjika opo ya teke  omeya ngaka nonando itaga monika ga yela.

Nando oonkambadhala dhopashigwana nopaigwana odha ningwa  kombinga yompumbwe yokulongitha oshimaliwa , okulonga aantu opo ya longithe omeya ga yela , osha fa momahala gamwe natango okunwa omeya ga yela shi li natango oshinima inaashi adhika.

Aakalimo yomomukunda nguka otaku tiwa ohaya ka teka moomboola uuna omeya gomoshilambo muka ga pwinepo. Oshikwawo ooshika kutya omeya ngaka ogo wo ishewe haga nuwa kiinamwneyo. 

Pahapu dhOmbaanga yUuyuni ooperesenda 88% dhomavu muuyuni tuu putuka  ohaga etwa kokulongitha omeya gaana uundjolowele.Omeya ga luudha oga humbata oombuto dhomavu ga yooloka, dha zi moonyata dhaantu nomomapumba  giinamwenyo , dho ndhika ohadhi vulu oku eta iimela nosho tuu. Ooparasite dhomaludhi ga yooloka ohadhi adhika wo momeya ga luudha.

Ishewe uuna nee wa tala kutya odama ndjika oyili pooha dhopate, nena omuntu ito tseya nawa kutya aalongithi yondjila ndjika ohaya umbilemo shike momeya moka uuna taya pitipo. 

Oshishi okutalika noku ipulwa nawa kutya ompumbwe yomeya gayela noge shi okunuwa otayi vulu okutula omutenge omudhigu palongitho lyoshimaliwa komapepe gomahupilo goshilongo, nongaaka otaga hunyameke ekoko  lyomahupilo. 

Konyala omwaalu gwaantu oomiliona 174 yomoshigwana shOmuumbugantu wAfrica , kokutya iititatu iyali yomwaalu gwaakalimo miilongo mbyoka kayena uundjugo mboka wa nathangwa, omanga yevule paantu oomiliona 100 oye li menota lyomeya gayela noga yogoka. Otaku tengenekwa kutya aanona omayovi 120 kohi yomimvo ntano ohaya si omumvo kehe kiimela yakwatathana nonkalo yokunwa omeya inaaga yogoka oshowo nonkalo yaana uuyogoki.

Onkene osha yela kutya omahupilo giilongo opo tayi putuka otaga kala ogo natango ga hugunina oku mona iihuna omolwa ompumbwe yomeya  omawanawa notaga vulu okupita pothingo yomunamwenyo.

Onkene oonkatu tadhi vulu oku katukwa opo eshongo ndika li kandulwepo omwa kwatelwa ndjoka yoku indjipaleka elongitho lyoshimaliwa mekalekepo oshowo megandjo lyomeya gayogoka okunuwa oshowo ewiliko lyoonzo dhomeya palongelokumwe lyiigwana muuyuni.

*Noreen Sitali omulongwa guutoolinkundana moPolytechnic ya Namibia.

Caption (Pic: Water Dirty One, Two, Three, Four, Five.jpg):

KuNoreen Sitali

LEAVE A REPLY

Please enter your comment!
Please enter your name here