Omutaleli gwelongo a pakwa pOnyaanya

0
277

ONYAANYA –  Ngono ali nale Omutaleli gwelongo gwoshikandjolongo Onankali nokwali a mana oondjenda dhe  momasiku gaali (2) gomwedhi okwa fumvikwa pegongalo lyaandjawo Onyaanya ehuliloshiwike lya ziko. 

Nakusa Taimi Mushelenga Kamati okwa kala konyala oomwedhi omulongo moshipangelo konima sho a li a mono oshiponga sho osheenditho she sha li sha pumwa keshina lyokolutenda  mu Kotoba omumvogu.

Pethimbo oshiponga sha ningwa meme Taimi Mushelenga – kamati okwali ta ka gandja oshipopiwa poshituthidhimbulutho shomulongi gwomoshikandjolongo she. Okwali a kuthwapo mbala noku falwa koshipangelo kOnandjokwe, hono a lundululilwa  kOshakati nokonima okwa falwa kOvenduka hono oko a kala ta mono epango sigo eso lye.

Meme Taimi okwa tseyika nawa koyendji melongo mono a longa ethimbo lyuule woomvula 29. 

Okwali a ehamekwa noonkondo oshoka okuza pesiku lyoshiponga kali ha popi sigo osho a hulitha.Mu Mai omumvo gwayi okwali a yelwa nokwa ningwa omutaleli gwelongo moshikandjolongo Onankali.

Metine lyoshiwike shaziko okwali a ningilwa oshituthidhimbulutho shono sha ningilwa pOnankali. Aalongi, aanaskola oshowo aataleli oyali ya kala poshituthidhimbulutho sha meme Taimi noku holola uukwawo wanankali naakwanezimo.

Gumwe gomaataleli yelongo Nicky Uugwanga gwoshikandjolongo Oshigambo okwa hokolola Taimi ali ena oonkondo ye ha simaneke aluhe iilonga ye. “ otwa kanitha ependa, kuume ketu miilonga nokuli omunambili kehe thimbo okuna enyanyu koshipala, nani oshili sho aluhe ha ku tiwa oshiyuma oshiwanawa ihashi kalele ooo otatu lili kuume ketu, he tu kwatha aluhe miilonga yetu ashike otu wete kutya oshagwana,” Uugwanga tati ngaaka.

Peya Mushelelga ngono eli gumwe gwomaamwayina ya nakusa okwa ti  oya kanitha omuhungimwenyo nomugandjimayele ngono a tekulile uunona we etiloKalunga oshowo esimaneko lyaakuluntu. 

Okwa tekula uunona we nawa nokuwu longa waa halilile iinima yaantu, wu gwanenwe aluhe kwaashoka wuna.

 Pefumviko lya meme Taimi opwali pwa kalwa kaakwanepangelo yoondondo dha yoolokathana , aaleli yopamuthigululwakalo, aasita, aatalelisikola oshowo aalongi. 

Oyali ya hokolola Taimi onga omuntu gwomwenyo omwaanawa ngono kee hole iinima iiwinayi. Okwali a pakwa pegongalo lyawo pOnyaanya Olyomakaya gaziko.

Meme Taimi okwa hulitha mepipi lyomimvo omilongo ntano nayimwe (51), okwa thigiko omuholike gwe Timoteus Kamati,aamwayina yatano(5) oshowo oyana yatatu (3).

KuMaria Namupala

LEAVE A REPLY

Please enter your comment!
Please enter your name here