Ongundu yolwiimbwo Matukila Kemanya Lyehupitho onkene ta yi pula komeho

0
407

WINDHOEK-Ongundu yolwiimbo yedhina Matukila Kemanya Lyehupitho Choir ya pititha oalubuma yawo ontintano tayi ithanwa “Pama Meitavelo” ndjono yina omayimbilo gopambepo geli omulongo nagaali nomaimbilo gawo oye ga kwatela koNBC moVenduka.

Oalubuma ndjino oyina omaimbilo nga haga dhana onkandangala metumwalaka neuvitho lya kola lilimo ngaashi Pama Meitavelo, Muuyuni mbu tuli oku tumbulapo ashike gamwe. Ongundu yolwiimbo ndjika ohayi imbi omaimbilo gopambepo nelalakano lyo ku uvitha elaka etoye lyaKalunga, omaimbilo gayo oga konekiwa gena iitya mbyono hayi gumu aapulakeni komitima noya hwameka oyendji ye ye popepi noohapu dhaKalunga. Ongundu ndjika oya sindana omapapa ogendji momathigathano goondjimbo ga yoolokathana moshilongo.

Kakele koku imba ohaya talelepo woo aanuvu osho wo oku imba miituthi yomaludhi agehe unene mbyoka ya guma iilyo yongundu yawo. Oyina omalakano ogendji okuninga nonande monena oshimaliwa osho hashi kala endangalati enene mondjila yokuya komeho, oya hala nokuli oku imonena osheenditho shayo yene opo yi wape okukala yamanguluka nomalweendo gayo.

Moku tulakumwe alubuma ndjino oyali nee ya kwathelwa kuTate Andreas Nuule omuwiliki gwoongeshefa dhOkashandja, Solar naBlue Note ngono ali eya futile iifuta yokukwatitha omawi  gawo.

Nando yaadha onkatu  ndjika  onkene natango yapumbwa omayambidhidho ngaashi omizalo nosho tuu.

Konima sho yali ya totwa mo1990 kuTate Villy yAngula ngono a tetekela ngashingeyi ongundu ndjika oya koko sigo opiilyo yi vule 50 mono muna Omuwiliki omukuluntu Tate Gebs Amutenya, omugandjimayele Junias Angula, aawiliki Jakobina Ambinga naMiika Amupolo, omwiimbithi omukuluntu Tate Matheus Amutoko,amushanga Beta Joel oshowo omudhiginini gwiiniwe Teopolina Mukongo nosho tuu aayimbi yapyokoka yaakuluntu naagundjuka mboka ayehe konyala yaza kevi lyiimpungu noyendji oyeli moshilandopangelo omolwa etemo.

Tate Mathews Amutoko ngono akala oshilyo shongundu uule woomvula 12 otati  “Onkene twa pumbwa iilyo oyindji opo ongundu ndjika yi koke, iha tu ningi omapulapulo nenge tu hogolole iilyo mbyoka twa hala ashike oha tu taamba kehe ngoka ena ehalo oku uvitha elaka etoye oku pitila moondjimbo pamwe natse, oha futu ashike uukwashilyo (100) no ha tumu pe wo onzapo ndjoka tayi kwashilipaleke kutya ye oshilyo ye wo okuna ekwatathano niinyangadhalwa yopambepo nonande keli megongalo, ohandi pandula wo ewiliko lyongundu sho hali tulele nawa opo tu ye komeho”.

Okacd hano oke niwe kiilyo ashike ngu eka hala ota vulu eka tuminwe kehe mpoka eli moshilongo, otaka kotha ashike 120.Ongodhi dhayamwe yomiilyo yongundu ngaashi Tate Mathew 0812489229 na Jason Abel 0814151775 otadhi vulu okudhengelwa uuna puna ngo a pumbwa okacd, ena ethigathano lyontumba nenge a hala wo a kwathele ongundu.

Caption: Yamwe yomiilyo yo Matukila Kemanya Lyehupitho Choir

KuPinehas Nakaziko

LEAVE A REPLY

Please enter your comment!
Please enter your name here