Oshana sha hogolola aaulikwa hogololwa yasho mongundu SWAPO

0
229

KuLoide Jason 

ONGWEDIVA-Iitayi ySwapo Party moshitopolwa Oshana oshowo moshitopolwa Ohangwena oya ningile iigongi yayo yiitopolwa oshiwike shayi nokuhogolola aaulikwa hogololwa oshowo aatumwakalelipo mboka taya ka kala moshigongi oshinene shokutulakumwe omusholondondo gwaa ulikwa hogololwa yoSWAPO mboka taya ka ninga iilyo yoParliamende konima yomahogololo gonuumvo.

Oshigongi shoku tothamo aaulikwa hogololwa noshowo okungongapo omusholondondo ngoka osha tegelelwa oku kalako okuuka pehulilo lyomwedhi nguka.

Iigongi mbika yiitayi oya hogolola kehe shimwe aaulikwa hogololwa yaali mboka taya ka tulwa mwaashoka haku tiwa “ombiga” kokutya taya tulwa mumwe nooyakwawo ayehe okuza kiitopolwa ayihe 14 yoshilongo opo mokati kaambaka otamu ka hogololwa ihe aaulikwa hogololwa yeli 72 nenge 100 ngele oveta ndjoka tayi kundathanwa mOshigongi shOpashigwana oyaa adhika ya pita. 

Ndjika oya thaneka okunenepeka iilyo yoshigongi shopashigwana sigo opaatotimpango 100 inaamu kwatelwa yahamano mboka haya ulikwa komutse gwoshilongo omolwa ontseyo yawo miinyangadhalwa yontumba nenge uunongo wawo moshimpungulonga shongandi.

Oshitayi shoSWAPO mOhangwena osha hogolola Daniel Kashikola omunambelewa omukuluntu melelo lyoshitpolwa shoka na Ndilipo Namupala opo ya ka ye mombiga yoSWAPO , pamwe na Andreas Uutoni ngoka omupopiliko gwelelo lyondoolopa ya Ngwediva taya ka kala mehala lyokuhogololwa okuza moshitopolwa Oshana yonomundohotola gUunamiti , Elizabeth Kamati.

Kashikola omunambelewa omukuluntu melelo lyoshitopolw a Ohangwena omanga Namupala omudhiginini gwiiniwe mewawa lyaakiintu moSwapo moshitopolwa osho tuu shoka..

Uutoni kakele kuupopiliko welelo lyoshilando Ongwediva okuli wo Omunambelewa gwomauyelele neHwahwameko gwoSwapo Party moshikandjo Ongwediva,yo Onganga Elizabeth Kamati ondohotola yuunamiti ya tseyika nawa muumbangalantu woshilongo. Iigongi mbika iyali oya li ya kalwa kiilyo yongundu ya za miikandjo ya yooloka miitopolwa mbika iyali mewiliko lyaaleli yopashigwana mboka ya pewa oshinakugwanithwa okutalela iitopolwa mbyoka.

Omahogololo gaaulikwa mbaka oga ningwa mombepo yuuyelele oshowo oga li paudemokoli, noshowo oga landula omulandu gwekalelopo lithike pamwe lyaakiintu naalumentu mongundu. Omahogololo gomoshitopolwa Oshana oga li  kohi yetonatelo lyomunashipundi shaawiliki ya inekelelwa okutalela  oshitopolwa shoka, Saara Kuugongelwa-Amadhila, ngoka a indile aaulikwa opo ya kalekepo omanenedhiladhilo gongundu yoSWAPO guukumwe nokulonga neitulomo nonuudhiginini.

LEAVE A REPLY

Please enter your comment!
Please enter your name here