Ospana yoAfrican Stars ya ningi eindilo lyayo oshiwike shika

0
161

WINDHOEK – Ewiliko lyospana yetanga lyokoompadhi yimwe yaandhoka oonkulu nodha simana metanga lyokoompadhi moKatutura olya manitha uunima uushona wa li wa hupako omanga ndjika inaayi ka tuma eindilo lyayo kolutu lwokuwilika uudhano wetanga lyokoompadhi moNamibia.

African Stars ota indile opo etokolo ndyoka lya ningwa okumu tidhamo momusholondondo gwoospana hadhi dhana mo MTC Namibia Premier League (NPL) uule womimvombali dhuudhano oshowo egeelo okufuta oodola omayovi N$200 000. Etidhomo pakathimbo ndika noshowo egeelo lyokufuta iimaliwa mbyoka olya pewa ospana ndjika ko NPL.

Omunashipundi gwospana yo African Stars Sidney Martin okwa koleke onkundana ndjika a ti ewiliko lyoklaba ye konyala olya mana okugongela iitsa ayihe onkene eindilo lyawo otali kala lya thikithwa kewiliko lyetanga lyokoompadhi kokutya okomittee ndjoka hayi ungaunga nOmaindilo gokutalulula omatokolo gewetike inaaga ningwa nawa yoNamibia Football Association[NFA] nena. 

Martin, okwa ti ospana ye kaya li ya pewa ompito opo yi ete oshikumungu shayo komeho gongundu yokuvulikitha ya NPL, omanga olutu ndoka inaalu ninga etokolo lwalyo, okutidhamo oklaba ndjoka momaudhano. Oshinima shoka Martin okwe shi luku kutya otashi yono oveta ngaashi yi iwetikile. 

Okwa ti ooklaba omulongo  11 ndhoka dha hogolola opo Stars yi tidhwemo muudhano odhe shi ningi shaali paveta, oshoka shampa omumvo guudhano gwa thiki pehulilo nena iimaliwa yuukwashilyo oshowo uuthemba wadho wulwe nawo owa hula ngaaka, onkene mboka kaya li yena oonkondo dha sha paveta okuninga etokolo ndyoka.

Kakele kokutidhwa muudhano uule woomvula mbali dhuudhano ospana ndjika oya pewa wo egeelo okufuta oodola omayovi N$200 000 molwashoka oya nyateke uudhano wetanga lyokoompadhi sho ya li ya ningile NFA, NPL noosipana omulongo 11 iihokolola lwaali mompangu yopashigwana. Oshinima shika NPL okwa ti osho epogolo lyekotampango lya NPL noshowo FIFA ndyoka tali indike opo omahilathano miinima yetanga lyokoompadhi gaa potokononwe okupitila moohofa dhopashigwana.

Omunashipundi gwoStars Martin noshilyo shimwe shewilikongundu lyospana Clint Dauti oya tidhwa wo uule womimvo mbali kaaya kale nekwatathano niinyangadhalwa yo NPL , naambaka otaya ka ninga wo eindilo okukondjitha etidho lyawo tali endele pamwe naandyoka lyospana.

NPL okwa ti egeelo lyofuto yoshimaliwa olina okufutwa miipambu yi iyali, shotango osha tegelelwa okukala sha futwa momasiku 15 Auguste nuumvo noshipambu sha hugunina oshina okufutwa omanga omasiku  15 Septemba, 2014 inaaga thika nenge shi futwe mesiku ndyoka.

KuOtniel Hembapu

LEAVE A REPLY

Please enter your comment!
Please enter your name here