Ya dhana nawa metanga lyomoshimbamba

0
198

OSHAKATI – Amushangandjayi gwongundu  yuudhano waantu yena uulema hayi ithanwa Wheel-Ability Club, Agnes Hausiku,okwa tumbaleke  ospana yedhina Oshana Heroes Sports omolwelongekidho ewanawa ndyoka ya ningi mokulongekidha uudhano waantu yena uulema ehuliloshiwike lya piti mOshakati. 

Muudhano mbuka ospana yaWheel Ability Sports Club ndjoka ya za koVenduka oya li ya sindana oombandi dhoshingoli konima yokudhana methigathano lya hugunina naandjoka yOshana, nokudhengwamo ookoola 23 -7.

 Uudhano mbuka wOshana Regional Championships wa li ko Olyomakaya gapiti owa li uudhano waadhani yena uulema, na owa kalwa koyendji mboka ya kuthombinga momaudhano ga yooloka mokapale kokumatuka nosho tuu, puudhano mbuka opwa ningwa wo mboka wetanga lyobasket ball lyaadhani yeli kuutemba.

Mwaambuka omwa li oospana dhili ne ndhoka dha kuthombinga, kokutya Oshana, Ohangwena, noshowo nee ospana mbali dha Wheel Ability ya A na B. Ndhika mbali odha li dhi itaalele muudhano okuya kedhingoloko lyahugunina, hoka kwali taku dhanwa okudhengwa nokuza mo muudhano.  

Ospana yOshana Heroes oya yi kedhingoloko lyahugunina muudhano mbuka inaayi dhengwa nando osha, nonando uudhano wa hugunina owa li wa kindja. Medhingoloko lya hugunina Oshana Heroes osha tsakanene na Wheel-Ability A,. Muudhano mbuka Oshana osho sha kala komeho niitsa 10-6 pethimbo oospana ndhika dha yi pokafudhopo .Konima yokafudho Wheel-Ability okwa li ashike eshi pondola okutulamo oshitsa shimwe omanga Oshana sha tulamo iitsa 13  nongeyi  oya sindanapo uudhano mboka niitsa 23-7. 

Oshana kasha li sha tegelela okutsakaneka ospana ya kindja ngaaka ihe nando ongaaka oshe shi pondola okusindana. 

“Ondi uvite etumba nuugumbo kombinga yoospana dhandje adhihe 

ndhoka twa yile nadho kOshakati oshoka odha kondjo ekondjo ewaanawa unene tuu Wheel-Ability A ngoka  ayi kethigathano lya hugunina,” Bjorn Magg,omudheuli nguka  ati nokutya Oshana Heroes kasha li sha tegelela okutsakaneka ospana yina eitulemo nomukumo gwatya ngaaka. 

Okwa popi kutya okuna einekelo oku  ka dhenga Oshana Heroes limwe lyomomasiku.

Kapitiya gwospana  Roodly Gowaseb okwa ti  “Uudhano kawa li uupu oshoka aakondjithi yetu oya kola yo ishewe oye na ontseyo oyindji. Tse otwa pumbwa okwoopaleka uunima wontumba ngaashi okushuna mbala konima okugamena okoola yetu, nande ongaaka ospana yetu oya longa nawa lela,’ “

“Otu shishi kutya otuna okutala konakuyiwa, ndele pethimbo ndika otwa pumbwa ehala nenge okonteina moka tatu kala twa pungula uutemba wetu wuudhano mboka twa pewa omagano kehangano lyoParalympic lyOpaigwana, naambuka otawu thiki pehulilo lyomwedhi tuuka,”

Komutoolinkunda

LEAVE A REPLY

Please enter your comment!
Please enter your name here