20/08/14 Slug: Kambo-Omugulu-gombashe Shixungileni oye aeke omukwaita woG1 e li momwenyo kOmutoolinghundana

0
297

ONGWEDIVA – Nonande pa pita omido 48, Simeon Lineekela “Kambo” Shixungileni odalele yaKadiva moshikandjohoololo shaNdobe moshitukulwa shaHangwena, onghee ta tu eendjodi domadeulo oukwaita.

Shixungileni oye umwe womovakwaita vahamano ovo va dja kolupadi koKongwa shaTanzania mo1965, konima yomadeulo opaukwaita koRussia.

Ekufombinga laye mekondjelomanguluko nomolwa okuudifa ko ovanhu oSwapo, ola hepekifa ovashivikile novapopepi naye mwa kwatelwa omukainhu omunyasha oo a li e na eteelelo laShixungileni.

Ta dimbuluka nghene ovakwaita vaSouth West Africa va li tava ningile omukainhu ou omatilifo okutandamo eteelelo neembele.

Omunamido 80 oo paife eli meembete, nota mono ouhaku mOshipangelo shepangelo shaShakati, okwa holola nghee a tameka ouxwi peenhele da yooloka. Okwa tavakana melila kaKanyandi navakwao, va pita mOshakawe va ka londela omaloli koBotswana okuya koJohannesburg shaSouth Africa.  Okwa hokolola vali nghee a longa keefabrika deeshi kOmbaye e li longela  ko opolotika, naashi e ya ku djoina OSWAPO pexulilo leedula do-60  moTsumeb.

Nande e li mepipi loukulunhu, natango ota dimbulukwa nghee a mana okontraka keemina daSouth Africa ina alukila keumbo,  ndele okwa ya moupongekwa pamwe navakwao, va deulwa koRuassia oule wodula netata. Molwa etokolo okumangulula Namibia, osheendo shoG1 sha kwatela mo ovakwaita vahamano, osha enda kolupadi oule weehani hamano okudja mokamba yovakwaita voSWAPO moKongwa shaTanzania, Maalisa 04, 1965. Ovamati ava, ova pita moCaprivi, mOkavango mOwambo, ova fikila mooEliaser Tuhadeleni a shivika nawa nedina Kaxumba kaNdola momukunda Endola neumbo laye ola li onhele yomashakeneno. Ovakwaita ova li neendjebo deePPSH mbali neembistoli mbali da dja koAlgeria. Ova li yoo va homata eembele.

Mosheendo osho sha li mewiliko la komanda John Otto Nankudhu, nomuponhele Patrick Israel Iyambo Lungada, omwali  yoo Simeon Lineekela  Shixungileni “Kambo”, Messah Victory Namuandi, James Hamukuaja Angula “Shoonjeka” naNelson Kavela “Sadrag”. Ovalumenhu ava, ova enda kolupadi oivike ine okudja kOkavango nokufika mEndola.

Eshi Kambo kaShixungileni a mona kutya okwa didilikwa kutya okwa ile kombada, pamwe naPatrick Iyambo Lungada ewiliko loSWAPO ole va tuma va ka longele koshitukulwa shaKalongo nokuudifa ko oshiwana kombinga yekondjelomanguluko, Shixungileni ta hokolola.

“Okamba yotetete yovakaita oya li “Ondaadhi”. Nokonima otwa ka dika Omugulu-gOmbashe, twe i dika muJune 1966. Meekamba edi otwa deulila mo ovakwaita 90 lwaapo,” Shixungileni ta hokolola.

Meenghundafana naKundana, Shixungileni onghee ta dimbuluka oshiponokela shokeengulasha daAugust 26, sha fa ashike opo sha ningwa onghela.

Ta ti, efiku olo okwa hangwa a ka nyanga oikulya yovakwaita momikunda dopopepi eshi eendjebo da tameka okutopa.

Ta hokolola kutya molwoodi omo omwa kwatwa Julius Shilongo “Kashuku”, Philemon Shitilifa, Shinima Niilenge “Harakatyi”, Ndjaula Shinana, Sakeus Filipus, Petrus Simon Niilenge, James Amukuaja, naThomas Haimbodi.

Kambo Shixungileni ta hokolola kutya, paikonene ova ka tomeka osasiona yopolifi yaShikango Sepetemba 27, 1966, nokwaalukila kIiti yeeholo, tave ya okuhondama kOkalonga kaNepaya. Konima yekwate po lakomanda Nankudhu,  Shixungileni okwa kwatela komesho opo nee muMaalisa 1967, okwa yashwa kodila a hangwa ta ende nokutwalwa kodolongo yaPretoria shaSouth Africa, taka pongekwa koRobben Island oko a kala a idililwa kate Kotoba, 18, 1985 eshi va mangululwa.

“Mokufika moNamibia, otwa kala oule wohani modolongo yaWindhoek, opo nawa tu ye mefiloshisho laCCN,” Kambo ta hokolola. MuSeptemba, 21, 1987 okwa hombola Teopolina Shimuningeni. Kambo kaShixungileni  shaMwahanyekange, omitihetatu mokati kovamwaina va li 10, paife ove li po vane. Muxe ova dalwa 40.

LEAVE A REPLY

Please enter your comment!
Please enter your name here