Aatondoki ya Namibia otaya nana nondatu ko YOG

0
195

WINDHOEK – Aamatuki ya Namibia otaya longo nuudhigu okumona omasindano puudhano wopothinge wOlympika Yaagundjuka ndjoka yili metifa moshilando sha Nanjing moChina.

Uudhano mbuka wa tamekele Olyomakaya oshiwike shayi owa tegelelwa wu thike pehulilo momasiku omilongo 28 Auguste nuumvo. Namibia okwa kalelwapo kaamatuki yeli kumwe ayehe omilongo ndatu taya kuthombinga momaudhano ngaashi etanga lyokoompadhi, okuyoga , otennisa, okumatuka, etanga lyokomake lyopomunkulofuta, ogymnastika , okuumba uutati nokukayila oombasikela.

Uudhano mbuka waagundjuka owo uudhano wuna omaludhi guudhano ogendji, na ohawu longekidhwa kOkommittee yOpaigwana yOlympika[IOC]. Ohawu dhanwa konima yomimvo ne kehe, hawu ningi wumwe wa dhanwa pothinge nukwawo wa dhanwa pokufu, sha faathana ashike nuudhano mboka uunene wOlympika yoyene.

Mbuka uudhano uutiyali tawu dhanwa pothinge okuza sho mboka wotango wethimbo ndika wali wa dhanenwa moSingapore omumvo 2010. Okuza Osoondaha aamatuki ya Namibia oya li ya kuthombinga mokukayila oombasikela, okudhana etanga lyopeke lyopomunkulofuta  oshowo etanga lyokoompadhi.

 Mokukayila oombasikela okuholamo yamwe momwaalu, omuhingimbasikela gwa Namibia, Tristan de Lange okwa thiki omutimugoyi maakayili 31, nokwe shipondola okupita aye kedhingoloko lya landulako muudhano waalumentu. Omuyogi  Sonja Adelaar okwe ya gwotango moshinano shoometa 200 medhingoloko lyotango methimbo lyopauahandimwe lyoosekonde 22,55.

Ethimbo lye kalya li lya endela nawa okuyeleka nomathimbo gooyakwawo opo ando a ninge oshitopolwa shaayogi yahetatu mboka yaza momalweetho gane yi itaalele molweetho lwa hugunina. Lushano Lamprecht okwaale  a ye medhingoloko etiyali sho eya pehala etiyali mokuyoga  okayumbu oshinano shoometa ethele methimbo lyoosekonde 58,94.

 Zanre Oberholzer okwe ya pehala etihamano mokuyoga oko tuu hoka kwoshinano shoometa 100. Metiyali okwe ya pehala etiheyali medhingoloko etine lyoshinano shoometa 200.Okwa yogo wo oshinano shoometa omilongo ntano metitatu.

 Aadhani yetanga lyopeke pomunkulofuta  Stephanie Palmhert na Kim Seebach oya kanitha uudhano wawo wotango muudhano 0-2 Osoondaha shono ya dhengwa ku Irene Enzo na Mchela Langignotti yoko Itali.Oya dhengwa wo ishewe iitsa ya faathana Omaandaha ku Megan McNamara na Nicole McNamara yoko Canada.

Metiyali taya dhengwa ishewe sha faathana ku Yekaterina Lassyuta na Anna Pimenova yoko  Kazakhstan. Miizemo yilwe oMaandaha, Pascal Marggraff okwe ya omuti  28 okuza maakayili yoombasikela 31 mokukayila mondjila, omanga metiyali okwe ya omuti 23 mokukayila BMX.

 Shika oshe mu pititha okuya kedhingoloko lyokwotafinala , moka eya puutiheyali, teya puutihamano , oshowo puutiheyali ishewe momalweetho gokuholamo gatatu ngoka a dhana onkene okwa ndopa okupita okukadhana medhingoloko lya hugunina.

Muudhano wotennisa, Lesedi Jacobs okwa kanitha uudhano we nuudhano 1-2 sho adhengwamo ku  Marketa Vondorousova gwoko Czech Republic. Muudhano waakiintu yaali  Jacobs oya longele kumwe na Sandra Samir gwaEgipiti,na oya kanitha uudhano 0-2 ku Camila Giangreco goko Paraguay na Alejandra Gonzalez gwa Ecuador.

aption: Nam Athletes jpg – Tristan De Lange (R) gwa Namibia ta hingi ombasikela pethimbo lyuumbasikela mo Nanjing 2014 puudhano waagundjuka wOlympica moChina.

LEAVE A REPLY

Please enter your comment!
Please enter your name here