Kansela gwoshikandjohogololo Endola a fumvikwa Olyomakaya

0
272

OHALUSHU-Aalumentu oya indilwa yi idhilike okuhepeka aakiintu molupe kehe. Eindilo ndika olya ningwa kOmunashipundi shEgumbo etiyali lyOparliamende, Asser Kapere pethimbo a li  a popi pefumviko lyoshilyo shOparliamende na Kansela gwoshikandjohogololo Endola, Ruth Kepawa Nhinda.

Kapere okwa tanga nakusa Nhinda ongo omutotimpango a li ena eitulemo moshinima shuukashike womuntu. Onkene okwa indile nenge okwa gandja elombwelo kutya elongitho lyoonkondo momagumbo unene tuu tali humithwa komeho kaalumentu nali hulepo ongesimaneko lya nakusa Nhinda.

 “Sho tatu laleke omuwiliki nguka a li ena eitulemo mokukondjela osheetwapo shuukashike womuntu, pitikiindje  ndi longithe ompito ndjika  okudhimbulutha oshigwana kutya oomeme naamwamemekadhona naamwetukadhona otaya tsikile okulongelwa iilonga iiwinayi momagumbo. Onkene opo tu simaneke ondjokonona ndjoka nakusa Nhinda etu thigile otandi ningi eindilo ndika lyuukilila aalumentu unene mboka haya longitha oonkondo momagumbo molupe lwokudhenga, okukwata koonkondo, okuya miihulo noyana nenge naatekulu oshowo okudhipaga oomeme, aamwamemekadhona , naamwetukadhona opo ya taambe omayele okuza kungame  oshowo elombwelo lyandje ya hulithepo iilonga yomilema mbika mbala nopwaana omaipopilo gasha,’Kapere a lombwele.

Nakusa Nhinda ngoka a li omulongi paithano okwa manene oondjenda mepipi lyomimvo konyala omilongo hamano omolwa uuvu wokankela. Okwa li a ningi oshilyo shoSwapo omumvo 1988 manga omulongisikola nomumvo ogo tuu ngoka okwa uulikwa a kale omukwakanithi gwoshitayi shongundu ndjika pOhalushu.

Omumvo 2004 okwa hogololwa kansela gwoshikandjohogololo Endola na okwa ulikwa wo a ninge oshilyo shoparliamende megumbo etiyali lyopashigwana.

Aapopi pefumviko lye oye mu hokolola omuntu ha longo nuudhiginini, uudha omukumo noonkondo okukondjitha okwaana uuyuki monkalathano.

Amushangandjayi gwongundu yo SWAPO , Nangolo Mbumba okwa ti ezepo lya nakusa Nhinda olyo ekanitho enene koshigwana shoka ye okwa li omulongi nomuhanganithi.

 “Ongundu yoSwapo ina yi kanitha ashike  omunapolitika ngoka a li ha longo neitulemo, nevuliko nonuudhiginini , ndele oshilongo wo osha kanitha omulongisikola,”Mbumba a ti.

 Nhinda ongoshilyo shoparliamende okwa yakula moongundu dhegumbo etiyali lyopashigwana na okwa li ena oshinima shuuthikepamwe pokati kaantu oshowo eyokomeho lyokomikunda komutima.

“Omunashipundi shEgumbo Etiyali lyOparliamende ,Asser Kapere okwa hokola nakusa Nhinda ongo omuwiliki ha tala kokule noshowo omuwiliki ehole oshigwana she.

Nakusa Nhinda okwa fumvikwa koshigwana oshindji pegongalo lyaandjawo Ohalushu Olyomakaya gayi.

Caption : Funeral

Caption : Oshigwana shopOhalushu oshowo aawiliki yopashigwana oya li pegonaglo lya Halushu Olyomakaya ga piti, okuthindikila nakusa Ruth Nhinda pegumbo lye lyahugunina..

LEAVE A REPLY

Please enter your comment!
Please enter your name here