Moshikoto omuna oimuna ihapu kovanhu.

0
198

KuHelvy Shaanika

ONGWEDIVA – Omuvalu woimuna mOshitukulwa shaShikoto omuhapu udulife pomuvalu wovanhu ovo veli moshitukulwa omo.

Omivalu edi oda hololwa pefimbo lepatululo loshipangelo shoinamwenyo osho opo sha patululwa pambelewa kOmupedu minista mouministeli oo, Lempy Lukas

Lukas okwa hokolola kutya omavalulo omuvalu wovanhu noinamwenyo omodula 2011 okwa ulika kutya moshitukulwa shaShikoto omu na ovanhu vefike 179 185 ovo ve li momaumbo eli 37 400. Omuvalu woinamwenyo ouli 494 552, omo mwa kwatelwa eedi 3 405, oikombo199 153 neengombe 291 994. Omuvalu wovanhu mwaao woimuna ota u imo hanga loikando itatu.

Momuvalu wovanhu 179 185, ovanhu veli 63 647 ove li ovanafaalama. Oshitukulwahoololo shOmuthiya Gwiipundi osho ashike, oshina ovanhu veli 26 100 ovo hava di momaumbo eli 5 500 ohava xupu mounamapya nounaimuna. Konyala eepelesenda 43.8 mOmuthiya oda tala ko ounaimuna onga oo oshitukulwa shakula shouxupilo, omanga eepelesenda 62.9 hadixupu mounamapya.

Ovanafaalama vomOmuthiya noitukulwa yomudingonoko ova kondwa omaulu oshivike eshi, eshi Ouministeli wOunamapya omeva noikwaixwa  wa patulula pambelewa okapangelo kokuhakulila oinamwenyo.

Paendjovo daye, Lukas okwa ti, monakudiwa ovanafaalama mOshitukulwa shaShikoto ova kala hava ende oinano ile oku ka konga ouhaku woinamwenyo yavo kOndangwa.

Ashike paife eshi ita shi ningwa vali shaashi ova etelwa oshipangelo popepi.

“Oshikondo shounaimuna oshili shimwe shomoikondo oyo tai yambula po omaxupilo oshilongo, noshoyo okuxupifa kovanhu, nopondodo ei, onda yukilila ovakalimo vomOshikoto,” Lukas ta ti.

Poshivilo shepatululo, omupedu minista okwa pandulal epangelo la America ponhele yepangelo la Namibia, eshi le likufa oshimaliwa shihapu, okupitila mehangano lo Millennium Challenge Account Namibia (MCA-N), nokutunga po eembelewa nomaumbo avali omo tamu kala hamudi ovanailonga vouhaku woinamwenyo

“Ohandi udanekele oonakufuta oishoshela (tax) mo America kutya etungo eli ota li ka filwa oshisho, opo li twikile okuyakula oshiwana, okudja nena nomonakwiiwa. Ohandi kunghilile yoo ovo tava ka yakula nokuyakulilwa mo metungo omu, opo veli file oshisho, veli kaleke la yela ndele haku li nyonauna,” Lukas ta ti.

LEAVE A REPLY

Please enter your comment!
Please enter your name here